Nambas 14

6

13

14

20

21

22

23

24

25

27

33

35

¹Ḡome Islael lavedi matabudi ai nuwaboya bi a ḡaba malasako.

²Bi tedi Mousis bi Elon a giuvitavitaledina gado, “I visu te maso Idipmo ke peki.

³Bai aubaina Bada niga dobunemo i tavaitemai bi niganana ḡaviya sai pekimai bi mwanemwanemai bi natunatumai sa pani nawedi bi sai taupaula yababa aubaidi. I visu te ka munaḡa Idip.”

⁴Ḡome edi lava vaitedi ai ogatala bi a giuna gado, “Tada taudaḡa eda taulauetadoli ta vine bi yai dolida te ta munaḡa Idipmo.”

⁵Ḡome Islael lavedi matabudi matedimo Mousis bi Elon kaḡedi ai tupagwaliḡedi bi a laudulu doḡamo.

⁶Bi Nan natuna Diyosuwa bi Defune Natuna Keleb labuidi nuwedi i gebo bi edi gala a lisidi.

⁷Bi a giuna Islael lavedi matabudi lisidimo gado “Ei, tama doḡana matabuna ke vakita kovi, te doḡa visuvisu guletina.

⁸Bamo te Bada lisidemo i wainuwavisuna ba ya naweda dobunemo bi doḡana ya viteda. Niga doḡana ba maumaulina bi ḡamoḡamo wapewapedi.

⁹Bada lisinemo mote koma giuvitavitala bi mote koma naila. Tada ḡemoḡemotida mba dobuna lavedi ta lauyovoḡedi. Bada tada lisidemo ya miyamiya bi tedi ba yasidi geḡa.”

¹⁰Ḡome lava matabudi a giu te Diyosuwa bi Keleb maso a lauḡakimidi. Bi geḡa te Bada namalina palai waiyawa mataetinemo i laumaḡata lava matabudi matedimo.

²⁶Kamaina bi Bada, Mousis bi Elon i giuwedina gado,

²⁷“Laḡan i alawapa niga lavedi lisigumo sa giugiuvitavitala. Tedi edi giuvitavitala kaikana e vaiye.

²⁸Tagu egu giu te niga lavedi kwa giuwedi: Tagu Bada e giu te temi giu kona vatodi bi e vaivaiyedina kota yà kulavitaledi te mainana lisimimo sa tubuḡa.

²⁹Temi taugiuvitavitala matabumi niga kalakalalelemo ko peki kovi. Temi mabai a iyevimi bi emi kwalabu 20 bi noke i saḡa i nawanawana ba niga ḡome ko peki kovi.

³⁰Tagu dobuna e giuwapa te maso e vitemina ba mote ḡome koma tava. Bi Nan natuna Diyosuwa bi Defune Natuna Keleb taudiḡa mba dobunemo sa sola saḡa.

³¹“Temi kona giu te emi ḡaviya natunatumi sa pani nawedi. Bi geḡa te tagu mba dobunemo yà tavaitedi. Temi dobuna kona dabodabokena natunatumi sa miya.

³²Bi temi matabumi ba niga kalakalalelemo ko peki kovi.

³³Temi tagu kona laukasaḡaiḡaiyegu aubaina kalakalalelemo natunatumi kaka sipu taulabedi sa tubuḡa kwalabu 40 nopodimo, eete matabumi ko peki kovi.

³⁴Temi laḡan 40 nopodimo dobu kona tigane, mainana kota kwalabu 40 nopodimo yà kovoḡimi. Kwalabu ḡemota ba laḡan ḡemota. Temi kona voiyegu te mai kemi ḡaviya, taunana aubaina yavi kaka mayana ko vai.

³⁵Tagu Bada giukauwemo yà giugiuwemi te niga kauwidi yà voiyedi. Lava laulaukasaḡaiḡaidi yà kovoḡidi te kalakalalelemo sa peki kovi.”