1Ke NeHalang ala hote tapa pe ich pe ure lochloch ngana nenge te tu heueu nei ke pomalam mana.
2NeHalang heulo hote nena ume lochloch ngana nenge popoia ke het pe nga etue rahtele nai ngana tah eingana pe tu mana ol.
3Ke nga etue rahtele nai ngana NeHalang ume ero ol. Tu mana pe pete etue neu pe poia ke i etue nenge heo ngana.
4Ke tapa pe ich ana nananga pomalam mana. NeHalang ume hote ume nenge Eten nga etue nenge ala hote tapa pe ich.
5NeHalang ala hote tapa pe ich pe heilil pe ae mur te haka ero iange pitte ero pe none nge tutua ngaunga nga ich ero.
6I manmanna ke pitte ero pe mo sio nga ich lochloch pe pach haka ke pomanga ech matana ke lome ich sana lochloch.
7Ol pe Non Soke NeHalang eu hiraua ich unne ke pip hot non ia. Pe iu teua eingana nenge maulinga ana langa non neu ina ponna pe non neu sechsech haka sapele.
8Non Soke NeHalang tue ume e nga chaia haka ngana nge Eten pe here non nenge alahote nem ke tu ia.
9Pe Non Soke NeHalang poia ae nenge urana pe ngaunga ia ke te haka nga ich nenge ala hote. Pe ae nenge maulinga ana mes nga ume tunangana pe ae nenge lete matana ngana ana nga utar nenge urana pe utar nenge poreke mes pule.
10Pe ech tana e lele hot nge Paratiso ke tunge ech langa ume nem. Pe ana ech poke hot ke ech tana iri henel.
11Pe ech tana nenge lele nga ich sana nenge um chalemlem ngana tuia nge Hauila, ene ech Pison.
12Pe um chalemlem ngana pe ae nenge inangaria heech tetu nga ich neu pule.
13Ech nenge Kion i ech tana nei ngana ia nenge lele nga ich lochloch nge Kus.
14Pe ech tana molngana ene Taikiris pe lele nga ich lochloch nge Asiria nga chaia haka ngana. Pe ech tana henel ngana ene Uprates.
15Iok Non Soke NeHalang talue non neu ke umume pe nauelele ume neu.
16Non Soke NeHalang hele lange non neu ke teke, “O ngau nga ae lochloch ngana nenga ume
17pe ae nenge lete matana ngana nga poinga nge urana pe poinga nge poreke o ngaua ero. Iange nenge teke o ngaua o mete sapele.”
18Iok Non Soke NeHalang hele, “Non nei i toro mana tu pe poreke i. Pomalam lape e ume hote neingana e nge pomange i ke halaulaua i.”
19Non Soke NeHalang ume hote ur inolo mur pe ngie mur nga tapa sana pe ure nemur nenge te amamo nga ich ke het pe laia iri nge Antam ke hetue iri nga eria mur.
20Pe Antam tunge kolok mur eria pe ngie mur nga tapa sana pe ure inolo mur nga eria. Pe Antam pekngana pele nge halaua i ero.
21Pe Non Soke NeHalang poia Antam ke mamani hun toto. Antam mamani hun toto pe NeHalang siu hote kina e nga alisina pe poi hele mule nga ulina.
22Non Soke NeHalang ume hote heie nga Antam kina nenge siu hote nga alisina ke het pe tunge i lange Antam.
23Pe Antam hele, “Ute nem nakuna mange iau iam. Pe lape e hetue i ke ‘hei’ iange i lohot nga kik pe nga mirak.”
24Ke pomalam none ile temene pe tana pe la ke tu luluch nge nehei pe iri nai te lohot ke iri elle.
25Antam iri nai Eua singiria lachlach mana pe tetu ke elle pe te meia iri ero.
