Yontu 32:1-7

¹Tɑfiiti yontu. Leleŋ nɩɩlʋ ntɛ́ wei ɩ ɩsɑɣɑtʋ Ɩsɔ hɩɩsɑɑ nɑ ɩ́ wii-ɩ ɩ kʋpəntəŋ tɔ.

²Leleŋ nɩɩlʋ ntɛ́ wei Tɑcɑɑ ɩɩ yeki sɩ ɩ ɩsɑɣɑtʋ ɩ́ məlɩ ɩ nyʋɣʋ tɑɑ tɔ. Pəyele cɛsʋɣʋ fɛɩ ɩ ləmɑɣɑsɛɛ tɑɑ.

³Ye mɑ ŋmɛsɑ mɑ ɩsɑɣɑtʋ, mɑɣɑ tə wɑkələɣɩ. Nɑ mɑ́ mɔləɣɩ ilim nɑ pə tɛm.

⁴Mpi tɔ, ilim nɑ ɑhoo kɛ n hɔŋɑɣɑ mɑ ŋkpɑŋʋɣʋ nɑ pə́ nɩɩ-m. Mɑ tomɑ tɛmɑ ɩsɩɩ tʋɣʋ kɛ wʋlɑɣɑ tɛtʋ tɑɑ kɛ́ lʋŋlɛ.

⁵Mɑ mɑɣɑsɑɑ sɩ mɑɑ hʋlɩ-ŋ mɑ ɩsɑɣɑtʋ, mɑ tɑ ŋmɛsɩ-ŋ mɑ kʋpəntəŋ. Ɩlɛnɑ nyɑɑ hɩɩsɩ-m tə tənɑ.

⁶Pə tɔɔ kɛ́ nyɑ́ yəlɑɑ tənɑ kɑ sələməɣɩ-ŋ nɑ pɑɑ wɑɑtʋ wei wɑhɑlɑnɑɑ wɑtɑ-wɛ ɩsɩɩ lʋm, pɩɩ tɑkɩ-wɛ.

⁷Nyɑɣɑ mɑ cɔɔsəɣənɑ, nɑ ń hɑtələɣənɑ-m lɑŋwɑkəllɛ. Nɑ mɑ́ ŋmɑɑləɣənɑ mɑ nyʋɣʋ yɑpʋ.