1Wɛlɛ, nii ɗa kɛ, Aalɔn ta ná-dointi fee vai zu bɛ̀, naa ɠa a kɛ ti nà-zalaɠa ɠula wotii ɠɛ. Nikɛ zinɛ ɓokpa gila seɠe, ta baala sinɛ felegɔ, nɛɛʋuzu mina ɠɛ ti ʋa,
2ta ɓului nii lɛʋɛ la su, ta ɓulu ʋɛlɛʋɛlɛgiti lɛʋɛ la su, gaayɔgai ga gulɔi, ta ɓulu lɛɛvɛiti, lɛʋɛ la su, gulɔi ʋuai ma, è ti ɓɛtɛ ga ɓulu vukɔ ʋagɔi.
3Ɗa ti ʋu kpɔlɔ gila su, è ʋa ga tiye kpɔlɔgi naa zu, è ti lɛ, ɗa ɠɛna nikɛ zinɛi ta baala sinɛ felegɔiti kulaa ga zalaɠai.
4Ɗa li ga Aalɔn ta ná-doun zunuiti GALA daaɠomi seɠe ʋɛlɛi laaʋɛ, è ti maagba ga ziɛi.
5Ɗa seɠeiti seɠe, è Aalɔn maaɠili ga seɠewuzeɠei, ta tookɔba wolai, ta zalaɠa ɠula zeɠei, ta kakazu zeɠei, è saamaɠili ga zalaɠa ɠula zeɠei ma lokoi.
6Ɗa bɔɔlɔgi lɔ nɔungi ʋa, è zanu sɛʋɛ goi ɠili kakalaʋɛ, nii é ga fee vai ma ʋoogi GALA bɛ.
7È siɛma wulɔ ɲadegai zeɠe, è ta ʋu nɔungi zu, è ta ziɛ ma.
8Ɗa ʋa ga ná-doun zunuiti, è ti maaɠili ga seɠewuzeɠeiti.
9Ɗa ti zaamaɠili ga saamaɠiligiti, è bɔɔlɔgiti dɔ tɔungiti ba. Ta nà-zalaɠa ɠula wotii ɠɛ, tɔgi ɠana eyɛsu ɠɔ. Ɗa Aalɔn ta ná-doun zunuiti fe bɛ̀.
10Ɗa ʋa ga nikɛ zinɛ ɓokpagi GALA daaɠomi seɠe ʋɛlɛi ɠakalaʋɛ, Aalɔn ta ná-doun zunuiti ti-yeeiti pɛɛ nikɛ zinɛi unmaʋɛ.
11Ɗa nikɛ zinɛi ɠɔdaaleʋe Ɠɔoɠɔ GALAGI ɠaazu, GALA daaɠomi seɠe ʋɛlɛi laaʋɛ.
12Ɗa nikɛ zinɛi ma ɲamai zeɠe, è ta ziɛ zalaɠa ɠulazuʋɛ ma minɛiti ma ga è-yeeɓeɠai. Ɗa ɲamai mɔtai ʋu ya zalaɠa ɠulazuʋɛ ɠɔɠɔaʋɛ.
13Ɗa ma wulɔi kpein seɠe, nii felevelegai koozu zɔɔlaiti ma, ta ma mɔɔin ʋasuʋɛ, ta ma lɔɠɔ felegɔiti ma, ta gulɔi é ti maaʋɛ ɲɛgɛlɛin, ɗa naa ɠala zalaɠa ɠulazuʋɛ.
14Kɛlɛ ɗa nikɛ zinɛi mɔtai ɠala wo-ʋuuzuʋɛ ʋoluʋɛ: ma zuai, ta ma ɠɔlɔi, naa ʋɛɛ ma ɓooiti ba. Toɠa ga koto gba zalaɠai.
15Ɗa baala sinɛi taɠila seɠe, Aalɔn ta ná-doun zunuiti ta yeeiti pɛɛ baala sinɛi unmaʋɛ.
16Ɗa baala sinɛi ɠɔdaaleʋe, è ma ɲamai zeɠe, è pili zalaɠa ɠulazuʋɛ ma, é ɠaku ma kpoloo.
17Ɗa baala sinɛi leʋeleʋe, è kpulukpulu, è koozu zɔɔlaiti ta kɔɠɔiti gba, è ti la kpulukpulugai ta ma ungi ma.
