1Pwal ikkei ekoch mwiitun seni Salomon, ekewe chon angang nöün Hiskia ewe kingen Juta ra apirü.
2Iei iteüöchün Kot pwe a amonala mettoch, nge iteüöchün ekewe king pwe ra küttaöchü ar repwe weweiti mettoch.
3Sisap tongeni silei tekian ekewe läng me alololun fanüfan, iei usun sisap pwal tongeni silei ekiekin letipen ewe king.
4Kopwe limeti ewe limengau seni ewe silifer, mürin epwe wor mine ewe chon föri pisek seni silifer epwe aea le föri eu sepi.
5Kopwe asüela ekewe aramasangau seni fän mesen ewe king, mürin mwün epwe nüküchar fän pwüng.
6Kosap püsin atekiokotä fän mesen ewe king ika tolong lon lenien ekewe mi lap.
7Pun a mürina än eman epwe ürenuk, “Kopwe mot pekitä,” lap seni än eman epwe amotok fan me fän mesen eman aramas tekia.
8Kosap müttir uwalong lon kapwüng mine mesom a küna. Pun met kopwe föri lesopolan, lupwen chon arum a pwärätä pwe ka mwäl.
9Kopwe aför ngeni püsin chon arum won osukosuken lefilemi, nge kosap pwärawu mine a monomon ren eman.
10Pun are ka pwärawu, om säw me itengau esap müchüla, lupwen aramas ra rongorong pwe ka pwärawu mine a monomon.
11Eu kapas eman a apasa lon fansoun fich a usun chök ekewe föün ringo mi oleol usun kolt mi nom lon eu sepi seni silifer.
12Eu kapasen fön seni eman mi mirit ngeni eman mi mochen aüselinga a usun chök efoch ring seni kolt ika usun eu fout seni kolt mi fokun mürina.
13Eman chon künö mi allükülük a akinamwei ätewe mi tini, usun chök koluk mi patapat a akinamwei eman, lupwen a pwichikar lon fansoun kinikin.
14Eman mwän mi pwon pwe epwe fangala och, nge esap föri, a usun chök kuchu me asepwäl, nge esap pwüng üt.
15Eman samol a tongeni tup ren än eman mi tipepos kapas, nge kapas pwetete ra tongeni ataela än eman ü ngenikich.
16Are ka küna chönün chunen, kopwe chök ün ükükün mine a tufich ngonuk, pun are ka kon mötüla ren, kopwe musäsinawu.
17Kosap feila fän chomong lon imwen chon arum, pwe esap osukosuk reöm o oputok.
18Eman aramas mi eäni kapas chofana usun chon arun a usun chök efoch nifötüföt, ika efoch ketilas, ika efoch föün esefich mi ken.
19Ach apilükülükü eman aramas, esap allükülük lon fansoun osukosuk, a usun chök efoch ngi man ra eni, ika efoch peche mi ter.
20Eman aramas mi köl ngeni eman mi weires letipan a usun chök eman mi angei seni üfan lon fansoun patapat, pwal usun eman mi uwalong salt lon eu kinas.
21Are chon oputom a echik, kopwe amongöü, nge are a kaka, kopwe aünü,
22pun are ka föri iei usun, säw epwe küri usun ekkei a kürikich, nge ewe Samol mi Lapalap epwe ngonuk liwinin.
23Usun asepwälin efeng a atoto üt, ina usun luapas a atoto wowongau.
24Än eman nom lepwokukun ungen eu imw a mürina seni an epwe nom lon eu imw ren eman fefin mi lalapat.
25Eu pworaus mi mürina seni eu fanü toau a usun chök koluk mi patapat ngeni eman mi kaka.
26Eman chon pwüng mi tipeeu ngeni eman aramasangau a usun chök eu chönüttu mi pwakak lon, ika eu puächen koluk mi limengau.
27Esap öch om kopwe ünümi chomong chönün chunen, esap pwal öch om kopwe püsin kütta watten iteüöchum.
28Eman aramas esap tongeni püsin nemeni letipan a usun chök eu telinimw mi tala esap wor tittin.
