Zinama Tumatumae 15

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

¹Na inolaṉa va mamamana si va noso binugoro, ba sa zinama vari sigiti si variva bugoro.

²Pa mea tanisa tie gilae si avoso lea sa tinumatumae, ba totolo vura pa ṉuzu tanisa tie pekipeki si na zinama loke laedi.

³Sari matana e Zihova si pa doduru vasina, dogori Nana sari tie kaleadi meke leanadi.

⁴Sa mea sapu va kamo sinalaṉa si na huda tinoa, ba sa mea sapu sekesekei si va mate maqomaqo.

⁵Na duviduvili si asa pu etulia sa tinarae tanisa tamana, ba asa pu va egoi sari na ginegese si kote gilae.

⁶Sa vetu tanisa tie toṉoto si koa ia na tinagotago ari laedi, ba sari tinago tadi tie kaleadi si va kamo tinasuna.

⁷Sari na beru tadi na tie gilae si va enea sa tinumatumae, ba sari na bulo tadi na tie pekipeki si loketoṉa boka vari poni nia.

⁸Zihova lopu qetu hokara ni sari vinukivukihi tadi tie kaleadi, ba sa vinaravara tanisa tie ṉoṉo si qetu nia Sa.

⁹Zihova kana i sari hahanana tadi tie kaleadi, ba tataru ni Sa saripu lulia sa tinoṉoto.

¹⁰Na zinama ṉiṉirana si kote ta vala koasa tie pu taluarae koasa tinoṉoto, asa pu hako ta gegese si kote mate.

¹¹Minate meke sa popoa tadi na tie matedi si lopu paere koe Zihova, ke sari doduru bulo tie si dogoro betoi mo Sa.

¹²Na tie va karikari si lopu hiva nia sa ginegese, lopu kote tata la i rini sari tie giligilana.

¹³Pude qetuqetu sa bulo si komolo sa isumata, ba sa bulo ta sigitina si va mate maqomaqo.

¹⁴Sa bulo sapu dodogorae si hata tinumatumae, ba sa ṉuzu tanisa duviduvili si henai sari zinama pekipeki.

¹⁵Sari doduru rane tadi pu malaṉa si voriti pude boka, ba sa bulo sapu qetuqetu si inevaṉa lamo.

¹⁶Leana be tago vasina hite pa korapa pinamaṉana e Zihova, hola nia sa tinagotago sapu koa ia kinolura.

¹⁷Leana sa hena neka pa vasina koa ia tataru, hola nia sa inevaṉa bulumakao pa korapa vinari kanai.

¹⁸Na tie bubugoro haru si va gevugevuru vinari zamai, ba sa tie nosona si va bule vinari tokei.

¹⁹Sa siraṉa tanisa tie hakohako si tukua na hiqohiqo rakihi, ba sa tie ṉoṉo si ene pa siraṉa kalalasana.

²⁰Na koburu gilaena si na qinetuqetu tanisa tamana, ba sa tie pekipeki si hakohako nia sa tinana.

²¹Na pinekipeki si na qinetuqetu tanisa tie pu lopu tumae balabala, ba sa tie gilagilana si kopu nia sa siraṉa toṉotona,

²²Sari hiniva si lopu gorevura sina loke vinari tokae pa binalabala, ba pana soku tie si roverove vari tokae si kote leana mo.

²³Leana pa tie sa olaṉa va gotogoto, na arilaena sa zinama sapu goto pa nana totoso.

²⁴Sa siraṉa enea sa tie gilae si sage la pa tinoa, pude kopu nia meke lopu gore la pa lovu si asa.

²⁵E Zihova huara gore nia sa vetu tanisa tie vahesi pule nia, ba kopu nia Sa sa voloso tanisa nabonaboko.

²⁶E Zihova kana hola i sari binalabala tadi tie kaleadi, ba sarini pu via bulodi si qetu ni Sa.

²⁷Na tie puhi si va kamo tinasuna koari nana tatamana, ba asa pu kana ia sa tabara golomo si kote toa.

²⁸Sa bulona sa tie toṉoto si hoke balabala paki meke tiqe olaṉa, ba sa meana sa tie kaleana si totolo vura ia na zinama hoboro.

²⁹E Zihova si seu hola koari tie kaleadi, ba avosi Sa sari vinaravara tadi tie leadi.

³⁰Na dinoṉo sapu komokomolo si na qinetu pa bulo, meke na inavoso leana si masiqara nia sa tini.

³¹Asa pu va avoso koasa ginegese sapu variva toa, si kote koa turaṉi sari na tie gilae.

³²Asa pu korona tava toṉoto si kilua sa nana tinoa, ba asa pu va tabei sari na ginegese si vagi ginilagilana.

³³Sa pinamaṉana e Zihova si va tumatumae nia sa ginilagilana lohina koasa tie, meke na vina pepekae si kekenu, mumudi sa vina lavata.