Josua 2:5-19

⁵Me mwen än ewe asamalap epwe kapüng lepwin, ekewe mwän ra towu. Üsap silei ia ra feila ie. Oupwe müttir tapweriir, pun oua chüen tongeni liapeniir.”

⁶Nge ewe fefin a fen emwenätä ekewe mwän won ewe imw o aopeer fän fetilipwas seni ewe irä itan fläks, neminewe a atettelöchü me mwan won ewe imw.

⁷Iei mine nöün ewe king kewe chon künö ra tapwerirela won ewe al ngeni ewe chanpupu Jortan tori ekewe aropetepeetin ewe chanpupu. Nge lon ewe chök otun ekewe chon tap ra towu, ewe asamalap a kapüng.

⁸Iwe, me mwen än ekewe mwän konola, ewe fefin a feitä rer won ewe imw

⁹o üreniir, “Üa silei pwe ewe Samol mi Lapalap a ngenikemi ei fanü. Iwe, äm aia niuokusitikemi, nge chon ewe fanü meinisin ra rükö pokitemi.

¹⁰Pun aia rong usun ewe Samol mi Lapalap a apwasatä lölön ewe Setipar me mwemi, lupwen oua towu seni Isip. Aia pwal rong usun ämi niela ekewe ruoman kingen chon Amor iter Sihon me Ok ra nom ötiuen ewe chanpupu Jortan.

¹¹Iwe, lupwen äm aia rongorong ei pworaus, lelukem a kisikisila, nge esap chüen wor tipepwora ren eman aramas pokitemi. Pun ewe Samol mi Lapalap ämi Kot, i ewe Kot mi nom won läng pwal won fanüfan.

¹²Iei oupwe pwon ngeniei fän akapel fän iten ewe Samol mi Lapalap, pwe oupwe kirikiröch ngeni chon leimwen semei usun üa kirikiröch ngenikemi. Iwe, oupwe ngeniei eu asisil mi let

¹³o pwon ngeniei pwe oupwe amanaua semei me inei, mongeei me pwii me aramaser meinisin. Iwe, oupwe angasakem seni mäla.”

¹⁴Nge ekewe mwän ra üreni, “Manauem akasiwilin manauemi. Are ousap akafat äm ei angang, äm aipwe kirikiröch o allükülük ngenikemi, lupwen ewe Samol mi Lapalap epwe ngenikem ei fanü.”

¹⁵Mürin, ewe fefin a aürüretiu won efoch säl me lon asammwachon imwan, pun imwan a kaütä won tittin ewe telinimw.

¹⁶Iwe, a üreni ekewe mwän, “Oupwe feila won ekewe chukuchukutä pwe ekewe chon tap resap churikemi. Oupwe op ikenan lon ükükün ülüngat rän, tori ekewe chon tap repwe liwin. Mürin oupwap feila.”

¹⁷Nge ekewe mwän ra üreni, “Äm aipwe apwönüetä ewe pwon en ka üra sipwe pwonfengen won fän akapel. Nge en kopwe föri iei usun:

¹⁸Lupwen aipwe tolong lon ewe fanü, kopwe rietä ei säl mi par won ewe asammwacho ka aürükeemitiu me lon. Kopwe pwal emwichato lon imwom semom me inom, mongeom me chon leimwen semom meinisin.

¹⁹Are eman epwe towu seni imwom o nom won al, chan epwe ukun chök, nge äm aisap tipis. Nge are eman a angeetä won eman lein chokewe mi nom lon imwom, chan epwe ukem chök.