1GALA ge ɠɛni Moize ma: «Lɛ Ɠɔoɠɔ GALAGI ʋɔ bɛ, ɗa ɓɔɠɔi wa Aalɔn, ta Nadaɓe ta Aɓiyu, ta Izelayɛle ɠɛwola ʋɔlɔ ʋuulɔfela (70), wo yɛ ɠoozama, wo nɔkɔ.
2Ɗa ɠila kpe nɔ ɠa ɗa maaɓuɠa Ɠɔoɠɔ GALAGI ʋa. Zɔiti ti mina maaɓuɠa ba, nuɓusɛiti ti mina yɛ é ʋolu, ti ʋa lɛ.»
3Moize ʋaani, é Ɠɔoɠɔ GALAGI wooiti kpein bo nuɓusɛiti ma, ta tɔgiti kpein. Nuɓusɛiti kpein ti gooɠaaʋotegi veeni ga woo ɠila, ti ɠɛ ma: «Gá naa kpein kɛ, nii Ɠɔoɠɔ GALAGI boga.»
4Moize Ɠɔoɠɔ GALAGI wooiti kpein sɛʋɛni. Naa ʋolu é wuzeɠeni ga sobuzobui, é zalaɠa ɠulazuʋɛ lo gizei ɠɔɠɔaʋɛ, é kɔtu puugɔ maazu felegɔiti (12) pilɛni ga ɠizɛsui Izelayɛle ná-boloda puugɔ maazu felegɔiti (12) faa zu.
5É Izelayɛle zinipoiti teʋeni, ga ti gala zalaɠaiti kula Ɠɔoɠɔ GALAGI ʋɛ, ta ti nikɛ zinɛiti kula ga ziilɛi zalaɠaiti.
6Moize ɲamai ma lukpɛgi zeɠeni, é pu kokoiti su, é ma lukpɛgi zɔi zeɠeni, é pili zalaɠa ɠulazuʋɛ ma.
7É minazeɠegi ma zɛʋɛi zeɠeni, é kala nuɓusɛiti gaazu. Ti ɠɛni ma: «Gá naa kpein kɛ, nii Ɠɔoɠɔ GALAGI boga, gá ɠolo gooiti bɛ.»
8Moize ɲamai zeɠeni, é faza nuɓusɛiti ma, é ɠɛ: «Nii ɠa é ga ɲamai nii é minazeɠegi maaɓakpasu, nii Ɠɔoɠɔ GALAGI kɛa wo yɔɠɔzu, eɠɛʋelei niima ɓɔɛiti kpein ti la.»
9Moizeni ti lɛɛni gizei ma ta Aalɔn, ta Nadaɓe, ta Aɓiyu, é ʋɛɛ Izelayɛle ɠɛwola ʋɔlɔ ʋuulɔfela (70) ʋa.
10Ti Izelayɛle ná-GALAGI ɠaani, kɔɠɔiti bu ɠɛai eɠɛ kɔtui nii daaseigi ga safiilegi, kpiiniai eɠɛ geeɠɔlɔgi.
11Ɠɔoɠɔ GALAGI la ɠɛni faa ɲɔu nɔpɛ kɛɛni ga Izelayɛle nu ɓiingiti. Ti GALA kaani, naa ʋolu ti daamii woni, ti ɓɔɔle.
12Ɠɔoɠɔ GALAGI ɠɛni Moize ma: «Lɛ pɔ̀ bɛ gizei ma, è yɛ ná. Nà kɔtu ɠokologiti feezu è ya: tɔgi ta deveiti gè ti zɛʋɛai Izelayɛle nuiti bɛ, ti ɠala fai zu.»
13Moize wuzeɠeni, ta Zozuwe, nii é ga ná-botiɠɛ nui, Moize lɛɛni GALA ná-gizei ma.
14É ɠɛni kɛwolaiti ma: «À gi maaɓɔun ʋɛ, eyɛsu gi ɠale ma ʋolu wo ʋɔ bɛ. Wɛlɛ, Aalɔn ta Ɠuul ta yɛsu wo ʋa ʋɛ, ni faaɠaaɠulaba a ɠɛna ta ya, toɠa bo ti ma.»
15Moize lɛɛni gizei ma, tonaɓiingi ʋɛɛni gizei ma.
16Ɠɔoɠɔ GALAGI ná-lɛbiyai yeini, é ʋɛɛ Sinayi gizei ma, tonaɓiingi ʋɛɛni ma folo lɔzita laawu. Foloi lɔfelasiɛi, Ɠɔoɠɔ GALAGI Moize lolini tonaɓiingi zaamaʋɛ.
17Ɠɔoɠɔ GALAGI ná-lɛbiyai ɠɛʋelei ɠɛni Izelayɛle nuiti gaazu, eɠɛ abuzogi gize unmaʋɛ.
18Moize lɔɔni tonaɓiingi zaama, é lɛ gizei ma. Moize kɛɛni gizei ma ga folo ʋuunaanigɔ (40) ta kpidi ʋuunaanigɔ (40).
