1मिनु होरेब डांडामी परमप्रभु यावेमी इस्राएली नु पशो कबल नु तेम्शा, मोआब रागीम मोसा कली इस्राएली आन कली तेम्चा ङा लोव़ मार बाक्नीम देंशा हना, ब्यवस्था ५:२
2मोसामी इस्राएली नेल्ल आन कली ब्रेश्शा “परमप्रभु यावेमी इजीप्तमी फाराओ नु मेको आ गेय पाइब नेल्ल नु आ रागी कली पशो गेपुकीमी नेल्ल तशो बाक्नीनी। प्रस्थान १९:४
3गेपुकी मेको ठेयब नाक्तीके ताइतीनी। मिनु मेको ठेयब चिन्ड नु छक लाक्चा ङा गेय यो ताइतीनी। ब्यवस्था ४:३४; ब्यवस्था ७:१९
4तन्न मुल सम्म परमप्रभु यावेमी इन कली रुप्तीक थुं, कोव़तीक मिक्च नु नेंतीक नोफा मगेशो बाक्ब। ब्यवस्था ५:२६
5मिनु गो इन कली ४० बर्स सम्म गोरशो रागीम लां कोंइताक्न्नी। इन फेक्तीक मजे, जुत्ता यो मजे। ब्यवस्था ८:४
6गेपुकीमी शोब्ले मजनी, अङगुर शांबु नु रकसी यो तूचा मतनी, तन्न ब्रोंइतीनी। मिनु गो परमप्रभु यावे, इन परमप्रभु नङ, दे गेपुकीमी रुप्तीनी।
7मिनु गेपुकी एको रागीम जाक्नीनु, हेश्बोन ङा पिप सीहोन नु बाशान ङा पिप ओग गोपुकी नु लडाइ पचा कली ग्रुम्शा जाक्ताक्स। मिनु गो मेको आन कली फ्रुइतय। गन्ती २१:२१-३५
8मिनु गोपुकीमी मेको आन रागी ग्राशा, रूबेन आ थर, गाद आ थर नु मनस्से आ थर ङा आधा मुर आन कली आन के सेल्चा कली रू गेशो। गन्ती ३२:-
9मोपतीके एको कबल पशो लोव़ होस पा पने। मिनु मो पाइतीनी हना, गे मार मार पनी, मेको रिम्शो दुम्ब।
10मिनु गे नेल्ल परमप्रभु यावे, इन परमप्रभु आ ङोंइती राप्शो बाक्नीनी। इन थर थर ङा ठेयब मुरपुकी, इन खाल्पापुकी, ससान पाइबपुकी नु इस्राएली नेल्ल,
11इन आलपुकी नु इन मीशपुकी, अर्को रागी ङा इन दातेमी बाक्शो मुरपुकी, शी चाक्ब नु ब्वाक्कु कुरब नेल्ल बाक्नीम। यहोसु ९:२७
12मारदे नेल्ल बाक्शो बाक्तीनी देंशा हना, परमप्रभु यावे, इन परमप्रभुमी गे नु कसम जशो कबल मुलाक्त परमप्रभु यावे, इन परमप्रभुमी गे नु पाइब।
13दोपा परमप्रभु यावेमी इन किकी पिपी अब्राहाम, इसहाक नु याकूब नु कसम जशो बाक्मे, मोपान मुलाक्ती इन परमप्रभुमी इन कली आंम के मुर सेल्चा कली कबल पाप्तु।
14मिनु गो मेको कसम जशो कबल परमप्रभु यावे, इं परमप्रभु आ ङोंइती राप्शा बाक्ब इन कली ला ममाइ, ब्यवस्था ५:३; उत्पत्ती १७:७
15तन्न सु सु मुलाक्त मबाक्तेक्म हना, यो मेको कबल पाइनुङ।
16गो दोपा इजीप्त रागीम बाक्या, तुइक्नीनी। गोपुकी रागी रागीम गाक्शा, दोपा जाक्या, दे यो तुइक्नीनी।
17मिनु गे आन ग्रांग्रा दित्चा ङा शी, फुल्लु, सुन नु चांदी के देवी देवता आन कली यो तशो बाक्नीनी।
