1Iok, Isak matana hit pe naue ute e ero ol iange tuauna toto lo. Pe nga etue ene hekulo tuna Esau ana. Esau i tuna nenge tengene ana. Pe hele lange i ke teke, “Tuk.” Pe Esau tuacholia ke teke, “Ou! Iau koi.”
2Pe Isak hele, “Iau e tuauna lo pe e eteia etue nenge e mete ia ero.
3Ke o mene lem io pe rurumunga ana mur pe o la ke o rurum pe o hune ak huros inolo ngana e at.
4Pe o tune ak ngaunga nenge inangana heech nenge mutek tau totote pe o mene at nge iau ke e ngaua. Ke het pe e pete iong pe e hele urume ure lochloch ngana lange iong - ke het pe e kulala mana ak metenga ol.”
5Pe Repeka longo tote Isak nge hele lala nge tuna Esau. Pe nga etue nenge Esau la ke rurum,
6ana hei hele lange tuna Iakop ke teke, “E longe temem nge hele lange tim Esau ke teke,
7‘O hune huros e pe o tune ak ngaunga nenge inangana heech nenge mutek tau totote ke e ngaua, pe e pete iong nga petanga nenge Non Soke teke tunge lange iong. Ke het pe kulala mana ak metenga ol.’
8Ke tuk, o longo at nge iau ke nek toto pe o poia utar nenge e heleia lange iong.
9O la nga rera meme mur te tu ngaria pe o mene ais ngana nai nge te lum toto at nge iau. Pe iau sipok e tune ngaunga inangana heech ngana nenge temem mutena tau totote.
10Ke het pe o mene lange i ke ngaua pe pete iong. Pete iong ke het pe kulala mana ana metenga ol.”
11Pe Iakop hele lange tana Rebeka ke teke, “Ero iam! Iange tik Esau singina pulpulna halang pe iau ero.
12Ke nenge teke temek rah nga singik, etei mellehe mene ke iau pe pete iau ero. I lape teke e hesalanglang ia i pe lape poia ure meena ngana e ke lohot nge iau.”
13Pe tana hele lange i ke teke, “O nanas mene utar nenge e heleia lange iong ke ulolo. O la ke o mene meme nemur at nge iau. Iau lape e mes hele ure meena ngana nem.”
14Iok la ol, Iakop lake mene meme nemur pe laia nge tana ke tune ngaunga inangana heech ngana nenge temene mutena tau totote.
15Pe Repeka mene hote tuna nenge soke Esau, nena hengeron urana ngana mur nenge tattalue nga pele pe heron heke nge tuna nenge kino nenge ene Iakop.
16Pe mene meme pulpulna pe kale heke nga Iakop penna pe nga kanna nenge pulpulna ero.
17Ke het pe tunge ngaunga inangana heech ngana neu pe beret nenge makia lange tuna Iakop.
18Pe Iakop laia nge temene pe hele, “Temek.” Pe temene hele, “Kolek, Utar. Iong itei malam?”
19Pe Iakop hele lange temene ke teke, “Iau Esau i, tum nenge tengene ana. E poia ure nenge o heleia at nge iau ke het lo. O kila haka ke o ngaua huros nenge e rurumia, ke het pe o pete Iau.”
20Pe Isak onteia tuna ke teke, “Kolek, pomerei nenge o hune huros nem ke ueiuei mana mam?” Pe Iakop tuacholia ke teke, “Am Soke NeHalang laka halaua iau ke e hune.”
21Ol pe Isak hele lange Iakop ke teke, “Kolek, o hele teu at ke e ra nga singim. Lape iong Esau ke manmanna lo ma?”
22Iok, Iakop hele teu la rochroi nge temene Isak. Pe temene rahaka nga singina pe hele ke teke, “O hele ngam pomange Iakop pe perim pomange Esau.”
23Pe i manmanna ke i Iakop pe Isak eteia ero iange penna pulpulna halang ke pomange Esau. Ke pomalam Isak pete sapele i.
24Pe Isak ontei mule ke teke, “Kolek, Iong Esau ke manmanna lokai?” Pe Iakop tuacholia ke teke, “Oe, iau iloi.”
25Ke het pe Isak hele, “Kolek, o mene huros nenge o hune at ke e ngaua pe e pete iong.” Iok, Iakop mene la i ngaua pe mene uaen hel lange i ke inia.
26Ke het pe temene Isak hele lange i ke teke, “Kolek, o iat ke o lau hite iau.”
27pomalam Iakop la ke lauhite i. Pe Isak seke hengeron nenge Iakop heronia inangana pe pete i pe hele ke teke, “Aiom! Kolek inangana pomanga ume nenge Non Soke pete pe poia ke urana toto.
