Än Salomon Fos 4

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Ämi nei kana, oupwe aüselinga än semelapemi kapasen öüröür, oupwe aü selingemi pwe oupwe weweöch.

²Pun üa ngenikemi kapasen öüröür mi mürina: Iei mine ousap likitala mine üa aiti ngenikemi.

³Lupwen üa chüen eman kükün ät, ngang nöün semei me inei aleman,

⁴semei we a soun aiti ngeniei ekei kapas o üreniei, “Kopwe amwöchü ai kewe kapas lon lelukom, kopwe aleasochis ngeni ai kewe allük pwe kopwe manau.

⁵Kopwe kütta tipachem me silelap. Kosap manlükala ai kewe kapas, kosap pwal tok seniir.

⁶Kosap likitala tipachem, pun epwe tümwünuk. Kopwe echeni pwe epwe mamasok.

⁷Kopwe tiliken le kütta tipachem, pun iei ewe aeuin ipw kopwe angei tipachem ren. Nge ren om tipachem kopwe alapala om mirit me weweöch.

⁸Kopwe fokun aücheani tipachem, pwe i epwe atekiokotä, kopwe kamwöchünük won, pwe i epwe aitöchuk.

⁹Tipachem epwe usun chök epa mwärämwär mi ling won mökürom, epwe föri pwe kopwe mwärini epa mwärin king mi fokun mürina.”

¹⁰Nei, kopwe aüselingaei o etiwa ai kewe kapas, pwe ierin manauom repwe chomongola.

¹¹Üa aiti ngonuk ewe alen tipachem, üa emwenuk won ewe lenien fetal mi wenechar.

¹²Lupwen kopwe fetal, esap wor epetin ipwom, nge are kopwe sä, kosap chepetek.

¹³Kopwe kamwöchünük won ekewe kapasen öüröür, nge kosap mwüt ngeniir repwe feil senuk. Kopwe tümwünüür, pun ina manauom.

¹⁴Kosap feila lon ewe leni ia ekewe aramasangau ra feila ie, kosap pwal apirü än ekewe chon föföringau föför.

¹⁵Kosap föri mine a ngau, nge kopwe sü seni. Kopwe chök fetal won ewe al mi pwüng.

¹⁶Pun ekewe aramasangau resap tongeni annut ika resap föri mine a ngau, ra chök nennela ika resap likatupu eman.

¹⁷Pun föföringau a usun chök ener mongö, nge angangen mwänewüs a usun chök ünümer wain.

¹⁸Ewe al ekewe chon pwüng ra fetal won a usun chök saramen ünümweerän mi chök sasaramala tori a unusen ränila.

¹⁹Nge ewe al ekewe aramasangau ra fetal won a usun chök rochopwak mi rochokich, ra turula, nge resap silei met ra chepetek ren.

²⁰Nei, kopwe fokun aüselinga ai kewe kapas. Kopwe aü selingom ngeni mine üa ürenuk.

²¹Kosap mwüt ngeni ekewe kapas repwe sü senuk, nge kopwe amwöchüür lon lelukom.

²²Pun ina mine chokewe mi angei ekewe kapas repwe manau rer, inisir epwe pöchökül rer.

²³Kopwe fokun tümwünü lelukom lap seni om tümwünü och pisek aüchea, pun manau a pop seni lon lelukom.

²⁴Kosap fokun eäni kapas rikirik, kosap pwal eäni kapas chofana me fos mi pwor.

²⁵Mesom epwe newenewenela, kopwe chök nefotofotola mwom.

²⁶Kopwe akotöchü mine kopwe föri, mürin epwe fisiöch meinisin mine kopwe föri.

²⁷Kopwe fetal wenewen won ewe al mi pwüng, nge kosap rik ngeni pelifich ika pelimöng, kosap pwal föri mine a ngau.