1Iok laol, Iosep la pe hele lange ne Parao ke teke, “Temek pe titik mur te lohaka nga ich nenge Kenan ke te at lo. Iri kou te are nga tuele kina nenge Kosen. Pe te lochlochia reria sipsip mur pe pulumakau mur pe reria urelu mur lochloch.”
2Pe Iosep mene ke titina mur nge iri lime ke heteia iri lange ne Parao.
3Ol pe Parao onteia Iosep titina mur ke teke, “A umumeia ume utar mur?” Pe iri te tuacholia ke te teke, “Non soke, imem sipsip ana naunga-ala mur ke pomange lemem tete mur nge nike.”
4Pe te hele lange i pule ke te teke, “Non soke mo at ke mo tu pol nga lamai mukam, iange uringa palaungana nei lohot ke poreke toto nga ich nenge Kenan. Pe lemem sipsip mur aria ngaunga ero iange heilil ero. Ke pomalam non soke, o longele imem ke mo are nga tuele kina nenge Kosen mukam.”
5Ol pe Parao hele lange Iosep te teke, “Temem pe titim mur te at laka nge iong.
6Ke pomalam o naue ich e nge urana toto nge Ekipto pe o tunge lange iri ke te are ia. Teke mere pe te are nge Kosen lo la. Pe nenge teke o eteia hel nge te etei tote ume nenge te nauelele pulumakau mur, o talue iri ke te nauele lek pulumakau mur pule.”
7Iok, Iosep hei ia temene Iakop ke heteia i lange ne Parao. Pe Iakop hele sinanga toto lange ne Parao.
8Pe ne Parao onteia i ke teke, “Am hesinga ia lo?”
9Pe Iakop tuacholia ke teke, “E tu nga ich nei ke sase ero mana. E tu ke ak hesinga iri ana non kina iri rahtele elle pe analoch (130) pe ure meena ngana halang te lohot nge iau. Pe lek tete mur te tu ke sase toto nga ich nei ke aria hesinga halang toto.”
10Iok, Iakop hele sinanga toto mule lange ne Parao pe la sapele.
11Pe Iosep nanasia ne Parao hele ngana ke here temene pe titina mur nge Ekipto. Pe tunge reria ich e nge urana toto ke te are ia. Ana ich tu nga tuele kina nenge Remesis.
12Pe Iosep nauele temene pe titina mur pe iri lochloch ngana nenge te at luluch nge temene pe tuturia mur nga ngaunga.
13Uringa palaungana nem lohot ke poreke toto nga ich lochloch ngana pe heporeke tote ich nenge Ekipto pe ich nenge Kenan pule.
14Pe hulua lochloch ngana nge Ekipto pe Kenan reria umtutuna het mana ia ngaunga ol ngana. Pe Iosep loloch ia umtutuna nemur pe laia iri nga ne Parao nena pele.
15Iok, nga etue nenge Ekipto mur pe Kenan mur reria umtutuna het lochloch, Ekipto mur tela nge Iosep pe te hele ke te teke, “O tung mana emem ngaunga ol iange lemem umtutuna het tah lo. Eh pomere, lape mo mete sio mana nga matam ol?”
16Pe Iosep hele lange iri ke teke, “Nenge teke lemo umtutuna ero ol, iok a mene lemo huros mur at nge iau ke amo ngaunga uruna ia.”
17Pomalam te mene reria sipsip pe meme mur pe pulumakau mur lange Iosep pe Iosep tungtunge aria ngaunga. Pe te poi manmana ke mau kela hesinga neu het.
18Iok hesinga neu het ke la pe hesinga e pule at. Pe te la mule nge Iosep pe te hele ke te teke, “Non soke mo talkome ele ute e nge iong ero. Lemem umtutuna het lochloch lo pe o loloch taua lemem sipsip mur pe meme mur pe pulumakau mur ke het tah lo. Pe lemem ute hel nge lape mo tunge lange iong ero ol. Imem mana pe lemem ich mur mana koi mo tu ol.
19Lape mo mete pe mo hile sio mene lemem ich mur heueu i. O olia imem pe lemem ich mur pule nga ngaunga mana. Urana nge mo lohot ke ne Paraoh nena hekuleileinga ana hana mur imem pe mene lemem ich mur pule. Pe o tung emem ngaunga ke mo maul pe mo mete sio mana ero. Iange lape mo hile sio mene lemem ich mur ke tetu loulou mana heueu.”
20Ke uringa palaungana nem poia hehei pe hana lochloch nge Ekipto ke te hekule reria ich ke Iosep olia iri. Ke pomalam ne Paraoh mene ich lochloch ngana nge Ekipto ke nena ia.
21Ol pe Iosep poia hehei pe hana nga kileng lochloch ngana nge Ekipto ke la te tu nga tuele tana mur. Talune nga kileng ana oro hele ke la nga hele.
22Pe Iosep olia tunginga ana hana mur reria ich ero iange ne Parao ololia iri. Pe iri siporia te olol aria ngaunga nga reria umtutuna mur.
23Ol pe Iosep hele lange hehei pe hana ke teke, “A longo at! Heueu nei e olia imo pe e ol hote lemo ich mur pule ke ne Parao nena ia ol. Pe ngaunga tutuna alona mur koi, amene ke la a tue nga amo ume mur.
24Pe nga etue nenge ngaunga mera a lasia ke huna iri lime. Pe huna elle a tunge lange ne Parao pe henel a rahite. Pe a talue hel ke alona ke a tua mulmule iri. Pe nenge teke hel te mama kura, imoul lemo hehei mur pe tutumo mur amo ke a ngaua.”
25Ol pe hehei pe hana te hele ke te teke, “Non soke o hemaul tote imem lo. Pomalam lape mo tu ke nek pe mo ume manmana nge ne Parao ol.”
26Iok la ol Iosep talue hotonga e nge Ekipto ke teke, nga etue nenge ngaunga te mera nga ume, hehei pe hana te lasia ke huna iri lime. Pe huna elle te tunge lange ne Parao. (Ke heueu nei te nanasia hotonga neu kura). Pe ich nenge tunginga ana hana mur mana, ne Parao mene ke nena ia ero.
27Iok Israel mur te tu nge Ekipto nga tuele kina nenge Kosen pe te mene ich mur nga lamau. Pe te hoho lele le tuturia mur iri halang toto.
28Iok, Iakop tu nge Ekipto ke ana hesinga iri analoch pe rahtele nai (17). Pe ana hesinga lochloch lohot ke ana non kina iri rahtele nai pe rahtele nai (147).
29Iok Iakop amnei urume i ke ana etue nenge mete ia at ke rochroi lo. Pomalam hekulo tuna Iosep ana ke at pe hele lange i ke teke, “Nenge teke mutem tau tote iau, iok o talue perim nga haek ene pe o poia helenga kerkereng ngana ke o poi ke urana at nge iau, ke o alohite iau nge Ekipto ero.
30Ke nga etue nenge e mete ke e lange lek tete mur, o alohite iau nge Ekipto ero. O takisia iau langa lek tete mur te ma ngaria pe o alohit luluche iau nge iri.” Pe Iosep hele, “Lape e poia ke pomanga o hele ngam.”
31Pe Iakop hele mule ke teke, “O hele ke manmanna toto at nge iau.” Pe Iosep hele ke manmanna toto lange i. Pe Iakop iech pe puo sue palpanna la nga nena hete palpanna.
