1Iok nga hoena Non Soke lohot nge Apram nga maopene ngana pe hele lange i ke teke, “Apram o matau ero. Lem kaleu koi Iau pe lape e poia iong ke pingam iuiu toto.”
2Pe Apram tuacholia ke teke, “Non Soke NeHalang lape o tunge utar nge iau? Iau tuk e ero koi nenge lape mene lek urelu mur. Pe mele nenge lape mene ngana kou Eliese nenge Tamaskus.”
3Pe Apram hele, “Iong o tunge tuk e ero ke pomalam hekuleileinga ana non e nenge te umume nge iau lape mene lek urelu mur.”
4Pe Non Soke hele lange i, “Non nem lape mene lem urelu mur ero. Tum tamane ngana e nge lohot nga iong sipom eim lape mene lem urelu mur.”
5Pe Non Soke mene hote i lange hot pe hele, “O nau haka la nga tapa sana pe o sisele itoch mur - nakum nge o sisele iri kau?” Pe Non Soke hele mule, “Lem tete mur lape iri hulua ke pomalaka nga itoch nemur.”
6Ol pe Apram letena manmanna nge Non Soke pomalam Non Soke hetue i ke i non nge pengpeng.
7Pe Non Soke hele pule ke teke, “Iau Non Soke nenge mene hote iong nga lem kileng huna nge Ur nge Kaltia pe e tunge ich nei lange iong ke lem ia ol.”
8Pe Apram hele ke teke, “Non Soke NeHalang lape e eteia ke lek ich nei ke pomerei.?”
9Pe Non Soke hele lange i ke teke, “O mene pulumakau hei ngana e pe meme hei ngana e pe sipsip tamane ngana e nge aria hesinga iri mol pe o at ia iri nge Iau. Pe o mene ngie chaulum nai pule.”
10Iok Apram mene huros nemur lange NeHalang pe tote iri nga tunangaria pe sachana mur tema ke elle pe tote ngie mur ero.
11Ol pe ngie papalaungana mur te lehe sio taua huros nemur pe Apram lope hele iri.
12Iok chaia matana sisio lo pe Apram mamani hun toto pe kileng au ngana palaungana toto lohot nge i pe matau toto.
13Ol pe Non Soke hele lange i ke teke, “Lem tete mur lape la tetu nga tuele kina e nenge reria ia ero. Pe lape te poi poreke iri pe te ume manmana nge hana hel.
14Pe lape e heporeke tuele kina nenge te umume nge iri nem. Pe iri lape te lolochia ure halang toto nga etue nenge tei hot nga kileng nem.
15Pe iong lape o nanasia lem tete mur nenge te mete ke ulolo. Ke lape te alo hite iong nga etue nenge o tuauna toto ol.
16Pe lem tete mur lape te at mule nga ich nei ero mukam. Te amala ke hesinga iri ana non kina iri ana non kina elle (400) het mukam. Pe nem purpure hana henel tetu ngaria nga ich nei. Ke het ol laka lem tete mur te at mule nga ich nei ol. Nem nga etue nenge e heneue Amor mur pe e lope hote iri nga ich nei nga reria poinga poreke ngana mur. Pe heueu nei reria poinga poreke ngana muta haka ke nek ero kura.”
17Iok chaia matana sio lo pe kileng au pe oan ana tuninga e nge pululu pe rir remen ngana te lohot pe te i teu nga huros sachanchana nemur tunangaria.
18Ke nga etue neu Non Soke poia tomunga hel ana helenga luluch nge Apram ke teke, “Lape e tunge ich nei lange lem tete mur. Talun nge Ekipto pe mene ke la nga ech tana palaungana nenge Uprates.
19Ke iri lape te mene ich nenge Kin mur pe Kenas mur pe Katmon mur,
20pe Hit mur pe Peres mur pe Repaim mur,
21pe Amor mur pe Kenan mur pe Kekas mur pe Iepus mur.”
