1गे इन लोक्ब आन ब्यफ, भेडा हेंथे गाक्शो ताइक्तीनी हना, गे मेको कली इन लोक्ब आ बाक्तीकेम चाक्दीतीन। प्रस्थान २३:४
2इन लोक्ब इन नेक्था मबाक्त हना, मेको आ होव़प मतुइक्ताक्नी हना, गे मेको आन कली इन खिं चाक्शा वोतीन। मिनु ममाल्मे सम्म इन खिंम थुलीन। मिनु मेको मुर ब्रथ जाक्त हना, लेत्नीन।
3मिनु जाम्शो गधा, वासी नु मारेइ मारेइ जाम्शो थित्तीनी हना, मेको मोदेंशो पचा माल्नीनी। वारच पचा मप्रोनीन।
4मिनु इन नेक्था ङा मुर आ गधा, ब्यफ लांम थिश्शो ताइतीनी हना, मतशो खोदेंशो मपने। मेको कली पोक्चा कली वारच पतीन।
5मीश मुरुमी वोंइश मुर आन फेक्तीक वा मफेक्सीन। वोंइश मुरुमी मीश मुर आन फेक्तीक वा मफेक्सीन। सु सुमी मेको पाइबा, मेको परमप्रभु यावे, इन परमप्रभु कली ग्रांग्रा बाक्ब।
6मिनु गे, रवाम खपीम चिक्ब आ ग्योव़ का थित्तीनी हना, मेको ग्योव़म ब्वोफु कि चाइक्ब बाक्तेक्म हना, गे मेको चिक्बी नु आ चाइक्ब आन कली लाइक्चा मदुम्ब।
7मेको चिक्ब कली बेरचा गेचा माल्नीनी। आ चाइक्ब आन कली लाइक्ने चाप्नीनी। मो पाइतीनी हना, गे रिम्शो पा बाक्चा ताइनीनी। मिनु इन ब्रोंइतीक नाक्त शुश दुम्नीम।
8गे नक खिं सेल्तीनी हना, खिं तार एर ओंथ नेल्ल थरपु हिरचा माल्नीनी। मारदे हना मुर का दोक्त हना, गे इन खिं तार दोस मतशो मुर कली साइक्तीक पाप राइब।
9गेपुकीमी इन अङगुर रूमी अरु वांचेर तेम्शा मशोक्कीन। मो पाइतीनी हना, इन शोक्शो निम्फा परमप्रभु कली मगारचा ङा दुम्ब। लेवी १९:१९
10गे ब्यफ नु गधा कालेम वाक्चा मदुम्ब।
11गे ऊन नु सुती ब्वाइश्शा प्रोव़शो फेक्चा मदुम्ब।
12गे इन फेक्तीक वा आ कुनामी झुम्का क्युक्शा सेलीन। गन्ती १५:३८
13मिनु मुर कामी ग्युंबे पा आ मीश नु बाक्शा, नोले मदाक्ताक्व हना,
14आ मीश प्रोंइचा कली आ मीश आ पर्बम “आं ग्युंबे पशो मीश आल नु बाक्ङानु, कन्ने मबा” देंत हना,
15मेना मेको मीश आल आ आम आफोम आस तमी कन्ने दुम्तीक चिनु लाइश्शा, सहर ङा ठेयब लाप्चोम बाक्ब खाल्पा आन बाक्तीके लचा माल्नीस।
16मिनु मीश मुर आ आफोम मेको खाल्पा आन कली “गो आं तमी मेको मुर कली ग्युंबे पा गेता। मिनु मेकोमी मुल आं तमी कली मदाक्ब।
17मिनु मेकोमी आं तमी नु ब्राचा कली ‘इ तमी कन्ने मबाक्शो बाक्त’ देंत” देंशा, मेको इप्शो वा मेको खाल्पा आन ङोंइती ब्रचा माल्ब।
18मिनु सहर ङा खाल्पापुकीमी मेको वोंइश मुर कली सजाइ गेचा माल्नीम।
