IOSUA 2:5-19

⁵bena dina e diho ai, hanua ikoukouna bae koua negana ai, idia na e raka lasi. Ede ela na asi dibagu; a idia muridia amo baola haraḡa, bona ba halasidia tao.

⁶A hahine na ruma guhina ai vada e hakaudia, flax tuhutuhudia guhi ai e laha ḡaudia henudiai vada e hunidia.

⁷Taunabunai e tahudia taudia ese Ioridane dalana ai e tahudia lao, ela bona turu-hanai gabudia. E tahudia ela, bena hanua ikoukouna vada e koua ahu.

⁸Hasinadoa taudia do asie hekure ai, hahine na dekedia e dae kau guhi ai,

⁹e hereva henidia, eto, Lau na dibagu Iehova ese ina tano vada e henimui. Umui daimui ai gari ese e butumai taomu, bona ina tano taudia iboudiai kudoudia e hetahamu.

¹⁰Badina be ai vada a kamonai Iehova ese Davara Kakakakana na vairamui ai e hakaukaua, Aigupto tanona amo o raka lasi negana ai. Vada a kamonai danu Amoro pavapavadia raruosi, Sihon bona Og, ede o aladia mase toma, Ioridane sinavaina unukahana ai.

¹¹A kamonai negana di kudoumai e hetaha, bona ta se haheauka umui daimui ai. Badina be Iehova, emui Dirava, na guba Diravana bona tanobada Diravana.

¹²Taunabunai, Iehova ladana ai ba gwau henigu hamata: lau ese umui na bogamui hisi heḡereḡerena umui danu tamagu ena ruma ba bogaia hisi, bona toa korikorina ba henigu,

¹³tamagu bona sinagu bona taihugu bona tadikakagu bona edia iboudiai ba hamauridia, iboumai ai mase amo ba rauamai.

¹⁴Raruosi ese e haere henia, eto, Ai emai mauri davana na oiemu mauri. Emai ḡaukara harina basio hapiua, bena ai ese hebogahisi bona kara momokani baia hahedinarai henimu, Iehova ese ina tano baine henimai negana ai.

¹⁵Una hahine ena ruma na hanua maḡuna ai e hadaia; ia na maḡu latanai e nohova. Bena ia ese idia raruosi e abidia, gaba-mauru amo kwanau ai e tudia dobi.

¹⁶E hamaorodia, eto, Ororo kahadia baola, e tahumuimu taudia bae davarimui na garina. Dina toi unuseni ai ba komu, ela bona e tahumuimu taudia bae lou mai; una murinai emui ura dalana ai ba raka.

¹⁷Raruosi ese e hamaoroa, eto, Ai na a uramu ai na basia kerere, ina gwau-hamata emai ai vada o abia na basia hakererea.

¹⁸Taunabunai, ai na ina tano lalonai baiama negana ai, ina varo kakakakana na o tumai dobi gaba-mauruna ai ba kwatua kau. Tamamu bona sinamu bona taihumu bona tamamu ena ruma taudia iboudiai na ruma lalonai ba haboudia.

¹⁹Idia ta emu ruma iduarana amo baine raka lasi ariara ai, rarana na ia sibona kwarana ai; ai na asi emai kerere. A dika baine kau oi ida ruma lalonai e nohomu tauna ta enai, ia rarana na ai kwaramai ai.