Yontu 79:1-10

¹Asɑfɩ yontu nti tə wɛ yonyoolɑɑ nyʋɣʋ tʋ yontunɑɑ tɑɑ tɔɣɔlɔ. Hɑɩ, Ɩsɔ, kpɑɩ nyə́mɑ wɑtɑ nyɑ́ tɛ, nɑ pɑ́ wɑkələɣɩ nyɑ́ təsɛɛlɛ nɑŋŋ nyəntɛ. Pɑ pəsɑ Yosɑlɛm kɛ ncɑɑlɛ kɑŋmɑɑɣɑ.

²Pɑ kʋ nyɑ́ təmlɛ nyə́mɑ nɑ pɑ́ pɛtɩ kpeliŋ nɑ tɑɑlɛ wontu.

³Nɑ nyɑ́ yəlɑɑ kʋpɑmɑ cɑləm kpé nɑ pə́ cɔɔnɑ Yosɑlɛm ɩcɑtɛ, nɔɣɔlʋ tɑ kɔɔ sɩ ɩ́ pi-wɛ.

⁴Tə pəsɑ mpusi pʋlʋɣʋ tɑ́ cɔlɔ nyə́mɑ kɛ́, nɑ mpɑ pɑ cɔɔnɑ-tʋ tɔ pɑ woŋiɣi-tʋ nɑ pɑ́ tuliɣi-tʋɣʋ ntompee.

⁵Hɑɩ, Tɑcɑɑ, pəlee kɛ́ nyɑ́ tɑ́ɑ́ kɑ́ hɛɛsɩ-tʋɣʋ kpɑnɑʋ nɑ nyɑ́ pɑ́ɑ́nɑ́ yele-tʋɣʋ nyɑɣɑʋ ɩsɩɩ kɔkɔ?

⁶Piitimnɑɑ nɑ kɑwulɑsɩ nsi sɩ tɑ nyɩ-ŋ nɑ sɩɩ sɛɛkɩ-ŋ tɔ, nsəɣɩ pɩɩ wɛɛ sɩ ń mʋnɑ pɑ́ɑ́nɑ́.

⁷Mpi tɔ, pɑ kuu Ɩsɛɣɛlɩ nyə́mɑ wontu, nɑ pɑ́ wɑkəlɩ pɑ təcɑɣɑlɛ.

⁸Tɑɑ tɔɔsɩ tɑ́ ɩsɑɣɑtʋ kʋpəntʋ tɔɔ. Amɑ nyənɩ tɑ́ pətɔɔtəlɛ nɑ ń kɔɔ tɑ́ kiŋ kɛ lɔŋ. Mpi tɔ, tə wɛ wɑhɑlɑ tɑɑ kɛ́.

⁹Hɑɩ, wɑɑsɩ-tʋ, tɑ́ nyʋɣʋ Yɑ́tʋ Ɩsɔ, nɑ pə́ tʋ nyɑ́ hətɛ kɛ teeli. Yɑ-tʋ nɑ ń kpiisi tɑ́ ɩsɑɣɑtʋ kɛ nyɑ́ hətɛ tɔɔ.

¹⁰Pepe tɔɔ kɛ́ piitimnɑɑ kɑ́ pɔɔsəɣɩ sɩ: Leɣe pɑ Ɩsɔ ɩnɩ ɩ mələnɑɑ? Pə wɛɛ kɛ́ sɩ ń lɛɛtɩ-wɛɣɛ nyɑ́ təmlɛ nyə́mɑ səm kɛ tɑ́ ɩsɛntɑɑ nɑ pɑ́ nɑ́.