19मिनु मेको वोंइश मुरुम मेको मीश मुर आ आफ कली सहे का चांदी के शेकेल थाप्चा माल्ब। मारदे हना इस्राएल ङा कन्ने मीश आल आ नें मरिम्शो सेल्चा माल्शो बाक्त। मिनु मेको आ मीश कली मबेक्म सम्म प्रोंइने मचाप्ब। शेकेल का ११.५ ग्राम चांदी के क्येट बाक्ब।ब्यवस्था २२:२९
20तन्न मेको वोंइश मुर आ देंशो थमा बाक्त हना, मिनु कन्ने आ चिनु मेको मीश आल नु मबाक्शो बाक्त हना,
21मेको मीश मुर कली आ आफ आ खिं ङा लाप्चोम चाक्चा माल्नीम। मिनु मेको आ सहर ङा वोंइश मुर नेल्लेमी मेको कली फुल्लु आप्शा साइक्चा माल्नीम। मारदे हना मेकोमी आ आफ आ खिंम तेल्लेम पा इस्राएलम काइ मरिम्शो पाप्तु। मिनु मोपा गेपुकीमी इन दातेमी पशो मरिम्शो क्याम्चा माल्नीनी। उत्पत्ती ३४:७
22मिनु वोंइश मुर का अरु आन मीश नु इप्शो थितेक्म हना, मेको निम्फा आस कली साइक्चा माल्नीम। मेको मीश मुर नु बाक्शो वोंइश मुर यो साइक्चा माल्नीम। मिनु मोपा गेपुकीमी इन इस्राएलम पशो मरिम्शो क्याम्चा माल्नीनी। लेवी २०:१०; २सामुएल ११:४
23मिनु ग्युंबे पचा कली पुंइशो मीश आल का कली सहरम अरु वोंइश मुर काम ग्रुम्तु हना, मेको नु इप्त हना,
24मेको निम्फा आस कली सहर ङा ठेयब लाप्चो रे ग्रुंइशा, फुल्लु आप्शा साइक्चा माल्नीम। मेको मीश आल वारच पन, दे मग्रीतीके नु मेको वोंइश मुर आ इस्राएली लोक्ब आ मीश आल नु बाक्तीके, निम्फा आस कली साइक्चा माल्नीम। मिनु मोपा गेपुकीमी इन दातेमी पशो मरिम्शो क्याम्चा माल्नीनी।
25तन्न मेको वोंइश मुरुम मेको ग्युंबे पचा कली पुंइशो मीश आल कली रूम थित्तु हना, मेको कली ग्याइश्शा बिथोलो पाप्तु हना, मेको वोंइश मुर कली ला साइक्चा माल्ब।
26मेको मीश आल कली मारेइ मपचा। मारदे हना मेकोमी साइक्चा पुंइसीचा ङा पाप मपशो बाक्ब। मेको पाप कली साइश्शो खोदेंशो बाक्ब।
27मेको पुंइशो मीश आल रूमी वाइ ब्रेश्शा ग्रीम माइ, तन्न सुइमी वारच मपामे माइ।
28मिनु वोंइश मुर काम ग्युंबे पचा कली मपुंइशो कन्ने मीश आल कली ग्याइश्शा, मेको नु बाक्शो, थित्तेक्म हना, प्रस्थान २२:१५
29मेको नु बाक्शो वोंइश मुरुम मेको मीश आल आ आफ कली ५० शेकेल चांदी थाप्चा माल्ब। मिनु मेको वोंइश मुरुम मेको मीश आल नु बाक्तीके, आ मीश दुम्चा माल्ब। मेकोमी मेको कली मबेक्म सम्म प्रोंइने मचाप्ब। मारदे हना मेको मेको नु इप्त।
30मुरुमी आ आफ आ मीश कली चाक्ने मचाप्ब। आ आफ नु इप्शो मीश मुर नु आ तौ इप्चा मदुम्ब। लेवी १८:८; २सामुएल १६:२२
