Än Salomon Fos 5

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Nei, kopwe fokun aüselinga ai tipachem, kopwe aü selingom ngeni ai kapasen öüröür,

²pwe kopwe eäni mirit, nge om kapas repwe pwärätä pwe a wor om silelap.

³Pun än eman fin lisowu fos a arar usun chönün chunen, kapasen awan a pwal motoutou usun noppuk,

⁴nge sopolan a kipwin usun chök kipwinin ewe irä maras, a pwal wor ekinasean usun chök ekinasaen efoch ketilas mi seisei me ruepek.

⁵Ewe al neminewe a fetal won a ale ngeni mäla, epwe emwenukela ngeni ewe lenien sotup.

⁶Esap fetal won ewe al mi ale ngeni manau, pwe a rik seni, nge esap mefi.

⁷Nge iei nei, kopwe aüselingaei, kosap fokun manlükala mine üa ürenuk.

⁸Kopwe sü seni ena sokun fefin, kosap pwal kan ngeni asamen imwan.

⁹Are kosap aüselingaei, om iteüöch epwe pöüt senuk, nge epwe tori pwal ekoch aramas, pwal manauom epwe tolong lepöün chokewe resap eäni tong,

¹⁰ekewe chon ekis repwe angei woum, nge uän om angang epwe pwal tori ekoch.

¹¹Iwe, lesopolan manauom kopwe ngüngü, lupwen fitukom me inisum ra telila.

¹²Mürin kopwe apasa, “Pwota üa oput ekewe kapasen fön? Pwota üa tipeweires ngeni ekewe kapasen emirit?

¹³Üsap aüselinga alon nei kewe sense, üsap pwal aü selingei ngeni chokewe mi öüröüraei.

¹⁴Üa arapakan ngeni ai üpwe unusen feiengau me fän mesen ewe mwichen aramas.”

¹⁵Kopwe allükülük won püsin pwülüom, kopwe chök echeni i.

¹⁶Kosap angei om feiöch seni noum me won pwal ekoch fefin.

¹⁷Püsin noum kewe repwe mämäritä o alisuk, nge sap chon ekis.

¹⁸Kopwe pwapwaiti pwülüom o meseikeiti ewe föpwül ka pwülüeni lupwen om alüal,

¹⁹neminewe mi liöch usun chök liöchün urupap, a mürina usun ewe machang itan witiwit. Kopwe mwüt ngeni pwe an tong ngonuk epwe fokun apwapwok fansoun meinisin, kopwe chengel ren an tong iteiten fansoun.

²⁰Nei, pwota kopwe aumwesukela won pwülüen pwal eman mwän? Pwota kopwe romi eman fin ekis?

²¹Ewe Samol mi Lapalap a küna om föför meinisin, a nenengeni ia ka feila ie.

²²Än ewe aramasangau föföringau ra püsin likatupu i, a oo lon püsin an tipis.

²³Epwe mäla pokiten esap mochen aleasochisi kapasen emirit, epwe pöütmälila pokiten watten an umwes.