1Ɠɔoɠɔ GALAGI ɠɛni Moize ma: «Li, zeɠe ʋɛ, ɗa-o, nuɓusɛiti-yo, niiti è ti ɠula Ezipete yooi ʋa. Lɛ zooi ʋɔ pelei, nii gè ma minazeɠeni ga nà feezu Aɓalaame ya, ta Izaake, ta Zakɔɓe, gè ɠɛ ma: ‹Nà feezu è-mavofodai ya.›
2Nà geezuɠeelai ta leʋesu è luɠɔ, nà Kanaan nuiti kpɛɛzu è luɠɔ, ta Amɔɔl nuiti, ta Ɠɛte nuiti, ta Feeleeze nuiti, ta Ɠeeve nuiti, ta Yeeɓuse nuiti.
3Lɛ naama yooi zu, ʋɛ nɔnɔi ta kɔin gulɔi ʋooʋaai ná. Kɛlɛ ade la lɛɛzu ʋɔɔma, gè mina wo undaaʋili pelei zu, mazɔlɔɔ wa ga suvɔɔ nuɓusɛiti.»
4Siɛgi zu nuɓusɛiti ti naama ɓɔɛ ɲɔiti mɛnini da, ti ɠaalɛini. Nu nɔpɛ ge la ɠɛni ɓɔɠɔ maaɠilini ga ná-sɔɔla ʋagɔ.
5Ɠɔoɠɔ GALAGI ɠɛni Moize ma: «Ɠɛ Izelayɛle nuiti ma: ‹Wa ga nuɓusɛiti ti zuvɔai. Ni gè lɛɛni wo zaama yeeɠɛɠala go laawu, nà la wo undaaʋili. Niizu, à wa-maaɠili zɔɔla ʋagɔiti kula ɓɔɠɔ ma, nà pɛtɛ, nii gè ʋaazu kɛɛzu wo ʋɛ.› »
6Izelayɛle nuiti ti maaɠoozaai ma Ɠɔɔlɛɓe gizei ʋa, ti la mɔ ɠɛni ta-maaɠili zɔɔla ʋagɔiti toozu ɠɔba.
7Ta la ti-ʋuuzuʋɛ ɓɛtɛna, Moize ɓena seɠe ʋɛlɛ ɲadegai zeɠe, é to ti-ʋuuzuʋɛ ʋoluʋɛ, tago maaɠooza. É daasei pɛɛni ga GALA daaɠomi seɠe ʋɛlɛi. Nu-o-nu nii é ɠɛni pɔ ga é Ɠɔoɠɔ GALAGI ɠaazaɠa, naa ɠɛni ɠulazu, é li GALA daaɠomi seɠe ʋɛlɛi ʋɔ pelei, nii é ɠɛni ti-ʋuuzuʋɛ ʋolu ʋelei.
8Siɛgi zu Moize ɠɛni liizu la seɠe ʋɛlɛ ɲadegai wu, nuɓusɛi kpein ge ɠɛni wuzeɠezu, ɛsɛ ge ɠɛni losu ná-seɠe ʋɛlɛi laaʋɛ, é ɠaazulo Moize ʋa, eyɛsu é lɛ seɠe ʋɛlɛ ɲadegai wu.
9Siɛgi zu Moize ɠɛni lɛɛzu la seɠe ʋɛlɛ ɲadegai wu, tonaɓiingi ɠɛni yeizu, é lo seɠe ʋɛlɛ ɲadegai laaʋɛ, Ɠɔoɠɔ GALAGI ɠɛni ɓɔɛzu Moize ʋɔ.
10Nuɓusɛi kpein ge ɠɛni tonaɓiingi ɠaazu, é ɗa lo seɠe ʋɛlɛ ɲadegai laaʋɛ, naazu nuɓusɛi kpein ge ɓena wuzeɠe, é yɛ ná-seɠe ʋɛlɛi laaʋɛ, é nɔkɔ GALA bu.
