Zozuwe 2:5-19

⁵Siɠi daaʋɛ laaɠulu ziɛgi zu, fitilimaʋɛ, ma zunuiti ti ɠulani, ti li, gè la kwɛɛ, ʋɛ ti liai ná. À suvilɛ, wo ʋilɛ ti ʋolu, wa ti ɠɔɠɔzumɛɛnsu.»

⁶Tɔun é ti lɛɛni pɛlɛ ɠɔmaʋɛ dooɠo bosuʋɛ, é ti lɔɔɠu geze ɓaku ziɠigi wu, nii é kɛʋele ɓɛtɛni ɓɔɠɔ ʋɛ ná-pɛlɛ ɠɔmaʋɛ.

⁷Masagi ná-keelaiti ti ʋilɛni ti ʋolu pelei naa zu, nii é liizu Zuludɛn maaleʋesu ʋelei. Ti ɠulani nɔ taai ʋa feya, ti siɠigi laaɠulu ti ʋolu ʋelei.

⁸Laɠaɓe lɛɛni pɛlɛ ɠɔmaʋɛ dooɠo bosuʋɛ, é ma wɛɛinti ka, aisa ti ʋa la.

⁹É ɠɛni ti ma: «Gè kwɛɛni ga Ɠɔoɠɔ GALAGI niima yooi veeʋɛ wo ʋɛ, dualuagi gi zoga, ʋɛ yɔɠɔzuʋɛ nuɓusɛiti kpein sasu ɠa ɓalizu wo luɠɔ.

¹⁰Mazɔlɔɔ gi mɛnini ga Ɠɔoɠɔ GALAGI Seeli Kpoloɗɛi vɔɔni su wo luɠɔ, siɛgi zu wo ɠulani la Ezipete yooi ʋa. Gi naa mɛnini, ʋelei wo Amɔɔl nuiti ta-masa felegɔiti soni da, Siɠon ta Wɔge, ti ɠɛni masadai ɠɛɛzu Zuludɛn ʋolu ʋelei, folo ɠulazu ʋelei, wo ti zuwuɠaaleʋe ta ta-nuɓusɛiti, wo ta-yooi ɠoloɠolo.

¹¹Gi naama vaiti mɛnigai ma, gi iɲɔ ge leʋea. Nu nɔpɛ zii la lɔa, é ʋa lo wo luɠɔ. Tɔɔzei Ɠɔoɠɔ GALAGI wa-ƓALAGI ɠa é ga GALA, geeɠɔlɔgi zu ta zooi ma.

¹²Niizu, à ɠonana bɛ̀, Ɠɔoɠɔ GALAGI laaseigi zu, ga faanɛɛi gè kɛai wo ʋɛ, wa buuɠwɛɛ, wa ɓalaagi wo faanɛɛ ɠɛ nà-pɛlɛyeɠei ʋɛ. À poogi ta ve zèa, nii nà la da.

¹³À minazeɠe bɛ̀ ga wa kɛ̀ɛ yɛ vulua, ta dèe, ta kɛ̀ɛ ná-dointi, ta tɔnɔiti kpein, wo la vaa bu, gi ʋa za.»

¹⁴Zunui niiti ti ɠɛni ma: «Ni nɔ wo la gi maalɔɔni, gi ɠonaa gi-yɛnvui ma, gá ɠɛ ga wooɠɛɠila nu gá-minazeɠegi zu, gá ɠɛ ga faanɛɛ wuuɠwɛɛ nu è ʋɛ, siɛgi zu Ɠɔoɠɔ GALAGI zooi veezu la gi ʋɛ.»

¹⁵Laɠaɓe ná-pɛlɛi ɠɛni loni taai ma ziɠigi ʋa, siɠigi ɠoozuʋɛ ɓɔɠɔi ɠa é ɠɛni zeini ná. Naa ɠa é kɛɛni, é zooni é zunu felegɔiti kula fenɛtɛlɛi laaʋɛ, é ti yei ga galui.

¹⁶É ɠɛni ti ma: «À li ga gize yooi zu ʋelei, ni naa laade, wo la ɠulaa wo ɓɛɛ nuiti zea. À lɔɔɠu ná folo saʋagɔ laawu, eyɛsu ti ɠale ma. Naa ʋolu, wa pele zo niina.»

¹⁷Zunu felegɔi naati ti ɠɛni ma: «Wɛlɛ, ʋelei gá minazeɠegi a yɛ ma la, nii è boga ga gi kɛ è ʋɛ, faa la ɠɛa gi ʋa:

¹⁸Aisa gi ʋa ʋa zooi zu, galu ɓɔigi nii ɠili fenɛtɛlɛi laaʋɛ, nii gi ɠulaai daaʋɛ, gi ʋilɛ, è è-ɠɛɛ, ta è-lee, ta è-ɠɛɛleaiti, ta ɗa-ʋɛlɛyeɠei kpein gaalɛ ba ɗa-ʋɛlɛi wu.

¹⁹Nu nɔpɛ a ɓudɛna ɗa-ʋɛlɛi ma ɓofalagi maazu, é ɠula eteaʋɛ, naa ma ɲamai ɠa la tɔ ɓɔɠɔi unma, faa la ɠɛa gi ʋa. Kɛlɛ ni gá yeevɔɔɠuna naa taɠila kpalaa ba, niiti ti è ʋa pɛlɛi wu, naa ma ɲamai ɠa la gi unma.