Pesalem 79:1-10

¹O Anôtô, lau samuc sêsô nêm gamêŋ sêja. Êsêac seseŋ nêm lôm dabuŋ ŋadabuŋ ma sêjamu Jerusalem e popocgeŋ.

²Êsêac sêkêŋ nêm sakiŋwaga nêŋ ŋawêlêlaŋ kêtu moc, taŋ sêmoa umboŋ ŋalabu naŋ, nêŋ gwada. Sêkêŋ nêm lau mansaŋ nêŋ ŋawêlêlaŋ gêdêŋ bôc ŋaclai.

³Êsêac sêkêc êsêacnêŋ dec siŋ kêtôm bu, sêgôm sêgi Jerusalem auc e kêsô tau ma ŋac teŋ gêmoa gebe ênsuŋ ŋacmatê naŋ gêmoa atom.

⁴Aêacma lau malac ŋagêdô, taŋ dêmôêŋ gêjac tauŋ naŋ, sêsu aêac susu ma tenteŋlatu, taŋ sêŋgôŋ makeŋ-makeŋ naŋ, sêlic aêac amboac gêŋ meloc ma têtaŋ pêlê aêac.

⁵O Apômtau, oc gobe ôli nêm ŋalêlôm sa ŋapaŋ e êndêŋ ondoc acgom. Nêm têmtac ŋandaŋ êndaŋgac-êndaŋgac amboac jawaô e êndêŋ ondoc, go êmbacnê.

⁶Ôkêŋ nêm têmtac ŋandaŋ naêpi lau samuc, taŋ sêjam kauc aôm naŋ, to êpi tenteŋlatu, taŋ aweŋ gêjac nêm ŋaê atom naŋmaŋ.

⁷Gebe êsêac sêjac aêacma lau êndu ma sêgôm nêŋ malac kêtu gasaŋ.

⁸Ôkêŋ tameŋinêŋ sec ŋagêjô êpi aêac atom. Taêm labu aêac sebeŋmaŋ gebe aêac awi atu gwasaê aômŋa siŋ.

⁹O Anôtô, taŋ kôtu aêacma kêsiwaga naŋ, ônam aêac samaŋ. Ôŋgôm nêm ŋaê ŋawae êsa. Ônam aêac sa to ôsuc aêacma biŋ ôkwimaŋ. Ôŋgôm êtu nêm waemŋa.

¹⁰Amboac ondoc lau samuc sênac aêac ôkwi gebe “Lau tônê nêŋ Anôtô oc gêmoa ondoc.” Ôkac nêm sakiŋwaga, taŋ lau samuc sêkêc êsêacnêŋ dec siŋ naŋ, nêŋ kamocgôc êndêŋ aêac mateŋanô alicmaŋ.