1Sa tie sapu lopu hoke baere si hata ia mo sa sapu leana koasa telena, meke lopu va egoi sa sari doduru binalabala leadi.
2Na tie duviduvili si lopu galagala ni sari ginilagilana, tale nana binalabala mo si okoro hiva tozi sa.
3Pana kamo sa kinaleana si kamo tugo sa kinurekure, meke koasa kinurekure si kamo sapu tava sisirei.
4Sari zinama pa ṉuzuna sa tie gilae si guana lamana peava, ba sa bukahana sa ginilagilana si guana tototolo.
5Lopu leana pude va kalekale la koasa tie kaleana babe ponia vinilasa seana sa tie toṉotona.
6Na beru tanisa tie duviduvili si va kamo pule nia tinasuna sa, meke sa ṉuzuna si ta seke nia sa.
7Sa ṉuzuna sa tie pekipeki va kamoa sa nana tinahuara, meke sa beruna sa si na sipata tanisa.
8Sari zinama nanae si guana ginani lomosodi, ta onolo gore kamo la pa korapa tinina sa tie.
9Asa pu malohoro pa nana tinavete si na tasina sa tie huhuara.
10Sa pozana e Zihova si na vetu ululuna na ṉiṉirana, saripu toṉoto si haqala la vasina pude tome koari kana.
11Sa tie tagotago si hiva ta harupu koari nana tinagotago; balabala guni nia sa na goba sapu lopu boka ta haele.
12Sipu lopu ele hoqa sa si vahesi pule nia pa bulona, ba vina pepekae si kekenu meke tiqe sa vina lavata.
13Pude olaṉa va kenue sipu lopu ele va avoso si na dinuviduvili meke variva kurekure.
14Sa maqomaqona sa tie si toka nia si asa totoso moho, ba esei kote boka ia sa maqomaqo sapu malohoro gore?
15Sa bulona sa tie balabala valeana si kote vagi vina tumatumae; sari taliṉana sa tie gilaena si hata vura nia sa ginilagilana.
16Na vinariponi tukelia sa siraṉa tanisa tie variponi, meke turaṉa la nia si asa pa kenudi ri na tie nomadi.
17Sa tie kekenu pude zama nia sa ginugua si doṉo guana toṉotona, osolae kamo tu si keke pule meke nananasia si asa.
18Na mudumudukeda boka va nosoa sa vinari tokei, meke vari seu ni sari karua kalina.
19Na tasimu koreo sapu bugorona si kote korona variva ta leosae guana vasileana ta gobana, meke na vinari tokei si guana sasada sapu ta roto tukuna.
20Sari vua pa ṉuzuna sa tie si va deṉana sa tiana, saripu paketi sa beruna si leana ni sa.
21Sa mea si koa ia ṉiniraṉira pude ponia sa tinoa meke minate, meke arini pu kopu nia si kote hena ia sa vuana.
22Asa pu dogoro vagia sa nana barikaleqe si vagia si keke ginugua arilaena, meke vagia tugo sa sa minana te Zihova.
23Na tie malaṉa si tepa ia sa tataru, ba sa tie tagotago si olaṉa va bubugorae.
24Koa dia kaiqa baere sapu baere kokoha, ba koa dia kaiqa baere sapu koa kapae sisigiti hola nia sa tasimu.