18Ɗa baala sinɛi pɛ gala zalaɠa ɠulazuʋɛ. Toɠa ga gala zalaɠai Ɠɔoɠɔ GALAGI ʋɛ, zalaɠai ʋe, nii abui galazu, makugi nɛai Ɠɔoɠɔ GALAGI ʋɛ.
19Ɗa zɔɔma ʋaala sinɛi zeɠe. Aalɔn ta ná-doun zunuiti ta yeeiti pɛɛ baala sinɛi unmaʋɛ.
20Ɗa baala sinɛi ɠɔdaaleʋe, è ma ɲamai ta zeɠe, è siɛ Aalɔn yeezazu ʋele woi yɔkpɔgi ma, ta ná-doun zunuiti zeezazu ʋele woi yɔkpɔgiti ma, ta ti-yeezazu yeezinɛkpotogiti ma, ta ti-yeezazu ɠɔɠɔzinɛkpotogiti ma. Ɗa ɲamai mɔtai ʋili zalaɠa ɠulazuʋɛ ma, é ɠaku ma kpoloo.
21Ɗa ɲamai ta zeɠe, nii a ɠɛ zalaɠa ɠulazuʋɛ, ta siɛma wulɔ ɲadegai ta, è ti vaza Aalɔn ta ná-seɠeiti ma, naa ʋɛɛ ná-doun zunuiti ta ta-zeɠeiti ba. Pele ɠana ɗa Aalɔnni fe la bɛ̀, ta ná-seɠeiti, naa ʋɛɛ ná-doun zunuiti ta ta-zeɠeiti ba.
22Ɗa baala sinɛi ma wulɔi zeɠe, ta ma wɔɔngi, ta ma wulɔi felevelegai koozu zɔɔlaiti ma, ta ma mɔɔin ʋasuʋɛ, ta ma lɔɠɔ felegɔiti, ta ma wulɔi felevelegai ti ma, ta zeezazu ɓalai, mazɔlɔɔ toɠa ga ti zei vai ma ʋaala sinɛi.
23Ɓului lɛʋɛ la su, naama ɓɔlɔgi, nii seiɗai Ɠɔoɠɔ GALAGI ɠakala, ɗa ɓulu ɠila seɠe naama ɓɔlɔgi zu, ta ɓulu ʋɛlɛʋɛlɛ gila gulɔi ba, ta ɓulu lɛɛvɛ ɠila.
24Ɗa ti kpein pu Aalɔn ta ná-doun zunuiti zeezu, ti ti latɛɠɛ vai ma ʋoogi ɠɛ Ɠɔoɠɔ GALAGI ɠaazu.
25Naa ʋoluma, ɗa ti ɠula niina ti ya, è ti ɠala zalaɠa ɠulazuʋɛ, gala zalaɠai maazu. Toɠa ga zalaɠai, nii abui galazu, makugi nɛai Ɠɔoɠɔ GALAGI ʋɛ.
26Ɗa Aalɔn zei vai ma ʋaala sinɛi ma ɠekegi zeɠe, è datɛɠɛ vai ma ʋoogi ɠɛ Ɠɔoɠɔ GALAGI ɠaazu. Naa ɠa ɠɛ ga ɗɔnɔi.
27Ɗa ti zei vai ma ʋaala sinɛi ma ɠekegi zeɠe ba ta ma ɓalai, niiti ti ɠula ga datɛɠɛ vai ma ʋoogi, ti zeɠe ba Aalɔn ʋɛ ta ná-doun zunuiti.
28Ta ɠɛ ga Aalɔn ta ná-doun zunuiti tɔnɔ, naa ɠa ɠɛ ga ɠɔoɠɔ tɔgi, nii Izelayɛle nuiti ta so, mazɔlɔɔ vebɛanii ɠana seɠeai ba Izelayɛle nuiti ta-yiilɛi zalaɠaiti su. Naa ɠa ɠɛ ga Ɠɔoɠɔ GALAGI nɔnɔ.
29Aalɔn a zaana, ná-zalaɠa ɠula zeɠeiti ta ɠɛ ga ná-doun zunuiti tɔnɔ, ta ti loo ɠɔba, siɛgi zu ti gulɔ ɲadegai ziɛzu la ti ma, ti zei vai zu.