18मिनु इन दाते रे सुइ वोंइश मुर, मीश मुर, खिं ङा मुर नु थर ङा सुइ आन थुं परमप्रभु यावे, इं परमप्रभु रे नोले शोंइसीशा, मेको रागी रागी ङा देवी देवता आन कली पूजा पचा दाक्ब बाक्नीम कों? इन दातेमी मोदेंशो ओश्येर पाइश्शो शाक्श का बाक्बा कों? ब्यवस्था ३२:३२; होसे १०:४; आमोस ६:१२; हिब्रू १२:१५
19मिनु मोदेंशो पाइब मुर मेको कसम ङा लोव़ नेंशा, आ थुंमी ‘गो आंम मिम्तीके पशा बाक्ती हना यो, गो सराप मराइनुङ। गो आसीक ताइब बाक्ती’ दे मिम्ब। मोदेंशो मिम्तीके नेल्ल आन कली खतम सेल्ब।
20मिनु परमप्रभु यावेमी मोदेंशो मुर आ पाप मक्याम्ब। परमप्रभु यावे मेको कली तशा, आ गाइक्चा नु आ गेहे पतीके मी खोदेंशो पा ब्राइब। मिनु मेको अरेशो लोव़ ङा किताबम ब्रेक्शो सराप नेल्ल मेको मुर कली राइब। मिनु परमप्रभु यावेमी मेको आ नें रागी रे क्याम्ब। ब्यवस्था २८:१५-६८
21मिनु परमप्रभु यावेमी मेको कली इस्राएली आन थर रे तिल्शा, मेको अरेशो किताबम ब्रेक्शो कबल ङा सराप नेल्ल रपाइक्ब।
22इन नोले जरमेशो पाला, इन नोले जाक्शो तमी तौ नु ङोन रागी ङा मुरपुकीमी मेको रागी ङा श्येत नु परमप्रभु यावेमी मेको आन कली गेशो बेक्तीक ङा रोइ तशा
23मेको रागी नेल्लेम मी ब्रशा गन्धक नु हिक्सी बाक्ब। मारेइ मशोक्शो, काइ गिग मग्रूशो मारेइ मवाशो बाक्ब। मेको परमप्रभु यावेमी चुरशा गाइश्शो सोदोम नु गोमोररा, अदमाह नु सेबोयीम खतम सेल्शो रागी खोदेंशो बाक्ब। उत्पत्ती १९:२४
24मिनु रागी रागी ङा मुर नेल्लेमी ‘परमप्रभु यावेमी एको रागी कली मारदे ओदेंशो सेला? एको आ पर्बम मारदे मोदेंशो शुश चुरशा गाइक्ता?’ दे हिल्लो पाइनीम।
25मिनु मेकोपुकीमी ‘मेको परमप्रभु यावे, आन किकी पिपी आन परमप्रभुमी मेको कली इजीप्त रे ग्रुंइची ना पशो कबल प्रोंइने थुम्शो बाक्तेक्म।
26मिनु मेकोपुकीमी आन मतुइश्शो नु परमप्रभुम मपचा देंशो देवी देवता आन ङोंइती बाप्शो बाक्तेक्म।
27मोपतीके परमप्रभु यावे एको रागी आ पर्बम शुश गाइक्ताक्व। मिनु मेकोमी एको किताबम ब्रेक्शो सराप नेल्ल मेको रागी कली रपाइक्तु।
28मिनु परमप्रभु यावेमी चुरशा, गाइश्शा, आ ठेयब गाइश्शोम मेको आन कली आन रागी रे खेरशा, अर्को रागीम ताइक्ताक्व। मेको मोदेंशो मुलाक्त दुम्शो बाक्ब’ देंनीम।
29मिनु मारेइ मारेइ ख्रुइश्शो परमप्रभु यावे, इं परमप्रभु के बाक्ब। तन्न मेको अरेशो लोव़ नेल्ल टिचा नु मेको तुइक्तीके आंइ के नु आंइ तमी तौ के बाक्ब” देंत। ब्यवस्था ३२:३४
