1Asa pu ta gegese pilipule ba korona va avoso si kote kamo va hodakia na tinahuara sapu loke tinaleosaena.
2Totoso tuqe ṉiniraṉira sari tie toṉoto, si qetu sari tie; totoso kopu binaṉara sari tie kaleadi, si qumiqumi sari tie.
3Sa tie pu tataru nia sa ginilagilana lohina si qetu nia sa tamana; ba sa baere tadi na maqota si va murimuria sa nana poata.
4Pa tinavete toṉoto si va turu va nabu ia sa baṉara sa butubutu, ba sa puhi sapu vagi tinabara golomodi si huara gorena sa.
5Asa pu zama va lomolomosia sa turaṉana si ivara veko pule nia sipata telena.
6Sa tie kaleana si sipata pule nia koari nana sinea, ba sa tie toṉoto si boka kera meke qetuqetu.
7Sa tie toṉoto si hiva tavete va leana la koari pu malaṉa, ba sa tie kaleana si korona galagala.
8Sari tie va karikaridi si va gevuru vinevehe pa vasileana, ba sari tie gilae si va bulea sa ṉinoveoro.
9Be turaṉa la nia sa tie gilaena sa tie pekipeki pa vinaripitui, sa tie pekipeki si kote turu meke zama hoboro meke loketoṉa si boka toṉoto.
10Sari tie va matemate tiedi si kana hola i rini sari tie toṉoto, meke hata ginugua pude va matei sari tie ṉoṉo.
11Sa tie pekipeki si zama vura ni sari nana tinaṉaziri, ba sa tie gilagilana si kopu pule nia meke lopu bugoro.
12Be sa baṉara si va avoso la koari na koha, si sari nana tie tavetave varitokae si na tie kaleadi mo.
13Guahe si vari kekeṉoṉo nia ri tie malaṉa meke ri tie ṉoṉovala, sapu e Zihova va dodogorae i matadi.
14Be pitui sa baṉara sari tie malaṉa pa tinoṉoto, sa nana binaṉara si kote habotu va nabu doduru totoso.
15Sa kolu ginegese si va karovo ginilagilana, ba totoso lopu hoke ta gegese sa koburu si va kurekure ia sa sa tinana.
16Totoso vagi ṉiniraṉira sari tie kaleadi, si gigiri sa sinea, ba sari tie toṉoto si kopu aqa nia sa dia hinoqa.
17Pana tarae nia goi sa tumu, si kote ponigo binule sa; kote va qetua sa sa maqomaqomu.
18Vasina lopu koa sari zinama te Tamasa si luara pania rina tie sa tinarae; ba tamanae si asa pu kopu nia.
19Na zinama moka si lopu kaqu va toṉotia sa nabulu; kote tumae nia nana ba lopu kote va tabe si asa.
20Dogoria goi sa tie sapu lopu balabala paki meke tuturei zama? Na tie pekipeki ba boka tava tumatumae, hola nia sa tie asa.
21Pana ta tatarue va hola sa nabulu podalae hitekena, pa vina betona si kote va talotaṉigo sa.
22Sa tie bubugorona si va gevugevuru vinari zamai, meke sa tie tuturei ta ṉaziri si vata evaṉi soku sinea.
23Sa tie vahesi pule nia si kamo kurekure, ba sa tie tago maqomaqo vina pepekae si tava lavata.
24Sa baere tanisa tie hikohiko si kana pule nia sa nana tinoa soti; pa vinaripitui si lopu boka tozia sa sa hinokara, ba koe Tamasa si ta levei si asa.
25Na pude matagutu nia sa tie si guana sipata, ba asa pu raṉea se Zihova si ta kopue.
26Soku tie si hiva tepatepa tinokae koa sa baṉara, ba koe Zihova mo boka ta vagi sa tinoṉoto.
27Sari tie toṉoto si korodi ni sari tie kokohadi, meke sari tie kaleadi hakohako ni sari tie toṉotodi.
