Yontu 91:3-16

³Tɑcɑɑ nyɑ́ fitiɣinɑ yʋlʋ kɛ puluɣu kʋnyəpʋɣʋ tɑɑ, nɑ yʋlʋkʋsəkʋ nɑ kʋ wɑkəlʋɣʋ tɑɑ.

⁴Nɑ n kenti ɩ tɔɔ nɑ ɩ́ tʋ-ŋ kpʋlʋɣʋ, ɩsɩɩ kɑmpɑɣɑ kɛ kɑ too keŋ tɛɛ. Nyɑ́ kʋpɑntʋ wɛ kɛ́ ɩsɩɩ kpɑ́lʋɣʋ kʋkentuɣu.

⁵Yʋlʋ kɑɑ nyɑnɑ ɑhoo sɔɣɔntʋ, yɑɑ nyəmɑ́ kʋtɔtɔnɑ kɛ ilim tɑɑ.

⁶Yɑɑ yʋlʋkʋsəkʋ ŋku kʋ cɔɔkɩ səkpɛtʋɣʋ tɛɛ tɔ, yɑɑ ɩsənɑ kʋ tɛɛkʋɣʋ yəlɑɑ kɛ ilim hɛkɑ tɔ.

⁷Pɑɑ yəlɑɑ iyɑɣɑ (1000) səpɑ nyɑ́ kɔŋkɔŋ tɑɑ, yɑɑ pɑɑ yəlɑɑ iyisi nɑɑnʋwɑ (10000) səpənɑ nyɑ́ ntɔɣɔŋ tɔɔ, pʋlʋpʋ kɑɑ lɑ-ŋ.

⁸Kuli nyɑ́ ɩsɛ nɑ ń nɑ́ ɩsənɑ Ɩsɔ fɛləɣɩ ɑsɑɣɑɑ tɔ.

⁹Hɑɩ, Tɑcɑɑ kɛlɛ nyɑ́ kpʋlʋɣʋ tətʋlɛ, ɩsɔtɑɑ Ɩsɔ Sɔsɔ kɛ n cɔɔsəɣənɑ.

¹⁰Wɑhɑlɑ nɔɣɔlʋ kɑɑ mɑɣɑnɑ-ŋ, pə́cɔ mpusi nɔɣɔlʋ kɑɑ kpətənɑ nyɑ́ təyɑɣɑ.

¹¹Mpi tɔ, Tɑcɑɑ kɑ́ tʋ ɩ ɩsɔtɑɑ tillɑɑ kɛ́ sɩ pɑ́ feŋi-ŋ nyɑ́ mpɑɑŋ tənɑ tɑɑ.

¹²Nɑ pɑ́ɑ́ te-ŋ pɑ niŋ tɑɑ sɩ pəlɛ nɑtəlɩ tə́ tɑɑ co-ŋ.

¹³Nɑ pɑɑ n fɛlɑ tɔɣɔlɑɣɑ yɑɑ pɑɑsəlɛ yɑɑ wontuɣu ɩsɑɣɑʋ yɑɑ tʋm, pʋlʋpʋ kɑɑ lɑ-ŋ.

¹⁴Tɑcɑɑ sɩ: Timpi n sɔɔlɑ-m tɔ mɑɑ wɑɑsɩ-ŋ, nɑ mɑ́ kenti nyɑ́ tɔɔ kɛ́ n nyəmɑ́ mɑ hətɛ tɔ pə tɔɔ.

¹⁵N kɑ yɑɑ mɑ hətɛ nɑ mɑ́ cɔ-ŋ, nɑ mɑ́ wɛɛ nyɑ́ wɑɑlɩ kɛ́ lɑŋwɑkəllɛ wɑɑtʋ, nɑ mɑ́ wɑɑsɩ-ŋ nɑ mɑ́ tɑɣɑnɩ nyɑ́ nyʋɣʋ kɛ kʋsʋɣʋ.

¹⁶Mɑɑ yele nɑ nyɑ́ weesuɣu tɑɣɑlɩ nɑ mɑ́ yɑ́ nyɑ́ nyʋɣʋ.