Levitikus 3:1-16

¹Fa’anra nge pi’ be’ bmaligach ni fan e nge gapas thilin Got nge girdi’, ma nge pi’ ba garbaw ni demturug ko bpin fa pumo’on ndariy bochyang u downgin nib kireb.

²Me tay pa’ nga daken lolgen fare gamanman, me li’ nge yim’ u langan e mab ko fare Tent u p’eowchen SOMOL. Ma fapi prist ni pifak Aron e ngar paged e racha’ riy nga daken fa aningeg i tabthung ko fare altar

³miyad pi’ e yungin ba’aray ko fare gamanman ni ba ggan ni maligach ngak SOMOL: ni aram e gubin e mam riy nib ing gil’iggan,

⁴nge fa gal bu’oy nge mam riy, nge gin th’abi manigil ko ad riy.

⁵Ma boch fapi prist e ngar urfiyed urngin e pin’ey u daken fare altar nib mu’un ko fapi maligach ni mo’oruf. Ma bon e re maligach ni ggan ney e rib fel’ u wan’ SOMOL.

⁶Fa’anra ba gamanman ni saf fa kaming e fanay be’ ni maligach ni fan e nge gapas thilin Got nge ir, ma demturug ko pumo’on fa bpin fare gamanman, machane ba gamanman ndariy bang u downgin nib kireb.

⁷Ma fa’anra nge pi’ ba saf,

⁸ma thangri tay pa’ nga daken lolgen me li’ nge yim’ u mit fare Tent. Ma fapi prist e ngar paged e racha’ riy nga daken ga’ngin yang fare altar

⁹miyad pi’ e yungin ba’aray ko fare gamanman ni ba ggan ni maligach ngak SOMOL: urnging e mam riy nib mu’un e tin nth’ab u lan keru’ nib migid ko niw u keru’, nge gubin e mam nib ing gil’iggan,

¹⁰nge fa gal bu’oy nge mam riy, nge gin th’abi manigil ko ad riy.

¹¹Ma fare prist ni be pigpig e ngiyal’nem e nge urfiy e yungi n’ey ni gubin u daken fare altar ni ba ggan ni maligach ngak SOMOL.

¹²Ma fa’anra pi’ be’ ba kaming,

¹³ma thangri tay pa’ nga daken lolgen, me li’ nge yim’ u mit fare Tent. Ma fapi prist e ngar paged e racha’ riy nga ga’ngin yang ko fare altar

¹⁴miyad ognag e yungin ba’aray ko fare gamanman ni ba ggan ni maligach ngak SOMOL: urngin e mam riy nib ing gil’iggan,

¹⁵nge fa gal bu’oy nge mam riy, nge gin th’abi manigil ko ad riy.

¹⁶Ma bagyad fapi prist e nge urfiy urngin e yungi n’ey u daken e altar ni ba ggan ni maligach ngak SOMOL ni rib fel’ u wan’. Urngin e mam riy nib milfan ngak SOMOL.