30Ná-doun zunuiti su, nii a ɠɛ potogi zu, zalaɠa ɠula vai zu, naa ɠa too ɠɔba folo lɔfela laawu, siɛgi zu é ɠɛɛzu lɛɛzu la GALA daaɠomi seɠe ʋɛlɛi wu, ga é botii ɠɛ ada ɲadegai.
31Ɗa ti zei vai ma ʋaala sinɛi zeɠe, è ma zuai ɠili ada ɲadegai ta.
32Baala sinɛi ma zuai ta ɓului a ɠɛ kpɔlɔgi zu, Aalɔn ta ná-doun zunuiti ti mi, GALA daaɠomi seɠe ʋɛlɛi laaʋɛ.
33Nii kɛai ga koto gba anii, ta naa mi ɠana, naa ɠa a kɛ ti ve bɛ̀, ta ti ti zei. Nu ɠili nɔpɛ ge la ta mia, mazɔlɔɔ ti ɲadegɛ.
34Ni ti zei vai ma zalaɠa zuai ɓaa ma ɓului ta ɠa yɛna ná eyɛsu sobui, nu la mɔ mia ɲɛgɛlɛin, mazɔlɔɔ ti ɲadegɛ. Nii é yɛsu, ɗa naa ɠala.
35Ɗa ziɛ ga deveiti kpein, gè ti vea è ya Aalɔn ta ná-doun zunuiti ta-vaa zu. Ɗa folo lɔfela ɠɛ ti zei vai zu.
36Folo-o-folo, ɗa nikɛ zinɛ ɠila kula ga zalaɠai koto gba vai zu. Ɗa zalaɠa ɠulazuʋɛ ɲade ga naama ɠoto gba vai, è gulɔi ziɛ ma ga é ɲade.
37Folo lɔfela laawu, ɗa koto gba vaiti kɛ zalaɠa ɠulazuʋɛ, é ɲade, zalaɠa ɠulazuʋɛ wola ɠa ɲade. Nii kpein a vɔɔɠu zalaɠa ɠulazuʋɛ ʋa, naa ɠa ɲade.
38Folo-o-folo, ɗa ɗa kona gila baala sinɛ felegɔ ɠula ga zalaɠai zalaɠa ɠulazuʋɛ.
39Ɗa baala ziʋoi ɠilagi ɠula ga zalaɠai sobui, è zɔɔma ʋaala ziʋoi ɠula ga zalaɠai kpɔkɔi.
40Ɗa baala ziʋo mɔungi ɠula ga zalaɠai, è pɛɛ ɓulu vukɔ ʋagɔi kilo saʋagɔ ʋa, gaayɔgai ga wolive wulɔ ʋagɔi ma litɛlɛ ɠila ta tukpɛ (1,5), naa ʋɛɛ dɔɔi litɛlɛ ɠila ta tukpɛ (1,5) ba.
41Ɗa baala ziʋoi velesiɛi ɠula ga zalaɠai kpɔkɔi, è pɛɛ vebɛani ɠila ba, ta puya zalaɠai, eɠɛʋelei sobu gelei la. Zalaɠai ʋe, nii abui galazu, makugi nɛai Ɠɔoɠɔ GALAGI ʋɛ.
42Toɠa ɠɛ ga gala zalaɠai, wo-mavofodaiti kpein ta ɠɛ kulazu folo-o-folo, gàazu, nɛ̀i gè ga Ɠɔoɠɔ GALAGI, GALA daaɠomi seɠe ʋɛlɛi laaʋɛ, miná ɠa nà ɠɛ ɠulazu ná kɛlɛma wo ʋɛ, gè ɗa ɓɔɛ è ʋɔ.
43Miná ɠa nà ɠɛ ɠulazu ná kɛlɛma Izelayɛle nuiti bɛ, naama adaʋɛ ɠa ɲade ga nà-lɛbiyai.
44Nà GALA daaɠomi seɠe ʋɛlɛi ta zalaɠa ɠulazuʋɛ ɲade. Nà Aalɔn ta ná-doun zunuiti ɲade, ti ɗa nà-zalaɠa ɠula wotii ɠɛ.
45Nà zei Izelayɛle nuiti saama, gè ɠɛ ga ta-ƓALAGI.
46Ta kwɛɛ ga nà ga Ɠɔoɠɔ GALAGI, ta-ƓALAGI, nii é ti ɠulani Ezipete yooi ʋa, nà zei ti zaama. Nà ga Ɠɔoɠɔ GALAGI, ta-ƓALAGI.
