1Ma swɛ̃̀, ǹ Dikiri sáabu kpá. Dikiri ma Luda, ń zↄ̃kↄ̃ manamana, ń gakuri dana pↄ́kasa ũ, àtɛn tɛ́ kɛ,
2n gupura kùnla lán biza bà, n musu kpàtɛ lán pɛ̀ɛ bà,
3n bɛ bò ínↄla musu. N ludambɛ luku kɛ̀ n sↄ̃go ũ, ndì di ĩa ↄa.
4Ndì ĩa kɛ n zĩ̀rinↄ ũ, ndì tɛ́vura kɛ n zĩkɛrinↄ ũ.
5N andunia kàtɛ, n a zĩni pɛ̀tɛ, à yĩgãna vĩ zikiro.
6N ísira kùa arukĩmba ũ, í pìi dà kpinↄla.
7N kpãkɛ̃ í pìii, akũ à bàa lɛ̀, n pataa, akũ à nàgui.
8Kpinↄ bò gupuran, guvutɛnↄ sìkũn, akũ í tà gu kũ n dìtɛnɛn.
9N lɛ́zɛki kɛ̀ í pìinɛ, ani fↄ̃ à vĩalaro, ani ɛra à da zĩtɛla ziki doro.
10Ndì tó ísɛ̃bokinↄ í pisi swa'ↄnɛnↄa, akũ a í dìgↄ̃ bàa lɛ́ kpinↄ dagura.
11Sɛ̃̀ntɛ pↄ́ sĩnda pínki dìgↄ̃ a í mi, a í dì saginↄ ími kɛ̃ḿma.
12Bãnↄ dì sà da swanↄ sarɛ, òdigↄ̃ kú a dàkoo gũn, ń wiki dìgↄ̃ dↄ.
13Zaa n bɛ musu ndì legũ gbarɛ kpinↄa, n zĩ gbɛ̀ɛ dì andunia kã.
14Ndì tó sɛ̃̀ butɛ pↄ́kãdenↄnɛ, ndì tó burapↄnↄ butɛ bisãsirinↄnɛ, ndì pↄ́ble butɛńnɛ zĩtɛa,
15sèwɛ̃ kũ àdi ń pↄ kɛ nna kũ nísi kũ àdi ń ãn tɛ́ kɛo kũ pↄ́ble kũ àdi ń gba gbãnao.
16Dikiri línↄ dì mↄtↄ le manamana, Sida lí kũ à bà Lɛbananↄ.
17Gwen bãnↄ dì sà dadan, zùbaananↄ dì bɛ kɛ pini lí musu.
18Kpi leinↄ de kpasaranↄ kúki ũ, gbɛ̀sↄkↄnↄ de gbɛ̀'ɛ̃nɛnↄ utɛki ũ.
19N mↄvura kɛ̀ gↄrↄ tàasikabↄ ũ kũ ifãntɛ̃ kũ à a gɛ̃na kpɛ́n gↄrↄ dↄ̃o.
20Ndì tó gu si, akũ gwãani dì kɛ, lákpɛ pↄ́nↄ dì futɛ kũ táo ń pínki.
21Músunↄ dì nàdɛna ↄ́ↄ dↄ, òdi pↄ́ble wɛtɛ Ludaa.
22Tó ifãntɛ̃ bò, òdi lↄↄtɛ ò tá wútɛ ń tòn.
23Bisãsiri dì bo à gɛ́ zĩ kɛ, àdigↄ̃ a zĩda yã ma ari ↄkↄsi.
24Dikiri, n yãkɛnanↄn dasi fá! A sĩnda pínki bò n ↄ̃ndↄ̃ gũmmɛ, andunia pà kũ pↄ́ kũ n kɛ̀nↄ.
25Ísira kun, à zↄ̃kↄ̃ akũsↄ̃ à yàasa, pↄ́ bɛ̃nɛ kũ ò kú a gũnnↄn lɛ́ vĩro, a fíti kũ a zↄ̃kↄ̃ↄo pínki.
26Gó'itɛnↄ dìgↄ̃ táa on kũ kwã zↄ̃kↄ̃ kũ n kɛ̀ à kↄ̃kↄ̃ o a gũnwo.
27Pↄ́ pìnↄ dì wɛ́ dↄnyĩ ń pínki de ǹ pↄ́ble kpáḿma a gↄrↄa.
28Ndì kpáḿma, òdi sɛ́tɛ, ndì ↄ porońnɛ, akũ pↄ́ mananↄ dì mↄ́ḿma.
29Tó n mìkpɛrɛ zùńnɛ, òdi bídi kɛmɛ, tó n wɛ̃̀ndii sìḿma, òdi ga ò ɛra ò tá bùsutitin.
30Tó n n Nini gbàrɛ, pↄ́nↄ dì wɛ̃̀ndi le, ndì tó zĩtɛ ɛra à kɛ dufu.
31Ò tó Dikiri gakuri gↄ̃ kun gↄrↄ sĩnda pínki, ò tó Dikiri pↄ kɛ nna a yãkɛnanↄa.
32Àkũ mɛ́ àdi zĩtɛ gwa, akũ àdi yĩgã, àdi ↄ na kpinↄa, akũ túsukpɛ dì bo.
33Mani lɛ̀ sí Dikirinɛ ari ma wɛ̃̀ndi lɛ́n, mani ma Luda táaki lɛ́ ari ma gↄrↄ lɛ́n.
34Ǹ tó ma laasun kánnɛ, Dikiri, lákũ matɛn pↄnna kɛ kũnwo nà.
35Durunnakɛrinↄ mì dɛ andunia gũn, yãvãnikɛrinↄ súngↄ̃ kun doro. Ma swɛ̃̀, ǹ Dikiri sáabu kpá. Aleluya!
