Talun Ngana 11

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Nga telengana toto hehei pe hana nga kileng lochloch nga ich te heleia helenga elle mana.

²Te lohaka nga chaia haka ngana pe te i ke la te are nga mos nge Papilon.

³Pe nga hoena te hele tele hel nge iri ke te teke, “A iat, ta mene melete pe maha ke perra ule pe ta hemilangia iri ke te lohot ke iri um nenge ene prik” Pe te mene ure nenge pilpile ke manga pulos nenge te hepile tele um nemur ia.

⁴Pe te ngai haka hel ke te teke, “A iat ta lele heke ita sipora rera tuele tana nenge mokona la ke tottole teu nga tapa sana. Pomalam lape pingara song pe ta loloun rara ke tala nga ich lochloch ero ol.”

⁵Pe ero. Non Soke sio at ke naue tuele tana neu pe ana pele ona haka ngana nenge ana malang sase haka toto nenge hana nemur te umume ia.

⁶Pe Non Soke letena tuanin ke teke, “Hana nemur iri elle pe te heleia helenga nge elle mana. Te ume ia tuele tana palaungana nem lo pe nga hoena lape te ume ia ure hel pule nga lemeria ngaria.

⁷A iat, ta sio la ke ta hepiriu ele reria helenga ke te longo hel nge iri ero ol.”

⁸Ke Non Soke sisparaia iri ke te tu purpure kileng lochloch ngana nga ich pe te ume mule tuele tana neu ero ol.

⁹Ke pomalam te hetue tuele tana neu ke Papel iange Non Soke hepiriu hele reria helenga pe te sisparai ke tetu purpure kileng lochloch ngana nga ich.

¹⁰Nananga nenge Sem nena tete mur. Ech taua kileng mur ke hesinga nai la lo, pe Sem ana hesinga iri ana non kina iri lime pe hoe tuna Arpakset.

¹¹Ke het pe Sem tu mule ke ana hesinga iri ana non kina iri ana non kina elle pe ana non kina lime (500) pe hoho mule tutuna mur tatamanna pe heheina hel pule.

¹²Pe Arpakset ana hesinga iri ana non kina elle pe analoch pe lime (35) pe hoe tuna tamane ngana e pe hetue ke ene Sila.

¹³Ke het pe Arpakset tu mule ke ana hesinga iri ana non kina iri ana non kina elle pe mol (403) pe hoho mule tutuna mur tatamanna pe heheina hel pule.

¹⁴Pe Sela ana hesinga iri ana non kina elle pe analoch (30) pe hoe tuna tamane ngana e pe hetue ke ene Eper.

¹⁵Ke het pe Sela tu mule ke ana hesinga iri ana non kina iri ana non kina elle pe mol (403) pe hoho mule tutuna mur tatamanna pe heheina hel pule.

¹⁶Pe Eper ana hesinga iri ana non kina elle pe analoch pe henel (34) pe hoe tuna tamane ngana e pe hetue ke ene Pelek.

¹⁷Ke het pe Eper tu mule ke ana hesinga iri ana non kina iri ana non kina elle pe ana non kina elle pe analoch (430) pe hoho mule tutuna mur tatamanna pe heheina hel pule.

¹⁸Pe Pelek ana hesinga iri ana non kina elle pe analoch pe hoe tuna tamane ngana e pe hetue ke ene Reu.

¹⁹Ke het pe Pelek tu mule ke ana hesinga iri ana non kina iri analoch pe rahtele henel (209) pe hoho mule tutuna mur tatamanna pe heheina hel pule.

²⁰Pe Reu ana hesinga iri ana non kina elle pe analoch pe nai (32) pe hoe tuna tamane ngana e pe hetue ke ene Seruk.

²¹Ke het pe Reu tu mule ke ana hesinga iri ana non kina analoch pe rahtele nai (207) pe hoho mule tutuna mur tatamanna pe heheina hel pule.

²²Pe Seruk ana hesinga iri ana non kina elle pe analoch (30) pe hoe tuna tamane ngana e pe hetue ke ene Nahor.

²³Ke het pe tu mule ke ana hesinga rir ana non kina analoch (200) pe hoho mule tutuna mur tatamanna pe heheina hel pule.

²⁴Pe Nahor ana hesinga iri ana non kina elle pe ratele henel (29) pe hoe tuna tamane ngana e pe hetue ke ene Tera.

²⁵Ke het pe tu mule ke ana hesinga iri ana non kina lime pe analoch pe rahtele henel (119) pe hoho mule tutuna tatamanna pe heheina mur hel pule.

²⁶Pe Tera ana hesinga iri ana non kina mol pe analoch (70) pe hoe tutuna nemur: Apram pe Nahor pe Haran.

²⁷Nananga Nenge Tera Nena Tete Mur. Tera tutuna mur laka Apram pe Nahor pe Haran, pe Haran tuna laka Lot.

²⁸Pe Haran mete nga nena kileng huna nge Ur nge Kaltia, nga ich nenge tana hoe i ia. Nga etue nenge mete, temene tu ke maulul kura.

²⁹Pe Apram pe Nahor te lei. Ke Apram nehei laka Sarai pe Nahor nehei laka Milka nenge Haran tuna pe liuna laka Iska.

³⁰Sarai hoho ero. Mes tamane mana.

³¹Iok, Tera mene tuna Apram pe nette Sarai nenge Apram nehei pe nette Lot nenge Haran tuna, pe iri lochloch te hile reria kileng huna nge Ur nge Kaltia pe te i ke te lange Kenan. Pe nga etue nenge te lohot nge Harran, te la ero ol. Te tu mana lamau ol.

³²Pe Tera tu nga ich ke ana hesinga iri ana non kina iri analoch pe lime (205) pe mete nge Harran.