Text copied!
CopyCompare
Kitabu ka Kanu - Yosuwe

Yosuwe 16

Help us?
Click on verse(s) to share them!
1Ntɔf nyɛ anasɔŋ aka kusuŋka ka Isifu mɔ yɛnayɔnɛ, ntɛ aŋkot yampuŋ-puŋ mɔ, kəyɛfɛ ka Yurdɛn nde Yeriko kəsək kəca ka ntende domun da Yeriko ntende dec dɛmpɛ mɔ, kəcepər ka dətɛgbɛrɛ kəpɛrnɛ ka Yeriko kəkɔ ka nde dəmɔrɔ ma Betel.
2Ki kəcepər Betel kɔ Lus, kəkɔ kəcepər kəca ka kələŋcər ka aka Arki nde Atarot,
3kətor ntende dec dɛŋkalɛ mɔ, kəca ka kələŋcər ka aYafəlet haŋ nde antɔf ŋa Bɛt-Horon-Tantɔf, haŋ Keser kəkɔ-futər nde dəkəba.
4Kɛ kaŋkɔ cusuŋka ca Efrayim kɔ Manase awut a Isifu ŋanasɔtɔ.
5Antɔf ŋa aka Efrayim ŋɔ ŋaŋɛ dəcor cor: Kələŋcər kɔ kɛ kəŋan kənayɔnɛ ntende dec dɛmpɛ mɔ, Atarot-Adar haŋ Bɛt-Horon Takəroŋ.
6Kələŋcər kənabəp Kəba Kəpɔŋ ntende dec dɛŋkalɛ mɔ, kəca ka Mikəmetat ntende kəca kəmeriya. Kəkafələr ntende dec dɛmpɛ mɔ, kəca ka Tahanat-Silo, kəcali ntende dec dɛmpɛ mɔ, kəca ka Yanoha.
7Kɔ kəyɛfɛ Yanoha, kɔ kəntor Atarot kɔ Nahara, kɔ kəŋkɔ kəsəŋkələr Yeriko, kɔ kəŋkɔ kənarnɛ Yurdɛn.
8Kəyɛfɛ Tapuwa , kɔ kələŋcər kəŋkɔ kəca nkɛ dec dɛŋkalɛ mɔ, ntende kəŋgbɔkɔ ka Kana kəkɔ-narnɛ nde dəkəba. Kɛ kaŋkɔ kɔ kusuŋka ka Efrayim ŋanasɔtɔ dəcor dəcor,
9kəlɛkɛnɛ ka sədare nsɛ anacəmbərɛ aka Efrayim nde antɔf ŋa kɛ ka Manase mɔ, kəlɛkɛnɛ sədare səfɛt sa si.
10Ŋa sɔ ŋanabaŋər fɛ aKanahan aŋɛ ŋandɛ Keser mɔ, aKanahan ŋandɛ afum a Efrayim dacɔ haŋ mɔkɔ, mba ŋayi acar aŋɛ ŋambəcɛ afum a Efrayim mɔ dacɔ.