JOSUA 2:5-19

⁵Dapâc eme motâc hezo ehapie ŋic jahe hurâ rapirec. Erâ weniŋucpec rapirec ine mi manakopac. Bâruŋ jaha jâpec‐jofa raniŋ. Ŋoŋe sâcne bâfuac‐jofaniŋmu.”

⁶E jahac ine jowac‐jafarâ fe ficbupuo bunda râe guruc ewec ira biac soŋjofawec.

⁷Ehame ŋic jaŋe roc‐jofaniŋte basac‐jofa raku Jordaŋ opâ rendacnao fisimbiŋ. Basac‐jofaniŋte hurâ rahapie haesac motâc hembiŋ.

⁸Eme ŋic jahe ine waha fozo ehapire ŋokac e jaherao ficbupuo fewec.

⁹Ferâ ŋic jahec jasarâ muwec: “Wofuŋzi mâreŋ ʒi ŋoŋe ŋarewec i no mana‐jâmbâŋkekopac. Eme ŋoŋere hâhâwiczi boc fusucmac‐nâpowec. Ehuc mâreŋ ʒirec ŋecjucfâc‐ticne sasawa nâŋe ŋoŋere maio weaŋkeŋgopeneŋ.

¹⁰Ŋoŋe Aigita mâreŋkonec wefuhapie Wofuŋzi ʒâŋe fai‐ŋeŋicko Hâwec Bâbâroŋ mume kereŋkewec â Amori ŋic jaŋere ŋicwofuŋ jajahec, Sihoŋ â Ogo erâ gurufâc‐jekic Jordaŋ ocniŋucnao jopa miziembiŋ, i mana‐fârembeŋ.

¹¹Nâŋe i manahuc maŋnâŋec betaŋkeme hâbi‐nâŋec ŋeŋgoroŋkewec. Ŋoŋere Wofuŋ Anutu eki sawa faic sambâŋko â mâreŋko ʒira Anutu mocjaha juekac.

¹²Eme ŋohe ʒi Wofuŋte maio mupaŋke‐narenic. Noni bubiaŋ qaŋactekopac iŋuc jaha ŋoŋe mamac‐nanere fic ʒi bubiaŋ qacneniŋmu irec ma jâmbâŋ moc mufua‐narenic.

¹³Ehuc neŋgoc mamac, hahac ɋa, seŋ qo â wiacfâc‐nane sasawa akic‐nâpohuc juju‐nâŋec hâmockonec bataranʒepieŋ.”

¹⁴Eme ŋic jahe ŋokac âzâcnerâ mupic: “Sâcne, ŋopaniŋmuo nâhere juju wâc omaezejec. Go nâhe mi mufuac‐nâfocmuo Wofuŋzi mâreŋ nâreocmu dameŋ ira sioc tâmiric bubiaŋ qaŋarenaŋmu.”

¹⁵Eme ŋokac e ficticne haesachec iticnehuc bakicnere ira ŋeŋe juju ewec. Irec ŋic jahe qâqâtâc kataŋko repao râec‐jofame sac râpeo hupic.

¹⁶Ehuc jasarâ muwec: “Basac‐ŋofaŋgopieŋ ŋic i jaŋe bâfuac‐ŋofanʒipiŋte tiki mâreŋko razepirec. Eme ira ʒoaŋ gie bapa jahec â moc soŋkerâ juhapire basac‐ŋofaŋgopieŋ jaŋe risie‐fârepie ine ŋohe hata‐ŋekic ʒuhuckerâ razepirec.”

¹⁷Eme ŋic jahe ŋokac âzâcnerâ mupic: “Go enâctetec dâŋ ʒi mupaŋkekoperec ine wiac ʒiŋucte bahac fâsâc enacmu:

¹⁸Nâŋe mâreŋ ʒira ware fisinaŋmu dameŋ ira go repa bâbâroŋ ʒi râec‐nâfotec wahakoperec i qâqâtâc kataŋ ʒira ʒâfickezemec. Ehuc neŋgoc mamac jahecge, hahac ɋafâcge â mamacgere wiacfâc jaŋe sasawa ficgao qâzuc‐jopa‐fârezemec.

¹⁹Eme moc e gore fickonec waharâ hae ʒoŋao juocmuo ine socticnere kiŋ i e jahacne faio fehame nâhe bahac fâsâc enacmu. Â ficko juhapie moczi moc jopaocmuo irec socte kiŋ i nâhere faio fezejec.