1Munu Saulanya palumpa tjaultji tjuṯatjara Pilitjiyanya nguraṟa tjuṯangka pikaringkunytjatjanu maḻaku pitjangu, ka kutjupangku palula tjakultjunu, Davidanya ilytjingka kumpiṟa nyinanytja ngura In-kitila itingka.
2Ka Saulalu wati Israelkunu tjaultji wiṟu tjuṯa kutju ngurkantanu nampa 3,000, munu tjananya katingu Davidanya ngurintjaku. Ka ngura nyara In-kitila itingka Davidanya wati maḻpa tjuṯatjara kumpiṟa nyinangi puḻi ini Nanikuta Inuṟala.
3Ka Saulanya palumpa tjaultji tjuṯatjara iwarangka ankula ankula wirkanu tjiipiku yaatangka iwarangka itingka, ka nyara palula kuḻpi ngaṟangi. Ka Saulanya kuḻpi palula tjarpangu tuwilataku. Palu Davidanya tjana kuḻpi nyara palula unngu mulapa kumpiṟa nyinangi, munuya Saulanya ngalya-tjarpanyangka nyangangi.
4Munuya wati panya tjuṯangku Davidala tjaalymaṟa wangkangi, “Ala, panya Mayatja Godalunta ngaṉmanytju alpamilantjikitjangku kalkuṉu, ka tjinguṟu alatjiṯulta tjiṉṯu nyanga paluṟu ngaṟanyi nyuntumpa mirpaṉtju tjuṯa pungkula wiyantjaku.” Ka Davidanya maṟamaṟa pitjangu Saulalakutu munu mantara panya Saulaku tjukutjuku kaṯaṉu kuuta tjaṉatja purkaṟa mulartu, ka Saulalu palumpa kuuta kaṯannyangka kulintja wiyaṯu.
5Palu maḻangka Saulaku kuuta kaṯantjatjanu Davidanya puḻkaṟa kuṉṯaringu.
6Munu paluṟu wangkangu wati panya tjaultji tjuṯangka, “Wantiya kura wangkanytja wiyangku. Nganaṉa Saulanya pungkunytja wiya, panya Godalu palunya ngurkantaṟa tjunu nganampa mayatja kinga nyinanytjaku, kaṉa palulanguṟu palula puṯu tungunpunganyi. Ngayulu Mayatja Godala tjapini nganaṉanya markuntjaku nganaṉa Saulanya pungkunytjaku-tawara.” Alatji Davidalu wangkara painingi palumpa tjaultji tjuṯa. Ka Saulalu kulintja wiyaṯu munu kuḻpinguṟu ma-pakaṉu.
8Ka Davidanya ma-pakaṉu kuḻpinguṟu panya munu ma-mirangu Saulaku, “Mayatjan wiṟu!” Ka Saulalu urulyaraṟa maḻakukutuṟa nyangu Davidanya tultjungaṟakatira yunpangku manta pampunnyangka.
9Ka Davidalu palula wangkangu, “Aṉangu kutjupa tjuṯangkuya nyuntula ngunti wangkanyi ngayulu nyuntunya iluntankunytjikitjangku wangkanyangka-palku. Palu tjanala kulintja wiyangku wantima. Nguntiya wangkanyi.
