Buk Song 79:1-10

¹Asap i raitim dispela song. God, ol arapela lain i kam pinis long graun bilong mipela, na ol i pait long mipela ol manmeri bilong yu. Ol i bin mekim nogut long dispela haus yu bin makim bilong yu yet, na haus i kamap doti olgeta. Na ol i bagarapim Jerusalem nogut tru.

²Ol i kilim ol manmeri na ol wokman bilong yu, na ol pisin wantaim ol wel abus i kaikai bodi bilong ol.

³Ol birua i kilim i dai ol manmeri bilong yu, na blut bilong ol i kapsait na i ran olsem wara insait long Jerusalem. Na i no gat wanpela man i stap bilong planim bodi bilong ol.

⁴Ol lain manmeri i stap klostu long mipela ol i tok bilas na lap na tok nogut long mipela.

⁵Bikpela, hamas taim yet bai yu kros long mipela? Ating bai yu kros oltaim, a? Bai kros bilong yu i stap olsem paia i lait na i no inap i dai, a?

⁶Mobeta yu kros long ol lain manmeri i no save lotu long yu, em ol dispela manmeri i givim baksait long yu.

⁷Ol dispela lain i bin kilim i dai ol manmeri bilong mipela, na ol i bagarapim tru graun bilong mipela.

⁸Nogut yu mekim save long mipela long ol pasin nogut ol tumbuna bilong mipela i bin mekim. Nau yu mas marimari long mipela, long wanem, bilip bilong mipela i slek pinis.

⁹God, yu God bilong kisim bek mipela. Tingting long biknem bilong yu na helpim mipela. Kisim bek mipela na rausim olgeta sin bilong mipela, na bai mipela i litimapim nem bilong yu.

¹⁰Bilong wanem ol arapela lain i save askim mipela olsem, “We stap God bilong yupela?” Mipela i laik lukim yu i mekim save long ol arapela lain bilong bekim blut bilong mipela, long wanem, ol i kilim i dai ol wokman bilong yu.