1Iok Iakop heukiraua nena urelu mur pe i pe tutuna mur pe na tete mur te lohaka ke te lange Ekipto. Te la ke te lohot nge Pesepa pe Iakop poia tunginga lange NeHalang nenge temene Isak ana Soke ia.
2Pe nga miliko NeHalang lohot nge Israel nga opene ke teke, “Iakop! Iakop!” Pe Iakop tuacholia ke teke, “Iau koi.”
3Pe NeHalang hele, “Iau NeHalang nenge temem ana Soke ia. O lange Ekipto pe o matau ero. Lape E poia lem tete mur ke te lohot ke iri hulua toto nga lamau.
4Iau lape e la luluch nge iong nge Ekipto pe lape e mene mule iong at lamai. Pe nga etue nenge o mete, Iosep isipona lape alohite iong.”
5Iok Iakop lohaka nge Pesepa pe tutuna mur te songia i pe nena tete mur pe reria hehei mur nga ure ana takisinga mur nenge ne Parao hekule ke teke te takis iri ia.
6Ke Iakop pe nena tete mur te lange Ekipto luluch nga reria pulumakau mur pe reria urelu mur lochloch nenge te mene iri nge Kenan.
7Iakop mene tutuna mur nenge tatamanna pe heheina luluch nge nena tete mur nenge tatamanna pe heheina ke iri lochloch tela nge Ekipto.
8Iri lochloch ngana nenge te la luluch nge Iakop nge Ekipto, eria mur koi nei: Iakop tuna tengene ana nenge ene Rupen.
9Rupen tutuna mur laka: Hanok pe Pallu pe Esron pe Karmi.
10Pe Simion tutuna mur laka: Iemuel pe Iamin pe Ohat pe Iakin pe Soar pe Saul. Saul tana nena nge Kenan.
11Pe Leui pe tutuna mur laka: Kerson pe Koat pe Merari.
12Pe Iuta tutuna mur laka: Er pe Onan pe Sela pe Peres pe Sera (pe Er pe Onan te mete lo nga te tu ngaria nge Kenan). Pe Peres tutuna mur laka: Esron pe Hamul.
13Pe Isakar tutuna mur laka: Tola pe Pua pe Iop pe Simron.
14Pe Sepulon pe tutuna mur laka: Seret pe Elon pe Ialil.
15Ke Rupen pe Simion pe Liuai pe Iuta pe Isakar pe Sepulon, Iakop tutuna tatamanna mur nenge te ha nge Lea nga tetu ngaria nge Mesapotamia. Pe te hoe turia hei ngana e pule nge ene Taina. Ke Iakop tutuna nemur, te lohot ke iri ana non kina elle pe analoch pe mol (33).
16Iok Kat tutuna mur laka: Sepon pe Haki pe Suni pe Espon pe Eri pe Aroti pe Areli.
17Pe Aser tutuna mur laka: Imna pe Isaua pe Isui pe Peria. Pe liuria laka Sera. Pe Peria tutuna mur laka: Heper pe Malkiel.
18Ke hehei pe hana nemur iri analoch pe ratele elle (16). Pe iri Iakop pe Silpa tuturia mur pe reria tete mur ia iri. Silpa i hei nenge Lapan longala hote ke umume nge tuna Lea.
19Iok Iakop iri nai nehei Resel tuturia mur laka: Iosep pe Pensamin.
20Pe nga etue nenge Iosep tu nge Ekipto, leia Asenat nenge ne Potipera tuna. Potipera i tunginga ana non ia nga kileng nenge Heliopolis. Pe Asenat hoe tutuna mur tatamanna nai. Eria laka: Manase pe Epraem.
21Pe Pensamin tutuna mur laka: Pela pe Peker pe Aspel pe Kera pe Naman pe Ehi pe Ros pe Mupim pe Upim pe At.
22Ke hana analoch pe henel nei (14), Iakop pe Resel tuturia mur pe reria tete mur ia iri.
23Pe Ten tuna elle mana: ngana laka Hasim.
24Pe Naptali tutuna mur laka: Iasiel pe Kuni pe Ieser pe Silem.
25Ke hana rahtele nai nei (7), Iakop pe Pila tuturia mur pe reria tete mur ia iri. Pila i hei nenge Lapan longala hote lange tuna Resel ke umume nge i.
26Iri nenge iri ul Iakop ke te lange Ekipto, iri Iakop tutuna mur pengpeng luluch nge tuturia mur. Pe te lohot ke iri ana non kina mol pe rahtele elle (66). Pe Iakop tutuna mur reria hehei mur, te sisala luluche iri ero.
27Pe Iosep tutuna mur nai nenge te ha nge i nge Ekipto, te sisala luluch teua iri pule. Ke Iakop matana alona mur pengpeng nenge tela ke te tu nge Ekipto, te lohot ke iri ana non kina mol pe analoch (70).
28Iok Iakop kulosia Iuta ke i muka ke la taua Iosep ke lange i nge Kosen. Ke nga etue nenge Iakop te lohot nga tuele kina nge Kosen,
29Iosep hele lange nena hana mur ke te tak hote ure ana tangakis hel ke la ke saholia temene nge Kosen. Nga etue nenge Iosep esia temene, lau hite i pe tang ke mala toto.
30Ol pe Iakop hele lange Iosep ke teke, “Kolek, e naue nakum lo pe e eteia ke o maulul kura. Pe nenge teke e mete ute pele ero ol.”
31Ke het pe Iosep hele lange titina mur pe iri lochloch ngana nenge te koko nge temene ke teke, “Lape e la ke e hele toto nge naunga-ala ana non ke pomai, ‘Titik mur pe iri lochloch ngana nenge te tu luluch nge temek nga ich nenge Kenan, te sauhot lamai lo.
32Iri hana nenge te nauelele sipsip mur. Pe te mene reria pulumakau mur pe meme mur pe kolok mur pe reria ure lochloch ngana ke te at.’
33Pe nenge teke naunga-ala ana non nem iua imo ke onteia imo ke teke, ‘A umume ia ume utar mur?’
34Imo a tuacholia i ke a teke, ‘Non soke, imem hana nenge mo nauelele sipsip mur pe pulumakau mur. Mo popoia ume nei nga imem kinkino ngamem nike ke at heueu nei, ke mange lemem tete mur nge nike.’ A hele lange i ke pomai, laka longele imo ke a are nga tuele kina nenge Kosen. Iange Ekipto mur lemeria ero toto hana nenge te nauelele sipsip mur.”