10Kulila, panya Mayatja Godalunta nyuntunya kuwari ngalya-katingu kuḻpikutu, kaṉanta tjinguṟu nyara palula alatjiṯu iluntanama. Panya wati tjuṯangkuṉiya wituwituningi nyuntunya iluntankunytjaku, palu wantingiṉa munuṉa wangkangu tjanala, ‘Wiya ngayulu puṯu ngayuku mayatja kinga wiyaṉi, panya Mayatja Godalu palunya kinga ngurkantaṟa mayatja nganampa tjunu.’ Alatji wangkaraṉa tjananya painu.” Munu Davidalu piṟuku Saulala purkaṟangku wangkangu,
11“Mayatjan wiṟu! Nyangatja nyawa nyanga maṟangkuṉa kanyini! Nyuntumpa panya kuutaṉa tjukutjuku ankala kaṯaṉu. Tjinguṟuṉanta mulapa nyara palula aṟa iluntanama. Palu wiya, nyuntunyaṉa wantir'iyaṉu iluntankunytja wiyangku. Ka nyanga palulanguṟu kulinma, panya ngayulu nyuntunya wiyantjikitja mukuringkunytja wiya. Munuṉa puṯu mukuringanyi mayatja nyuntumpa aṟangka nyinanytjikitja. Panya ngayuluṉa nyuntumpa kura palyantja wiyaṯu, palu nyuntu panyaṉin rawangku aṟuningi ngayunya iluntankunytjikitjangku.
12“Wanyu kulila, ka Mayatja Godalu ngalinya kutju kutju tjukaṟurungku ngurkantankuku. Panya nyuntu ngayuku ngunti-ngunti rawangku palyaṉi, ka tjinguṟu Mayatja Godalu nyuntunya pungkuku, palu ngayulu nyuntunya pungkunytja wiya.
13Nyuntu ninti tjukurpa nyangaku panya aṉangu tjuṯangku iriti wangkapai alatji, ‘Aṉangu kura tjuṯangku kutjuya kura tjuṯa palyalpai.’ Ka nyuntu nguḻuringkunytja wiya nyinama panya ngayuluṉa nyuntunya iluntankunytja wiya.
14“Ngayuluṉa puḻka wiya, kaṉin nyaaku rawangku aṟuṉi iluntankunytjikitjangku? Ngayuluṉa papa ilunytja puṟunypa, puḻka wiya, kaṉin nyaaku mayatja puḻkangku ngayunya punpunpa puṟunypa waṯaparaṉi?
15Uti Mayatja Godalu ngalinya ngurkantanama ngananya tjukaṟuru. Uti paluṟu ngayunya nyangama tjukaṟuru nyinanyangka, munu nyuntulanguṟu ngayunya wankaṟu kanyinma.” Alatji Davidalu wangkangu.
16Ka wangkara wiyaringkunyangka Saulalu palula tjapinu, “Davida! Mulapan nyuntuṯu palatja?” Munu paluṟu ulangu.
17Munu wangkangu, “Nyuntun wati palya ngayula munkara mulapa panya nyuntu wiṟu tjuṯa palyaningi ngayuku, kaṉa ngayulu kura tjuṯa kutju palyaningi nyuntumpa.
18Ka nyangatja Mayatja Godalu ngayunya ngalya-katingu nyuntulakutu, kaṉitjun tjinguṟu iluntanama, palu wiya, nyuntun wantingu wanka nyinanytjaku. Palulanguṟuṉanta kulini nyuntun wati palya mulapa.
19Panya warmaḻangku wati kutjupa witiṟa wanka walatjunkupai wiya, palu nyuntun wiṟu palyaṉu ngayuku kuwari, munu panyaṉin wantir'iyaṉu ankunytjaku, kaṉa palulanguṟu Mayatja Godala tjapini wiṟu mulapa nyuntumpa palyantjaku.
20“Kaṉa kulini ngula nyuntun Israelkunu tjuṯaku mayatjariku munun kuṉpungku tjananya aṯunymaṟa kanyilku aṉangu tjuṯa.
21Wiṟungkuṉi kalkula Mayatja Godala miṟangka ngayuku walytja tjuṯa iluntankuwiyangku wantinytjikitjangku, ka aṉangu tjuṯangku nganaṉanya ini watarkuriwiyangku rawangku kulinma.”
22Ka Davidalu kalkuṉu Saulala, ka Saulanya tjana ngurakutu maḻaku anu. Ka Davidanya wati tjuṯatjara maḻaku anu ngura panya puḻi tjuṯatjarakutu piṟuku kumpiṟa nyinanytjikitja ilytjingka.
