Psalms 91:3-16

³Nunguningta, Kaem tareng memek ni ko ko kaluwu beteman mu ko ka sinar tauk ale ka bituok se kuera memek me kimik te tairukko.

⁴Nu tarak ko gotek ereso iwitata, ka iramurok se ni ko luman bowa ningi yawarakala bagerko; nu me ka bitirukko, am ka iramurok ale ka sinar taukko.

⁵Se ni mel memek tirom ka maguwurokko tairuk mu ko me nguangerko; ale gatu woremkalal ka morukko tairuk, mu ko betela me nguangerko.

⁶Se kuera memek tirom ka maguwurokko tairuk, mu me ko nguangerko, woremkalal tairuk mu betela me ko nguangerko.

⁷Se kariimet 1000 iwita ni beta dugu te kuemon, 10,000 iwita kiting sengam mu te dagulu kuemon, bare ni mu memek me toko.

⁸Kariimet memek alo koma memek tamonko, se ni mu am motam la nungarkiwerko.

⁹Ni Yawe nika Kaem Kalel Biya mu nika bagara kuwim se nika yumura kuwim iwita ko arik,

¹⁰mu ni memek bo me arikko, se memek bo nika kawam duap te me tairukko.

¹¹Nu ko engel alo nunga manuk se nika namara taira mu te ka bitaru se lagamonko.

¹²Nuna kiting duap ningi ka ilumon se manga te siwik motam atum mu me dagulko.

¹³Ni lion se mot memek nunga nusupuling ita parusuwurko, lion sokel ago se mot memek bibiya karogo la.

¹⁴Se Yawe iwita balam, “Ani nu sangaru taik ale bituekko, mu awuk, nu aninga kueso ale ani abowa ningi bagoso.

¹⁵Nu aninga aurok mu ani kuring iluwekko; nu memek ningi kaparuk, mu ani ilak baga se bataguru taik ale nup biya tuekko.

¹⁶Ale balik se amilmil te tom maiya biya ali imi te baga se, ani noko saonga yawara mu ko iki se lagarukko.”