Yontu 14:1-7

¹Tɑfiiti yontu nti tə wɛ yonyoolɑɑ nyʋɣʋ tʋ yontunɑɑ tɑɑ tɔɣɔlɔ. Kʋmɛlɛməŋ mɑɣɑsəɣənɑ ɩ tɑɑ sɩ Ɩsɔ fɛɩ. Yəlɑɑ mpɛ pɑ wɑkəlɑɑ kɛ́ nɑ pɑ́ lɑkɩ ɑcɑɑlətʋ, kʋpɑntʋ lɑtʋ fɛɩ.

²Hɑtoo ɩsɔtɑɑ kɛ́ Tɑcɑɑ nyənəɣənɑ ɑtɛ yəlɑɑ sɩ ɩ nɑɑkɩ sɩ ləmɑɣɑsɛɛ tʋ nɔɣɔlʋ ɩ pɛɛkəɣɩ ɩ sɛɛʋ nɑ.

³Pɑ tənɑ pɑ yelɑ ɩ mpɑɑʋ kɛ́ nɑ pɑ́ wɑkəlɩ. Kʋpɑntʋ lɑtʋ fɛɩ pɑ tɑɑ, pɑɑ kʋlʋm.

⁴Tɑcɑɑ sɩ: Kɑwɑlɑɣɑ lɑtɑɑ tənɑ fɛɩnɑ ləmɑɣɑsɛɛ. Pɑ pəsɑ mɑ yəlɑɑ ɩsɩɩ tɔɣɔnɑɣɑ nɑ pɑ́ tɔkɩ pɑɑ sɛɛkɩ-m.

⁵Tənɑɣɑ pɑɑ selinɑ sɔɣɔntʋ kɛ sɔsɔm. Mpi tɔ, Ɩsɔ kɑ́ wɛɛ mpɑ pɑ nɩɩkənɑ-ɩ tɔ pɑ wɑɑlɩ.

⁶Kʋnyɔntʋnɑɑ tɛɛlʋɣʋ kɛ ɩ́ cɑɑkɩ wɑkəlʋɣʋ. Ɩlɛ Tɑcɑɑ kɛlɛ pɑ kpʋlʋɣʋ tətʋlɛ.

⁷Hɑɩ, mɑ kooliɣi kɛ́ sɩ Ɩsɛɣɛlɩ nyə́mɑ wɑɑsʋɣʋ ɩ́ lɩɩnɑ Ɩsɔ kiŋ kɛ Siyɔŋ pʋɣʋ tɑɑ kɛ́ wɑɑtʋ wei Tɑcɑɑ kɑ́ məŋnɑ ɩ yəlɑɑ mpɑ pɑɑ kuuwɑ tɔ. Yɑkɔpʋ lʋlʋɣʋ nyə́mɑ Ɩsɛɣɛlɩ nyə́mɑ kɑ́ ŋmɑɑlənɑ lɑŋhʋlʋmlɛ sɔsɔɔlɛ.