Sam 14:1-7

¹Nabz ne Devet kx yrbzle mz kxrmailz ngr dzbe kxnzngrng. Leplz kxnzngqngung mz drtwrdr nzrpilr kx, “Trpnzngr Gct.” Leplz lcng nzvz-rbrng x nzale-txpwzng da kxtrka zlwz. Trpnzngr leplz lcng kxtubq.

²Yawe mncom Heven, x sc tqmcomle leplz amrlx, Mz nzmc-krde neke yrplapx mz nzrtangrti-krde nide.

³A' nzesablqtilr Gct amrlx ngrdr x drtwrdr esz'ti mz nzale-krdr da kxtrka. Trpnzngr nidr kxesz' kxtubq.

⁴Delc tqrpingr Yawe kx, “Leplz lcng tztrkang nznibqtitxdr leplz nengeng Nzapulr kx nzrnibqng da kx nangqdr. X mrbrtr mz drtwrdr nzkrka'-krmlr bange. ?Myx kxmule, trnzkrlzlru da kxtubq?”

⁵A' narngidrtio-lzbqng x namwxlrlvzti-lzbqng, Murde Gct tedr badr kxnztubqng.

⁶Vz zvz nzrpwa'-krbzlr me pnz drtwr kxnzrlxngiting. A' Yawe mnc-ngalelvzle leplz nedeng.

⁷Sutitx zlwz drtwrnge kx Gct rgu kc Saeon na-arlapxle leplz nedeng. Murde mzli kc nayzlu-mou-ngrmle, namnc-zpwxku badr. X nigu lr Jekop drtwrgu sa naelalzm. X nigu lr Israel sa na-abrtz-ngrgu da lc.