Josua 2:5-19

⁵Te be pio ebode, te bidi dabego te hanu tomoba asobo genuai sunumi palibo sogo, augwali ede bidali ma tagalali. Augwali menaba pali, eno konebe, augwaligo enabolo me wabeo. Tiali goli, dagego augwali wali polo pobaso da, teda dagego augwali gegebo usu yaibao,” te po wai.

⁶Mu tamao, Rahapgo te po wali, tiali goli hasia bolo agai augwali si te aga bidigi beba ugwaba odasa holama, tama agai augwali si te aga te name ugwa nigibo nosai dabe dunama muani, te dologoba geme dualai dao.

⁷Tialima, megi da, te tuni bidigo bage augwaligo te hanu tagalama, tama augwali te sa asali bidi si gegegi peyu pai. Augwaligo gege pali pidubadi genama, te wę Jordan bolabo madi me deliba pabo sunumidu pai. Nosali augwaligo te hanu taga soai madi, te sunumi tonalubo bidi dabego te hanu tomoba pabo genuai sunumi paliali.

⁸Te Israel bidi si godege pisąbadi, tama Rahap te be ugwaba holama,

⁹tama augwali sibolo te po wai, “Eno koneani, Genuai Bidigo e genuai tǫ te dage Israel dabego nogoba mawainogo ebao. Tama eno po dolo mu dage sibolo obao. Da tigidali dagede wi elama, tama da didibili dwai mu ebo.

¹⁰Magi baso meni, dagego te Isip tǫ taga soali sogo te Genuai Bidigo te Nosai Elaluali Tamu Ąį wai ilali po augwaligo dabolo te po pusai. Tama dago odali, dagego te Amor dabego gavman tuni bidi Sihon de Ok si me, te augwali sigo ami bidi dabe dali, te wę Jordan u badu ela silali po dago odai dao.

¹¹Dago te po odolama, tama da dagede wi mu ebao. Tama megi, da tigidali bomo menio. Magi baso meni, God, dagego Genuai Bidi, aga te dagalu de tǫ sigo God dao.

¹²Tialima, megi da, dage sigo te Genuai Bidigo gedude te dage sigo eno hani bage bugagia tonaluabo po dąų walao, magi baso meni, te eno dage si bugagia tonaluali tiwai gilama yao. Tama dage sigo duga si dąų wali po mu dąų walobo dąį me dedeli enabolo mao.

¹³Tama mayu, dage Israel dabego te eno aya ida badi, te ama, me abe, me te augwa hani bage tigidali munu me ela munamuo! Dage sigo te bidi dabe augwaligo da elemainu sula tagalu munu me tilamu dao!” te we Rahapgo te po wali.

¹⁴Tialima, te bidi sigo po wei ponoyu, te po wai, “Da sigo po nagebolo dąų mu obao. Tama da sigo te dąų wali po togobaso da, te Godigo da si dolomainu yaibao. Te nago da sigo yali sę po dabe hanilisiąbaso da, teda da sigo te dąų wali po munu me togosiąyu, te nage dali, nago hani bage dali tau saibao, te Genuai Bidigo te genuai tǫ dabolo mabo sogo te tama tiaibao,” te po wai.

¹⁵Te penani we Rahapgo be te moni hanu bagulali obo dali kisilai elaluai, tama me badu dąį togwali badu te be pola sali windo dedage te obo ugwadu elaluai. Tama Rahapgo te bono baklain te windode kęnama, tama baklain te masigigo nigali bobobage obo bulu badu manama, te bidi sigo te bonodu nogo toda duluyu, aiyaba dulama, te hanu buluba dįą pomainu tama tiai dao.

¹⁶Tama augwali si tama painu ebadi, tama Rahapgo te po wai, “Dage si te bulu duba geme duala sigi pelama, sela sogo bidao. Tiyu, tuni bidigo bidi dabego dage si gegelama, suabuo. Nosali augwali te Jeriko hanuba ma soai digi, teda duga si buluba ma pao,” wali.

¹⁷Tama te bidi sigo Rahapbolo te po wai, “Te da sigo nagebolo te yao wabo sę tigidali ela silibaso da, teda da sigo megi nagebolo e dąų wabo po munu me togogobeo.

¹⁸Tialima, megi nago bugagia odao! Te da Israel dabe e buluba sabalobo sogode, nago te mama yai bono kęnao, megi da si aiyaba e dulubo windode, te da sigo nagebolo e mabo mama yai bono kęnao. Tama nago naga aya ida, me te ama dede dabe, me te naga hani bage tigidali selama, tama augwali nago beba naga sisinao.

¹⁹Te me deli te bede bidali tagalama, te hanuba pabo sunumidu pobadi, tama augwali ela muani da, teda aga digi te dolabo page yali dao. Te da sigo sę menio. Tiali goli, me deli te be tomode bidibadi dolobaso da, teda te sę yali page da side elaluaibao.