1Dauda lɛ̀. Ma làakari kpaɛna, Luda, mɛ́ lɛ̀ sí mà n táaki lɛ́ kↄ̃n nↄ̀sɛo do.
2Ma mↄrↄ kↄ̃n ma kuntigio kú máa? Mɛ́ gudↄↄ pá mìo.
3Dii, mɛ́ n sáabu kpá boriinↄ tɛ́, mɛ́ n táaki lɛ́ gbɛ̃nↄnɛ.
4Zaakɛ n gbɛ̃kɛɛ bíta kà n kiia, n náanɛ ludambɛ luguu lè.
5Luda, wà n tↄ́ sɛ́ lezĩ ai musumusu, ǹ tó n gakui da andunala píngi.
6Ǹ wewala ǹ wa mì sí kↄ̃n n gã̀sã gbãaao, lɛ wamↄwa n gbɛ̃ yenzideenↄ e wà bↄ.
7Luda yã ò zaa a kúkiia à bè: Mɛ́ Sɛkɛmu kpaatɛtɛ kↄ̃n zĩ̀blena wiiio, mɛ́ gba da kↄ̃n Suko guzurɛo.
8Giliada bùsu nɛ́ ma pↄ́mɛ, Manase boriinↄ bùsu nɛ́ ma pↄ́mɛ, Ɛflaimu boriinↄ bùsu nɛ́ ma mↄ̀furamɛ, Yudanↄ bùsu nɛ́ ma gòmɛ.
9Mↄabunↄ bùsu nɛ́ ma ↄpipibↄmɛ, mɛɛ̀ ma kyatee káɛ Ɛdↄmunↄ bùsun, mɛɛ̀ zĩ̀blewiii dↄ Filisitininↄ bùsua.
10Dé bé eé gɛ̃mao wɛ́tɛ bĩidee guuu? Dé bé eé dↄmɛ aɛ ai Ɛdↄmunↄ bùsun?
11Luda, à dɛ ḿbe n ↄ gbàrɛwazi, nɛɛ̀ bↄ kↄ̃n wa zĩ̀kpɛɛnↄ dↄroo?
12Ǹ ↄ dawa wa ibɛɛnↄ yãnzi, zaakɛ gbɛ̃ntee dↄnlɛ nɛ́ yã pãamɛ.
13Wé zĩ̀ ble kↄ̃n Luda gbãaao, àmbe eé kìti pá wa ibɛɛnↄa.
