1Iok, Isak mete ke la pe Iakop tu mule nge Kenan nga ich nenge temene tu tala ia nge nike. Pe tu nga lamau ke pomanga i non lomona ngana e.
2Pe nananga nenge Iakop tutuna mur nenge tatamanna ngana koi nei. Iakop nehei Pila pe Silpa, tuturia tatamanna mur te nauelele reria sipsip pe meme mur. Pe Iosep halaulaua titina nemur nga etue nenge ana hesinga iri analoch pe rahtele nai (17). Ol pe Iosep hele hote titina nemur lange temeria Iakop nga reria matana e.
3Israel mutena tau tote Iosep nge titina nemur iange tana hoe i nga etue nenge tuauna toto lo. Pomalam Iakop umeia Iosep nena hengeron sase ngana e nge rerere toto pe tunge lange i.
4Pe Iosep titina mur te naue ke temeria nge mutena tau tote i pe iri ero. Pomalam leteria inin pe te heleia helenga e nge urana lange i ero.
5Pe nga etuene e Iosep maopene. Ol pe la ke heleia maopene ngana neu lange titina mur nenge te ha tala nge i. Nenge neu poia iri ke lemeria ero toto ia i ol.
6Pe Iosep nana lange iri ke teke, “A longo at nga e maopek ngak nei:
7Ita lochloch ta kalkale uit putatana mur nga ume pe lek mes haka pengpeng pe imo lemo, te heliliu hite lek pe te matul sio lange i.”
8Pe titina mur te hele lange i ke te teke, “Iong o teke iong palaungana nge imem ke o nauele imem iam, ae? Ke nakum nge o nauele imem pama?” Te longe Iosep maopene ngana neu pe lemeria ero toto ia i ol.
9Iok nga etuene pule Iosep mamani pe maopene mule pe heleia lange titina mur ke teke, “A longo at e maopek mule ke chaia pe teio pe itoch mur nge iri analoch pe elle (11), te tualou sio atat nge iau.”
10Iosep nene maopene ngana nei lange temene pe titina mur pule pe temene hele salia i ke teke, “O maopem ngam nem ma ke nek nga letek ero iam. O teke lape iau pe tam pe titim mur, mo tualou sio lange iong nga matam ma?”
11Iosep titina mur leteria chercher tau tote i pe temene letena tuanin rara ia ke halang.
12Mala ero mana pe Iosep titina mur te lange Sekem ke te nauelele reria sipsip mur,
13pe Israel hele lange Iosep ke teke, “Titim mur pau kou te nauelele sipsip mur nge Sekem. O iat, lape e kulosia iong ke o lange iri.” Pe Iosep hele, “Iok.”
14Pe temene hele lange i ke teke, “O la ke o nau tote titim mur pe sipsip mur. Nenge teke te tu ke urana mana, o iat ke o hele toto mule nge iau.” Nga etue neu Iakop pe nena hana mur tetu nga mos nge Hepron. Pe Iosep lohaka nga lamau pe i ke la. Iosep la ke lohot nge Sekem,
15pe non e saholia i nge i rara pulut manmana nga ich neu pe onteia i ke teke, “O tango rerere utar?”
16Pe I tuacholia ke teke, “E tango rerere titik mur nge te naulelele lemem sipsip pe meme mur nga lamai. O naue iri pule?”
17Pe non neu hele ke teke, “Oe e naue iri pe e longe iri nge te hele ke te teke, ‘Ta lange Totan.’” Pomalam Iosep nanasia titina mur pe la apenia iri nge Totan.
18Pe titina mur te naue i la nga tau kura pe te etei-il mene i nga nena hengeron. Ol pe tetal helenga ke te teke te hune i.
19Pe te hele tele hel nge iri ke te teke, “I pa nenge maopenpene iam atat pa nem.
20A iat, ta hune i pe ta sau teua i la nga ech matana ana polo e pe ta hele lange temere ke ta teke ur inolo e hune. Ke ta nau iam nga maopene ngana panem.”
21Pe tiria nenge soke ene Rupen. Ana non longe ke mau pe teke poi ala ana pe hele lange iri ke teke, “Ah! ta hune i ero.
22Ta in toho ero. Ta sau teu mene i langa ech matana ana polo e nga ich sana lomona nei.” Rupen hele ke pomau iange teke mene hot kome i pe mene i ke la mule ia nge temene.
23Ke nga etue nenge Iosep apen teu nge titina mur, te laua i pe te haka hote nena hengeron sase ngana nenge heron ia,
24pe te mene i ke la te sau teua i nga ech matana ana polo e. Ech matana ana polo neu polpolo mana iange ech soso hatalia lo.
25Iok, te are sio ke te teke te ngaungau pe te naula pe te esia hana nenge te lohot nga mata nenge Ismael, nge te lohaka nga kileng nenge Kiliat ke te atat. Hana nemur te i ia reria lulu pe reria kamel mur te takisia ure nemur nenge ururia haka toto pe ae eina inangana he-ech ngana mur nenge ene Pam pe nenge ene Mir ke ramaria sio lala nge Ekipto.
26Pe Iuta hele lange titina mur ke teke, “Ita mai, nenge teke ta hune tira pe ta channanga mana ia ute eina ke ta teke i eina ia, lape ta mene urura utar?
27A nau at, ta hune i ero iange i tira ia pe eira ia. Ta laia i nge hana Ismael nemur ke te olia i at nge ita.” Pe titina mur te hele, “Iok lape tapoi ke pomalaka nga o hele ngam.”
28Iok, hana nenge te hekulkulo ure neu reria nge Mitien. Iri te i ke te at pe Iosep titina mur te tak haka hote i nga ech matana ana polo, pe te tunge Iosep lange hana Ismael nemur. Pe hana nemur te olia Iosep nga umtutuna iri ana non kina elle pe te mene i ke te lange Ekipto.
29Iok, Rupen la mule nga ech matana ana polo pe nau pe Iosep i ero. Ol pe ta chachia nena hengeron.
30Pe la mule nge titina mur pe hele, “Kol nei i-i ero nga polo mai! Lape e poi ke mere mai?”
31Ol pe te hune meme e pe te mene Iosep nena hengeron sase ngana neu pe te panun teua la nga meme neu eina.
32Pe te mene hengeron sase ngana neu la mule nge temeria pe te hele ke te teke, “O nau at, mo hottaua ure nei koi. O nau urume ke nek lape tum kai nena mai?”
33Pe temeria nau urume pe hele, “Oe, Kolek nena hengeron laka! I kou lape ur hinolo pele hel te hune pe te lis ule lo.”
34Ol pe Iakop tachach hule nena hengeron pe heron heke hengeron nenge tanginga ana ia pe tangia tuna pe kila ia ana lete ke etue halang.
35Pe tutuna nemur nenge tatamanna pe heheina te teke te la ke te he maluche letena pe lemene ero. Pe hele, “A he maluche letek ero. Lape e tangtang ia tuk ke la het nga etue nenge e nanasia i langa polo. Ke pomalam temene tang manmana ia i.”
36Nga etue neu Mitien mur te lohot nge Ekipto pe Potipa olia Iosep lange iri. Potipa i Parao nena non soke ia pe i non nenge nauele hana nenge te nauelele ne Parao nena pele.
