1Ɠɔoɠɔ GALAGI ɓɔɛni Moize ʋɔ, é ɠɛ ma:
2«Doun zunu mɔungi kpein fe bɛ̀, niiti ta zɔlɔɔ Izelayɛle nuiti saama, nuɓusɛiti ta toganiiti. Ma mɔungi kpein Izelayɛle nuiti pɔ bɛ, ta ga nɔ̀nɔ.»
3Moize ɠɛni nuɓusɛiti ma: «À ɠizɛ naama voloi zu, yeei wo ɠulani la Ezipete yooi ʋa, duɔla ʋɛlɛi wu, mazɔlɔɔ Ɠɔoɠɔ GALAGI ná-zeeɠaaɓaai ɠa é wo ɠulani la. Nu mina ɓului mi nii lɛʋɛi su.
4Wa ɠulazu za Ezipete yooi ʋa, molo ɠulasu alugi ma, wo li.
5Siɛgi zu Ɠɔoɠɔ GALAGI lɛɛzu la ga woye Kanaan nuiti ta-yooi zu, ta Ɠɛte nuiti, ta Amɔɔl nuiti, ta Ɠeeve nuiti, ta Yeeɓuse nuiti, nii é ma ɠonai woni wo-mɛmɛwolani bɛ ga é fe wo ʋɛ, ʋɛ nɔnɔi ta kɔin gulɔi ʋooʋaai ná, wa niima lɛbiyai ve Ɠɔoɠɔ GALAGI ʋɛ, niima alugi ɓɔɠɔi nɔ ma.
6Folo lɔfela laawu, wa ɠɛ ɓuluiti miizu nii lɛʋɛ la su. Folo lɔfelasiɛi ma, fɛtii ɠa ɠɛ Ɠɔoɠɔ GALAGI lɛbi vaa ma.
7Wa ɓuluiti mi folo lɔfela laawu, nii lɛʋɛ la su. Ɓului nii lɛʋɛi su, naa mina ɠa wo-zeizuʋɛ, nu mina lɛʋɛ ɠa wo ʋɔ bɛ wa-yooi ɠa ná pɛ.
8«Naama voloi zu, wa suɠula wo-loun zunui ma ga: ‹Toɠa ga naama vai, nii Ɠɔoɠɔ GALAGI kɛɛni bɛ̀, siɛgi zu gè ɠulani la Ezipete yooi ʋa.›
9Toɠa ɠɛ wo ʋɛ wo-yeei ʋa ga poogi, ta tookisui wo-loʋalaʋɛ, naa ɠa a kɛ Ɠɔoɠɔ GALAGI ná-tɔgi ɠɛ wo-laaʋɛ, mazɔlɔɔ Ɠɔoɠɔ GALAGI wo ɠulaʋɛ Ezipete yooi ʋa ga ná-zeeɠaaɓaai.
10Wa niima levei zo, wo kɛ ma yeeɠɛɠalai ma kona-o-kona.
11«Siɛgi zu Ɠɔoɠɔ GALAGI lɛɛzu la ga woye Kanaan nuiti ta-yooi zu, eɠɛʋelei é ma ɠonai woni la wo ʋɛ, ta wo-mɛmɛwolani bɛ, ga toɠa ʋaazu feezu wo ʋɛ,
12wa doun zunu mɔungi kpein fe Ɠɔoɠɔ GALAGI ʋɛ, anɛɛ toganiiti ti-yiʋoi ma mɔungiti ti sɔlɔɔsu, ma zinɛiti ta ga Ɠɔoɠɔ GALAGI nɔnɔ.
13Wa soovale ziʋo mɔungi kpein unmɔɔ ga baala ziʋoi. Ni wo la unmɔɔni, wa kɔtɔɠaʋɛ wolo. Wa doun zunu mɔungi kpein unmɔɔ, wo-loun zunuiti saama.
14Siɛgi zu wo-loun zunuiti ti wo ɠaazaɠasu la lina ɠa lina, ga: ‹Naa ʋoluʋɛ ɠa ga ɓɛgele?›, wa gooɠaaʋote ga: ‹Ɠɔoɠɔ GALAGI ná-zeeɠaaɓaai maaʋele ɠa é ade ɠulani la Ezipete yooi ʋa, duɔla ʋɛlɛi wu.
15Tɛi Falaɠɔn ɠɛni ɠɛlɛzu ga kikpaai, ga é mina ɓe ade ʋa, de ʋa li, Ɠɔoɠɔ GALAGI doun zunu mɔungi kpein paani Ezipete yooi zu, é zo nuiti ti-loun zunu mɔungiti ma, é li suaiti ti-ma yiʋo zinɛ mɔungiti pɔ. Naa ɠa é kɛɛzu, ade ma zinɛ mɔungiti kpein kulazu la ga zalaɠai Ɠɔoɠɔ GALAGI ʋɛ, ta de doun zunu mɔungiti kpein unmɔɔsu la.›
16Toɠa ɠɛ eɠɛ poogi wo-yeei ʋa, ta wo-loʋalaʋɛ, mazɔlɔɔ Ɠɔoɠɔ GALAGI ade ɠulani Ezipete yooi ʋa ga ná-zeeɠaaɓaai.»
17Siɛgi zu Falaɠɔn ɓeni la nuɓusɛiti ba ga ti li, GALA ge la ɠɛni liini ga tiye Filiseti nuiti ta-yooi zu ʋele, anɛɛ ni naa wola maaɓuɠani, mazɔlɔɔ GALA ge ɠɛni ɠɛɛzu ma: «Nuɓusɛiti ti iɲɔ ka leʋe, ti ɠale ma Ezipete yooi zu, ta ɠɛna kɔɔi ɠaa.»
18Kɛlɛ GALA ge ti ɠaaɠaleni ma, é li ga tiye ga teʋebai zu ʋelei, Seeli Kpoloɗɛi ʋɔ pelei. Izelayɛle nuiti ti ɠulani Ezipete yooi ʋa, ti ɠasɔɠiliai ga pagɔ.
19Moize Zozɛfe ma ɠaeiti seɠeni ya, mazɔlɔɔ Zozɛfe ɠɛni Izelayɛle ná-doun zunuiti ma: «À ɠonana, wo ɠɛ, GALA ka ʋaazu ɓɔsu wo ʋa, wa lɛ ga mà ɠaeiti ya, wo ti maaɠooza ʋɛ ʋa.»
20Ti zeɠeni Sukɔte, ti li, ti ʋu Etame teʋebai laaʋɛ.
21Ɠɔoɠɔ GALAGI ɠɛni liizu ti luɠɔ foloi tonaɓiingi zu, é lo ti luɠɔ pelei zu, ta kpidii é lo ti luɠɔ ga abuzogi, é ti maaɠala, naa ɠa a kɛ ti ziɛ folo ʋɛɛ kpidi ʋa.
22Tonaɓiingi la ɠɛni zeɠezu nuɓusɛiti tuɠɔ foloi laawu, abuzogi ɓalaa la ɠɛni zeɠezu ti luɠɔ kpidii laawu.
