Än Salomon Fos 1

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Ikkei ekewe fos Salomon nöün Tafit we mwän ewe kingen Israel a eäni mwiitun:

²Ren ekei mwiitun aramas repwe tipachem o silei öüröürer, repwe weweiti ekewe kapas mi alolol,

³repwe angei öüröürer seniir pwe repwe mirititi mine repwe föri, repwe eäni pwüng, let o wenechar.

⁴Iwe, mirit epwe tori chokewe mi wewemang, nge silelap me mirit epwe tori ekewe säräfö.

⁵Ekewe chon tipachem repwe rongorong ngeniir pwe repwe fefeitä lon ar sile, nge ekewe chon silelap repwe weweöch,

⁶pwe repwe weweiti ekewe mwiitun me ekewe pworausen awewe, repwe pwal weweiti än ekewe chon tipachem kapas me ar kewe fos monomon.

⁷Ach niuokusiti ewe Samol mi Lapalap iei popun silelap. Nge ekewe chon tiparoch ra oput tipachem me ekewe kapasen öüröür.

⁸Nei kopwe aüselinga än semom kewe kapasen öüröür, nge kosap aleasolap ngeni mine inom a aiti ngonuk.

⁹Ekewe kapas repwe aöchü manauom usun chök epa mwärämwär won mökürom, ika epa mwärämwär fän üom epwe alingöchü inisum.

¹⁰Nei, are ekewe chon tipis ra atupuk, kosap tipeeu ngeniir.

¹¹Are repwe apasa, “Kopwe etikem, ousipwe op lon eu lenien op pwe sipwe niela aramas. Ousipwe rawangauei chokewe esap wor ar mwäl.

¹²Ousipwe oromanauerela usun ewe lenien sotup a oromala aramas pwe repwe usun chokewe mi feitiu lon peias.

¹³Sipwe küna chomong sokopaten pisek mi aüchea, sipwe amasoua imwach ren liapach.

¹⁴Kopwe etikem, nge sipwe inetöchfengen won mine sa soläni.”

¹⁵Nei, kosap chiechi ngeni ei sokun aramas, kosap etiir lon ar föför.

¹⁶Pun ra pwapwaiti le föri föför mi ngau, ra müttir ngeni nimanauei aramas.

¹⁷A solap om kopwe oletala eu cheew pwe kopwe liapeni eman machang, ngei mi küna.

¹⁸Nge ekei mwän ra chök op lon lenien op pwe repwe püsin atoto feiengau wor, ra rawangauei püsin manauer.

¹⁹Ei epwe fis ngeni chokewe meinisin ra angei ar win ren angangen mwänewüs. Ei sokun win a angeala manauen ätewe mi föri ei sokun föför.

²⁰Tipachem a osomong le kökkö lon ewe al, a alapatä mwelian lon ekewe lenien amwicheich,

²¹a köwu seni lepwokukun ekewe al, a kapas seni lon ekewe asamalapen ewe telinimw,

²²“Ämi chon wewemang, ifa ükükün fansoun ämi oupwe efich le nonom lon ämi wewemang? Ämi chon turunufas, ifa ükükün fansoun ämi oupwe pwapwaiti ämi turunufas? Ämi chon tiparoch, ifa ükükün fansoun ämi oupwe oput silelap?

²³Are oupwe aüselinga ai kewe kapasen fön, ngang üpwe pwärätä ngenikemi ai ekiek, üpwe asile ngenikemi ai kewe kapas.

²⁴Üa fen körikemi, nge ousap mochen aüseling, üa äkänipökemi, nge ousap afäli.

²⁵Oua asarongorong ngeni ai kewe kapasen öüröür meinisin, nge ousap ekieki ai kewe kapasen fön.

²⁶Iei mine üpwe takirikemi, lupwen oupwe tolong lon feiengau. Üpwe takirin ämängauakemi, lupwen niuokus watte epwe torikemi,

²⁷lupwen niuokus watte epwe torikemi usun eu mölümöl, nge ämi feiengau epwe torikemi usun eu ewiniär, lupwen oupwe tolong lon weires me riaföü.

²⁸Mürin, oupwe kökköriei, nge ngang üsap pälüenikemi, oupwe tiliken le küttaei, nge ousap künaei.

²⁹Pokiten oua oput silelap, nge ousap mochen aleasochisi ewe Samol mi Lapalap,

³⁰ousap pwal mochen angei ai kewe kapasen öüröür, nge oua oput ai kewe kapasen fön meinisin,

³¹iei mine oupwe kini uän ämi föför, oupwe notä ren mine oua püsin ekiekietä.

³²Pun ekewe chon wewemang repwe mäla ren ar kul seniei, nge ekewe chon tiparoch repwe feiengau ren püsin ar tümwününgau.

³³Nge eman mi aüselingaei epwe manau fän kinamwe, esap öürek, esap pwal niueiti och feiengau.”