11Ɠɔoɠɔ GALAGI ɠɛni ɓɔɛzu Moize ʋɔ ɠaazuni ta ɠaazu, eɠɛʋelei nu a ɗa ɓɔɛ la bɔɔla ʋɔ. Naa ʋolu Moize ɓena ɠale ma ti-ʋuuzuʋɛ, kɛlɛ ná-botiɠɛ zunu loungoi Zozuwe, Nun ná-doun zunui la ɠɛni zeɠezu seɠe ʋɛlɛ ɲadegai ɠoozu ʋelei.
12Moize ɠɛni Ɠɔoɠɔ GALAGI ma: «Wɛlɛ, è ɠɛɛʋɛ mà: ‹Lo niima nuɓusɛiti tuɠɔ, è lɛ ga tiye,› ɗa ma, è la naama nui lɛɛni ga ze, nii gá li, é màaza! Anɛɛ naa ʋe, è ɠɛni mà: ‹Gè è ɠwɛɛ ga è-laaseigi, è zaalai zɔlɔɔgɛ gàazu.›
13Niizu, ni gè zaalai zɔlɔɔgɛ è ɠaazu, ɗa-ʋeleiti dɛɛna ga ze, naazu nà è ɠwɛɛ, gè zaalai zɔlɔɔ è ɠaazu mɔnɔ. Wɛlɛ, zii tɛi ka ga ɗa-nuɓusɛi.»
14Ɠɔoɠɔ GALAGI gooɠaaʋoteni, é ɠɛ ma: «Nà losu è luɠɔ, nà ɓɔɠɔi. Nà dooɠo feezu è ʋɛ.»
15Moize ɠɛni ma: «Ni ɗa ɓɔɠɔi è la losu gi luɠɔ, mina gi zeɠe ʋɛ.
16Toɠa ɠwɛɛ ɠale ga gaama, ga gè zaalai zɔlɔɔgɛ è ɠaazu, nɔ̀un nà-o, ɗa-nuɓusɛiti-yo? Siɛgi zu laade, ade ziɛzu la ʋɔɔma, ta siɛgi zu nà-o, ɗa-nuɓusɛiti-yo, zɔɠɔzu ɠɛɛzu la gi ʋa ga nuɓusɛiti kpein ti eteai zu?»
17Ɠɔoɠɔ GALAGI ɠɛni Moize ma: «Nà naa ɠɛ, nii è maaɠaazaɠaboga mà, mazɔlɔɔ è zaalai zɔlɔɔgɛ gàazu, gè è ɠwɛɛ ga è-laaseigi.»
18Moize ɠɛni ma: «Soma kae, è ɗa-lɛbiyai lɛ ga ze!»
19Ɠɔoɠɔ GALAGI gooɠaaʋoteni, é ɠɛ ma: «Nà leʋesu è ɠakalaʋɛ, gè nà-padai kpein dɛɛ ga ɗe, gè dàaseigi lɛ ga ɗe, nii é ga Ɠɔoɠɔ GALAGI. Nà zaalai la naa ma, nii gè pɔ gè zaalai la ma. Nà maawɔinɠai ɠɛ naa ʋɛ, nii gè pɔ gè maawɔinɠai ɠɛ bɛ.»
20É ɠɛni ma mɔnɔ: «È la zooga è ʋa gàazuʋɛ ɠa, mazɔlɔɔ nui la zooga kàazu, é ʋa yɛ vulua.»
21Ɠɔoɠɔ GALAGI ɠɛ ma: «Wɛlɛ adaʋɛ ta ʋa, kòbaʋɛ, ɗa lo fasai ma.
22Siɛgi zu nà-lɛbiyai leʋesu da, nà è lɔɔzu fasa yeɠei ta zu, gè è maalɔɔɠu ga zèei, eyɛsu gè leʋe.
23Naa ʋolu, nà yee ɠaaɠale ma niina, ɗa pòlu ʋelei ɠa, kɛlɛ gàazuʋɛ la zooga ɠaazu.»
