Wogaabaa 3:1-16

¹“‘Issi asi issippetettaa yarshshuwaassi ba wudiyaappe macca gidin attuma gidin issi mehe shiishshiyo wode, he mehee tilla bollaara de7iyaagaa gido.

²Yarshshanau ehiido mehiyaa huuphiyan ba kushiyaa wottidi, Xoossaa Dunkkaaniyaa penggen shukko. Hegaappe guyyiyan, qeeseti Aaroona naati suuttaa yarshshiyoosaa miyyetu ubbaa bollan caccafona.

³Issippetettaa yarshshuwaappe taman xuuggiyo yarshsho oottidi GODAAYYO shiishsho. Hegeekka qantta ashuwaa maayida handda ubbaa,

⁴naa77u kilahota, eta bolli de7iya handdaanne tiriyaa bolli maayida handdaa kilahotaara gattidi ekkees.

⁵Aaroona naati hegaa hara xuuggiyo yarshshuwaara yarshshiyoosaa bolli de7iya mittaa bolli wottidi xuuggona; hegee GODAAYYO taman xuuggiyo, sawuwaa tonggu giya yarshsho gidana.

⁶“‘GODAAYYO issippetettaa yarshshuwaa shiishshiya uri dorssa gidin deeshsha gidin, macca gidin attuma gidinkka tilla bollaara de7iyaagaa shiishsho.

⁷Dorssa maraa yarshshiya uri, GODAA sinttan shiishsho;

⁸shiishshidi ba kushiyaa a huuphiyan wottidi, Dunkkaaniyaa sinttan shukko. Hegaappe guyyiyan, Aaroona naati suuttaa oiqqidi, yarshshiyoosaa miyyetu ubbaa bollan caccafona.

⁹Issippetettaa yarshshuwaappe taman xuuggiyo yarshsho oottidi, GODAAYYO shiishsho; hegeekka modhdhuwaa, giicciiriyaappe qanxxido nasiyaa, ulo giddo ashuwaa maayida handda ubbaa,

¹⁰naa77u kilahota, eta bolli de7iya handdaanne tiriyaa bolli maayida handdaa kilahotaara gattidi ekkees.

¹¹Qeesee hegaa GODAAYYO taman xuuggiyo yarshshiyoosaa bolli wottidi xuuggo.

¹²“‘A yarshshoi deeshsha gidikko, i hegaa GODAA sinttan shiishsho.

¹³Yaatidi a huuphiyan ba kushiyaa wottidi, Xoossaa Dunkkaaniyaa sinttan shukko. Hegaappe guyyiyan, Aaroona naati suuttaa oiqqidi, yarshshiyoosaa yuushuwan ubban caccafona.

¹⁴I he yarshshiyoogaappe ekkidi, taman xuuggiyo yarshsho oottidi GODAAYYO shiishsho; hegeekka qantta ashuwaa maayida handda ubbaa,

¹⁵naa77u kilahota, eta bolli de7iya handdaanne tiriyaa bolli maayida handdaa kilahotaara gattidi ekkees.

¹⁶Qeesee hegaa taman xuuggiyo, sawuwaa tonggu giya yarshsho oottidi yarshshiyoosaa bolli xuuggo. Handda ubbai GODAAGAA.