SALMOS 91:3-16

³Pampa san yajaya hueli mitzmanahuis tlen nochi tlaquetztli tlen sequinoc quintlatise para mitzmasiltise. Mitzmocuitlahuis para ax mitzajsis nopa cocolistli tlen tetzontlamiltía.

⁴Queja se tenanpiyo quintlatía ipilconehua ieltlapaltzala, Toteco queja nopa nojquiya mitzmocuitlahuía. Temachtli mitzchihuilis nochi tlen mitztlajtolcahuilijtoc, pampa timotemachijtoc ipan ya para mitzmanahuis.

⁵Huajca ama ayoc ximajmahui ica tlayohua, niyon amo xiquimacasi tlen hueli panos ipan tonaya.

⁶Amo xiquimacasi nopa tlaijiyohuilistli tlen huala ipan tzintlayohuilotl, niyon nopa miquistli tlen ajsi ica tlajcotona.

⁷Yonque monechca miquise mil o majtlactli mil tlacame, pero ta ax mitzajsis.

⁸Ica moixtiyol tiquitas quejatza quiselise tlatzacuiltili nopa tlaixpanoca tlacame.

⁹Intla timotemachijtoc ipan TOTECO para mitzmocuitlahuis, huan timochiya ipan Toteco Tlen Más Hueyi para mitzpalehuis,

¹⁰huajca ax mitzajsis niyon se tlamantli tlen ax cuali, niyon ax quiajsis mochaj.

¹¹Pampa Toteco quintitlanis ielhuicac ejcahua para ma mitzmocuitlahuica, huan mitzmocuitlahuijtinemise campa hueli ta tiyas.

¹²Huan ielhuicac ejcahua mitztlalanase ica ininma para ax timotepotlamis ipan ojtli.

¹³Niyon ax timajmahuis yonque tijquetzas moicxi ipan se león o se cohuatl tlen temictía. Quena, ax tleno mopantis yonque timoquejquetzas ininpani.

¹⁴Pampa Toteco Dios quiijtohua: “Na nijmanahuis pampa nechicnelía. Nijhueyitlalis pampa motemachía ipan na.

¹⁵Quema nechtzajtzilis, na nijnanquilis. Nojquiya niitztos ihuaya quema quipiyas cuesoli. Nijmanahuis huan nijhueyitlalis.

¹⁶Nijchihuas ma itzto tlahuel miyac xihuitl huan nijmaquixtis.”