28E hetalaulau ke NeHalang poia mo nga tapa sana ke lome am ume mur nga ich pe poia am uit pe uain mur ke halang toto.
29Pe poia hehei pe hana nga kileng hel ke te ume nge iong pe te tualou sio lange iong. Pe poia iong ke iong soke nge titim mur pe titim mur te tualou sio lange iong. Pe poia ure poreke ngana ke lohot nge iri nenge te poia ure poreke ngana lange iong. Pe poi ke urana lange iri nenge te poi ke urana lange iong.”
30Isak pete Iakop pe hele urume ure lochloch ngana lange i ke het pe hile temene pe lohaka ke la. Lohaka ke lala pe Esau mule rurumunga ana ke at puris.
31I pule tune ngaunga hel nge poia ke inangana heech pe mene at nge temene. Pe hele lange temene ke teke, “Temek o are haka ke o ngaua am huros nenge e hune, ke het pe o pete iau ol.”
32Pe temene onteia i ke teke, “Ia iong itei nemam?” Pe i tuacholia ke teke, “Iau Esau, tum nenge tengene ana.”
33Ol pe Isak ngana lohot pe loiloi pe hele ke teke, “Pe itei nenge rurumia huros pe mene at nge iau ke e ngaua mai? E ngaua ke het pe e pete i pe iong o at ke o puris. Pe petanga nenge e tunge lange i nem lape tu luluch nge i ke koko!”
34Nga etue nenge Esau longe temene nge hele ke mau, tul heke tanginga pe tang ke soke toto. Pe hele lange temene ke teke, “Temek o pete iau pe o hele ia lem petanga ana helenga mur at nge iau pule!”
35Pe temene hele ke teke, “Tim at pe channanga ia iau ke lem petanga pau kou e tunge lange i pam lo.”
36Ol pe Esau hele lange temene ke teke, “Kol nem ene nenge Iakop nem pete tote i iange pallaka hali. I pallaka ia iau ke henai ngana koi. Nga tele ngnana mene mullik ke teke i palaungana pe heueu nei mene tote lek petanga!” Pe Esau onteia temene ke teke, “Temek pomere? Lek petanga e kau kura nge lape o tunge at nge iau?”
37Pe Isak tuacholia ke teke, “Ero ol iange e poia i ke i soke nge iong lo. Pe e poia alona mur lochloch ke te ume mule nge i. Pe e hele ke e teke i lape ana uit pe uaen halang toto. Ke kolek, lape e poia iong ke mere mam ol? Ute e nge lape e tung lange iong ero ol i.”
38Pe Esau hele lange temene ke teke, “Temek, nenge teke lem petanga elle tu kura o pete iau pule!” Pe Esau tang ke soke toto mule.
39Ol pe temene hele lange i ke teke, “Iong lape o tu teu la nga ich urana ngana ero pe mo nenge sio at nga tapa nga miliko sio nge iong ero pule. Lape otu ke kangkanga toto nga ure nemur.
40Pe lape o kila ke nek ero. O kila ne ke nek pe o ngau mana nga ure nemur nenge a hunel pe o lolochia iri. Pe lape o ume manmana nge tim. Pe nenge teke o amnea ke o teke oua, lape o sau sue ure meena ngana nem pe i lape nauele mule iong ero ol.”
41Iok la ol, Esau letena inin tau tote Iakop iange mene tote nena petanga nge temeria Isak. Pe helele nge isipona ke teke, “Musuna pol mana pe lape temek mete pe lape mo are ia ana lete. Pe nga hoena lape e hune Iakop ke mete.”
42Iok la ol, nga etue nenge helenga neu sasa ke la lohot nge Repeka, ana hei hekulo tuna Iakop ana pe hele lange i ke teke, “O longo at, tim Esau letena inin taua iong ke teke hune iong nga poinga nenge o poia nem.
43Ke pomlam e hele pe o nanas mene lek helenga. Heueu mana nei o ua ke la otu luluch nge tik ne Lapan. I kou tu nga kileng nenge Haran.
44O la pe o tu luluch nge i ke mala pol ke tim Esau letena maluch sio mukam.
45Pe nga etue nenge letena maluch sio pe letena heke mule poinga nenge o poia lange i nem ero ol, lape e hekulo am ke o at mule nga lamai. Iange lemek ero nge a hunel imo nai ape ke a mete nga etue elle.”
46Ol pe Repeka hele lange Isak ke teke, “Lemek ero toto hehei Hitae mur. Nenge teke Iakop leia hei Hitae e nge mange hehei nai nei nga ich nei, iau e teke e mete mana ol, iange lemek ero toto hehei Hitae mur.”
