1Iok mala pol lo pe non nenge nauelele naunga-ala ana non ana uain pe nenge makmak ana peret te poia poinga e nge aria soke naunga-ala nenge Ekipto neu lemene ero toto ia.
2Ke Parao letena inin taua nena hana papalauna nai nei; Non soke nenge nauelele ana uain pe non soke nenge nauelele hana nenge te makmak peret.
3Ol pe tal teua iri la nga tuele au ngana, nga pele nenge palinga hel ana hana mur aria soke. Pe Iosep tu teu nga tuele au ngana neu pule.
4Iri nai tetu ke mala pol nga tuele au ngana. Pe palinga hel ana hana mur aria soke neu hele lange Iosep ke nauele iri.
5Pe nga miliko e iri nai ape ke te maoperia nga etue nenge tetu nga tuele au ngana. E maopene ngana luna altoto nga e maopene ngana.
6Pe nga uach Iosep lange iri pe naue iri nai nge nakuria unun mana.
7Ol pe onteia Parao nena hana papalaungana nai nenge te tu luluch nge i nga ana soke nena pele ke teke, “Pomerei toto nenge nakumo unun mana mam?”
8Pe iri nai te tuacholia ke te teke, “Imem nai ape mo maopemem pe mele e nge hemallaha hote luria at nge imem ero.” Ol pe Iosep hele lange iri ke teke, “NeHalang i toro mana hemallaha hotote ta maopera ngara mur luria. A heleia a maopemo ngamo nemur at nge iau.”
9Ke non soke nenge nauelele uain nene maopene ngana lange Iosep pe nana ke teke, “Iau e maopek ke e naue uain tana e nge mes nga matak,
10pe uain tana neu penna iri mol. Nga etue nenge ina mur te lohot te rora pe te hei ke nganangana mera sapele.
11Pe ne Parao ana eulinga koi nga perik pe e mene uain ngangana nemur pe e pip teua eina la nga Parao ana eulinga pe e tunge lange i.”
12Pe Iosep hele lange i ke teke, O maopem ngam nem luna mai koi, “Uain penna mol nem heilangia etue iri mol.
13Etue mol het pe ne Parao lape mene hote iong pe tal teu mule iong nga mulim. Pe lape o tunge uain ana eulinga lala nge Parao ke pomanga o popoia nga tele ngana. Iange i nena non iong nike nenge o nauelele ana uain.
14Pe nenge teke ure lochloch ngana te urana mana nge iong, letem metene iau. Letem poreke ia iau pe o hele lange ne Parao ke mene hote iau nga tuele au ngana nei.
15Iau hana te kemeia iau pe te ech hote iau nga Hipru mur reria ich pe te mene iau at lamai. Pe e poia poinga poreke ngana e ero pe te tal teu mene iau nga tuele au ngana nei.”
16Iok Iosep henin hote non nenge nauelele uain maopene ngana luna pe non soke nenge nauelele peret mak ngana, longe nge urana mana. Ol pe hele lange Iosep ke teke, “Iau pule e maopek ke mai koi: Peret ana chasang iri mol ma haka nga palpaluk.
17Chasang nenga lut mutaia Parao ana ngaunga makinga kuena ngana mur nenge mutena tautaua. Pe ngie mur te at ke te ngau ngaua ngaunga nemur.”
18Ol pe Iosep hele, “O maopem ngam nem luna mai koi. Chasang mol nem heilangia etue iri mol.
19Etue iri mol het pe lape Parao nena palingahel ana hana mur te chotoa kalim pe te heon heke singim nga ae tana e. Pe ngie mur lape te at ke te ngau taua miram ke het.”
20Iok nga etue mol ngana Parao poia ngaunga matana e ke letena metene etue nenge tana hoe i ia. Pe iua nena hana papalauna mur at ke te ngau. Pe mene non soke nenge nauelele uain pe non soke nenge nauelele peret mak ngana pe hemesia iri nga nena hana papalauna nemur mataria:
21Pe tal teu mule non soke nenge nauelele uain nga munna ke tung mulmule uain ana eulinga lala nge I.
22Pe hele lange palinghel ana hana mur ke te heon heke non nenge nauelele peret ana makinga koluna nga ae tana e, ke pomanga Iosep hele ngana ia nenge henin hote maopene ngana luna lala nge i.
23Pe non soke nenge nauelele ne Parao ana uain neu, letena metene Iosep ero ol; letena lilil ele tote i.
