1A kakailai kai David. God, a nuknukigu i tar vaninara; Ina kakailai, maia, iau iat ina kakailai na pite varpa;
2Amur a tavangun, ra ngap ma ra pagol; Iau iat ina vangun ra kau.
3Ina pite pa u, Luluai, livuan ta ra umana Tematana, Ma ina kakailai na pite varpa piram livuan ta ra umana vuna gunan.
4Tago kaum varmari i ki ak ta ra bakut, Ma kaum dovotina i tuk tar ta ra lao.
5God, una vangala pa mule u pi una ki ak ta ra bakut, Kaum minamar na ngala ta ra rakarakan a gunagunan.
6Una valaun avet ina ra limam tuna, ma una torom tagu, Upi kaum vakak na langalanga.
7God i tar tata ta kana lia na kini dari: Ina manga gugu; Ina tibe varbaiane Sekem, ma ina valar tibe ra male Sukot.
8Gilead kaugu, Manase kaugu, Epraim bula a ramravit ure ra ulugu. Iuda kaugu buka na varkurai.
9Moab kaugu la na dududur; Ina vue ra pal a kaugu taun ra gunan Edom; Ina kalukal ure Pilistia.
10To ia na agur vaolo iau ta ra pia na pal di tar liplip bat ia? To ia na rap vaolo iau ta ra gunan Edom?
11Dave, pa u tar okole vue avet, God? Pa ava varagur, God, ma kaveve kor na tarai na vinarubu.
12Una maravut avet, upi avet a tur bat ra ebar, Tago ra maramaravut kai ra tarai pai i topa ta magit.
13Ba dat ma God dat a ongaongor, Tago ia iat na rua taun kada umana ebar.
