Yosuwe 2:5-19

⁵Nendisna tɛm ntɛ dec dɛŋkalɛsa pac-kɔ kəgbət kumba ka dare dəkusu mɔ, kɔ arkun aŋɛ ŋawur nnɔ, mba iŋcərɛ fɛ nde ŋaŋkɔsa mɔ. Nəbɛlkər nəcəmɛ ŋa darəŋ, nəŋkɔbəp ŋa!»

⁶Ntɛ tɛnayi mɔ, ɛnapɛnɛ ŋa nde kəlɔ dareŋc, k'ɛmɛŋk ŋa nde sek ya cəŋkɔlma dacɔ, ncɛ ɛnadɛt nde kəlɔ dareŋc mɔ.

⁷Kɔ afum ŋasumpər dɔpɔ da Yurdɛn kəbɛlər ŋa haŋ nde dəkətənta. K'aŋgbət kumba ka dare dəkusu ntɛ afum abɛlər aŋan ŋanawur mɔ.

⁸Ta acikəra atɛn mes ŋantadirɛ-ɛ, kɔ Rahabu ɛmpɛ kəkɔ-bəp ŋa nde kəlɔ dareŋc.

⁹Kɔ wəran nwɛ oloku arkun aŋɛ: «Iŋcərɛ a Kanu Kəpɔŋ kəsɔŋ un atɔf ŋaŋɛ. Pəlɛc pɔkɔ nəfaŋɛ su mɔ pɔsɔtɔ su, ayek-yek ŋɛŋgbəpərnɛ afum fəp, ŋayi kənes' on.

¹⁰Bawo səne a Kanu Kəpɔŋ kənawosər' on domun da Kəba ka Cəŋkɔlma ntɛ nəŋc-wur Misira mɔ. Səne sɔ tɔkɔ nənadif abɛ a Amɔr mɛrəŋ aŋɛ ŋanayi kəŋgbɔkɔ ka Yurdɛn kəsək ntende dec dɛmpɛ mɔ: Sihɔŋ kɔ Oku.

¹¹Səne ti, itɔ mim mowurɛ su, kɔ nwɛ o nwɛ eŋgbiŋ kifir nnɔ nəyi mɔ, bawo Kanu Kəpɔŋ, Kanu konu, kəyɔnɛ Kanu ka dareŋc, kɔ dəntɔf.

¹²Ndɛkəl oŋ, nədɛrm' em nnɔ Kanu Kəpɔŋ kəyi mɔ, a məndelasɛ afum a kəlɔ kem layidi pəmɔ dɔkɔ iyɔn' on mɔ. Mədɛrm' em

¹³a nəndesak iya kem, papa kem, awɛŋc im aŋa arkun, aran, kɔ afum alpəs aŋɛ ŋayɔnɛ akəŋan mɔ fəp. Nəsak su səmulpər defi, nəfɔdedif su.»

¹⁴Kɔ arkun aŋɛ ŋaloku wəran nwɛ: «Səwosɛ kəfinɛ tetam, mba ta mədeloku afum tɔkɔtɛnɛ tosu de! Kɔ Kanu Kəpɔŋ kəndesɔŋ su atɔf-ɛ, səndebɔt mera səlasɛnɛ sɔ layidi nnɔ məyi mɔ.»

¹⁵K'ɔsɔŋ ŋa kəbənda kɔ ŋantorɛnɛ ki nde dəwundɛr, bawo kəlɔ kɔn kənayi disrɛ kəgbəcɛnɛ kɔ damba da saŋka sa dare.

¹⁶Kɔ wəran nwɛ oloku ŋa: «Nəkɔ ta dəmɔrɔ kɔ pəyi fɛ ti-ɛ, nəmbəpɛnɛ kɔ abɛlər anu. Nəgbɔpnɛ dəndo haŋ mata maas, tɛntəŋnɛ abɛlər anu ŋalukus, a nəna nədesumpər dɔpɔ donu kəkɔ!»

¹⁷Kɔ arkun aŋɛ ŋaloku kɔ: «Ntɛ tendesɔŋɛ su kəlas kədɛrəm nkɛ məsɔŋɛ su kədɛrm' am mɔ:

¹⁸Awa, məcəŋkəl im! Tɛm ntɛ səndebɛrɛ dare mɔ, mɛnɛ məkotər tafəc peyim nde wundɛr wɔkɔ mənatorɛnɛ su mɔ. Məcəmbərərnɛ iya wəkam, papa wəkam, awɛŋc'əm aŋa arkun aran, afum am fəp nde kəlɔ kam.

¹⁹Nwɛ o nwɛ ɛŋcali kusuŋka kaŋkɔ a pəwur mɔ, ɛsarɛ teta mecir mɔn ndena Kanu Kəpɔŋ, mba kaŋkɔ pagbuŋɛnɛ wəkin nu dacɔ-ɛ, səsarɛ teta mecir ma wəkayi!