1Iok Apraham lohaka nge Mamre pe loloun langa tuele kina nenge Nekep pe lake are nga kileng Kates pe Sur tunangaria. Ke Apraham tu nge Kerar ke mala pol.
2Ol pe hele urume nehei Sara ke teke, “Hei nei iau liuk ia.” Pomalam Apimelek hekulo Sara ana pe te mene lange i.
3Pe ero NeHalang lohot nge Apimelek nga ma opene ngana pe hele lange i ke teke, “Iong lape o mete iange hei nenge o mene nem, lei lo laka.”
4Pe Apimelek hele ke teke, “Non Soke nenge teke none poia poinga poreke ngana e ero, lape o hun suo mene i luluch nge nena hana mur ma?” Apimelek hele ke pomau iange poia poinga poreke ngana e lange Sara ero kura.
5Pe Apimelek hele mule lange NeHalang ke teke, “Apraham hele at nge iau ke teke, ‘Hei nei iau liuk ia.’ Pe Sara hele ke teke, ‘Non nei iau tik ia.’ Nga etue nenge e mene hei nei letek ke e teke e poia poinga urana ngana mana lange i pe e poia poinga poreke ngana e lange i ero.”
6Pe Nehalang hele lange i nga ma opene ngana neu ke teke, “Oe, E eteia ke iong letem ke o teke o poia poinga urana ngana mana. Pe lemek ero nge o poia poinga poreke ngana e nga matak. Ke ngana laka nenge e poi hele iong ke o ma luluch nge hei nem ero.
7Heueu nei o tung mule hei nem lange ene iange ene i hetatalonga ia. Pe hei nem ene lape hetalaulau am ke o tu ke o maulul. Pe nenge teke o la muleia hei nem nge ene ero, o etei mellehe mene ke iong pe lem hana mur lochloch lape a mete.”
8Nga uach uruna toto Apimelek iua nena hana papalauna mur pe heleia ure lochloch ngana nenge NeHalang heleia lange i nga ma opene ngana, pe hana nemur te matau toto.
9Iok, Apimelek iu teua Apraham pe hele, “Pomerei nenge o poia imem ke pomai? Iau mai e poia poinga poreke ngana e lange iong ke merei toto, nenge o poia iau pe lek naunga-ala ana kileng ke mo tu teu nga poinga poreke ngana nei? Poinga nemur nenge toinge o poia at nge iau ero, ngana koi o poia at nge iau nei.”
10Pe Apimelek onteia Apraham ke teke, “Lem huna nga utar toto nenge o poia poinga nei?”
11Pe Apraham tuachol ia ke teke, “E poi ke mai iange nga letek e teke, ‘Mele nga kileng nei mataua NeHalang ero toto pe lape te hune iau pe te mene lek hei.’
12Pe i manmanna ke, iau liuk toto ia, iange imem nai tememem elle pe tamem altoto pe iau lek hei laka i.
13Pe nga etue nenge NeHalang hele at nge iau ke e hile temek na pele pe e loloun rara langa kileng mur, e hele lange ana hei ke e teke, ‘O henonou hote mutemngam at nge iau ke mai koi: Nga kileng lochloch ngana nenge ta la ia o hele ke o teke, “Non nei iau tik ia.” ’”
14Ol pe Apimelek tung mule Sara lange Apraham pe mene sipsip tatamanna pe heheina pe pulumakau tatamanna pe heheina pe hehei pe hana nenge te ume manmana pe tunge iri lange i pule.
15Pe Apimelek hele lange Apraham ke teke, “O naula lek ich kou lochloch ngana neu; ol la pe o are nga lemem ngam.”
16Pe Apimelek hele lange Sara ke teke, “E tung ke um tutuna iri halang (K1000.00) lange tim Apraham. E tung mata hue ngana ana ia, nenge lange iri lochloch ngana nenge te tu luluch nge iong ke te eteia ke iong o poia poinga poreke e ero.”
17Ol pe Apraham hetalaulau lange NeHalang ke hemas mule Apimelek pe ne hei pe nena hekuleileinga ana hehei mur ke te hoho mule.
18Non Soke poi hele hehei lochloch ngana nenga Apimelek nena pele ke te hoho ero, iange nga poinga nenge lohot nge Sara.
