SALAMO 79:1-10

¹Dirava e, idau bese taudia ese oiemu tano idia tuari henia vadaeni. Oiemu Dubu Helaga idia hamiroa vadaeni. Ierusalema idia hadikaia momokani.

²Oiemu bese taudia edia mase tauanidia, be ataiai manudia dekenai idia henia vadaeni, idia ania totona, bona oiemu hesiai taudia edia hidiona, be uda boromadia edia aniani totona idia negea vadaeni.

³Oiemu bese taudia edia rarana, be Ierusalema ena kahana ibounai dekenai idia bubua vadaeni, ranu hegeregerena, bona mase taudia guria totona tau ta ia noho lasi.

⁴Ai idia hagegea noho idau bese taudia, ese ai idia hereva dika henia noho. Ai dekenai idia kirikiri, bona ai dekenai idia hevaseha noho.

⁵Lohiabada e, oi ese ai do oi badu henia noho, ela bona edena negai? Oiemu badu be lahi bamona, ai do ia gabua noho hanaihanai, a?

⁶Mani emu kara idau bese taudia, oi idia tomadiho henia lasi besedia, edia latanai oiemu badu do oi atoa. Oi dekenai idia guriguri henia lasi taudia edia latanai, be oiemu badu do oi bubua.

⁷Badina be idia ese, Iakobo ena bese taudia idia ania ore, bona Iakobo ena noho gabuna idia hadikaia ore.

⁸Aiemai sene taudia edia kara dika ena davana, be mani emu kara ai dekenai do oi henia lasi. Oiemu bogahisihisi, mani emu kara, be ai dekenai do oi henia haraga, badina ai be ai dika momokani vadaeni.

⁹Dirava e, mani ai do oi durua, ai do oi hamauria. Oiemu ladana ena hairaina dainai, ai do oi hamauria, bona aiemai kara dika do oi gwauatao.

¹⁰Badina dahaka idau bese taudia, be inai bamona idia hereva diba, idia gwau, “Edia Dirava be edeseni?” Mani emu kara, oiemu hesiai taudia idia alaia noho idau bese taudia, edia kerere davana do oi henia. Aiemai vairana dekenai, oiemu hesiai taudia edia rarana ena davana mani do oi henia.