1आं थुं, परमप्रभु यावे कली ठेयब सेलो। परमप्रभु यावे, आं परमप्रभु गे थम ठेयब बाक्नीनी। ठेयब दुम्तीके नु मान ततीके इन के बाक्ब।
2गे छेङछेङ कली वा फेक्शो खोदेंशो पा फेक्शो बाक्नीनी। मिनु सरीङ कली ताम्बु खोदेंशो पा प्राक्शा कीशो बाक्नीनी।
3गे इन बाक्तीक ङा थाम ब्वाक्कु तारी सेल्शो बाक्नीनी। गे गोस्स कली इन बग्गी सेल्शो बाक्नीनी। मिनु गे फश आ फ्रां तार ङोइश्शा गाक्ब बाक्नीनी। उत्पत्ती १:६-८; भजन संग्रह १८:१०-१२
4मिनु गे फश कली इन लोव़ चोव़ब नु मी कली इन गेय पाइब सेल्शो बाक्नीनी। हिब्रू १:७
5रागी गेना यो महिम्सेक्ल, दे आ जग वोइक्तीनी। मत्ती २४:३५; प्रकाश २१:१
6गे मेको कली वा बुद पा ब्वाक्कुमी सुम्तीनी। मिनु ब्वाक्कु डांडा तार सम्म जाक्दीश्शो बाक्त।
7गे हुइक्तीनीनु, मेको प्रोक्ब। इन बुंबु पशो सेंदामी मेको दोरोर पा लाइब।
8मेको ब्वाक्कु डांडा ग्येत्थ बारशा, दिंम मेर शाइक्ब। मिनु इन देंशो बाक्तीके सम्म लाइनीम।
9मेको लेंशा रागी कली सुम्थ मजाक्मल, दे गे सांद सेल्तीनी। अय्युब ३८:८-११; हितोपदेस ८:२९
10गे दिंम मेर ब्वाक्कु बुक्तीक सेल्तीनी। मिनु मेको डांडा आन दाते रे शाइश्शा लाइनीम।
11गे ब्वाकी ङा जन्तु नेल्ल आन कली तूचा गेनीनी। ब्वाकी ङा गधापुकीमी यो मेकेर ङा ब्वाक्कु तूशा, ब्रोंइनीम।
12मेको खोला आन नेक्था चिक्बपुकीमी आन ग्योव़ सेल्नीम। मिनु राशीम बाक्शा कुम्सो पाइनीम।
13इन इर ङा बाक्तीक रे रेउ यिपाइश्शा डांडा आन कली जिप्पाइक्नीनी। इन गेय पशोमी रागी नेल्ल ग्येरसीनीम।
14गे बी ब्यफ आन कली घांस वापाइक्नीनी। मिनु खप रे मुर आन कली जचा थोव़क वापाइक्नीनी।
15मिनु गे मुर आन थुं ग्येरपाइक्चा कली अङगुर सिप्पाइक्नीनी। मिनु आन कुल दारपाइक्चा कली तेल नु आन रां बोल्यो सेल्चा कली शोब्ले गेनीनी।
16परमप्रभु यावे आ ख्रुम्शो लेबानोन ङा लाइश्शो रवा शुश ब्वाक्कु ताइब बाक्नीमी।
17मेकेर चिक्बमी आन ग्योव़ सेल्नीम। मिनु ठेयब बुश चिक्बपुकीमी सला रवाम आन ग्योव़ सेल्नीम।
18लाइश्शो डांडापुकी ब्वाकी ङा क्यारश आन कली बाक्नीम। सेरथे फुल्लु आइक्च जन्तु आन ख्रुइक्तीके बाक्नीम।
19मिनु गे बर्खा नु हिंउद कोंइचा कली तास्ला सेल्तीनी। नांमी आ दाप्तीक पेरतीक तुइक्ब। भजन संग्रह ७४:१६
20गे छिङछिङ सेल्नीनी। मिनु नाक्दो दुम्ब। मेना ब्वाकी ङा जन्तु ग्रूनीम।
21मिनु गुप्स आ चाइक्बपुकीमी सिखार माल्शा, ग्रीशा आन जचा थोव़क परमप्रभु आ गुइ रे पुंइनीम।
22मिनु नां दाप्मेनु, मेको आन पुक्खीम लशा, ख्रुइश्शा गोल्नीम।
23मुरपुकी चहिं आन गेय पथ लाइनीम। मिनु नाक्दो सम्म गेय पाइनीम।
24परमप्रभु यावे, इन गेय ठेयब नु शुश बाक्नीम। गे जोक्ब तुइक्ब दुम्शा, नेल्ल सेल्तीनी। रागी नेल्ल इन सेल्शो मारेइ मारेइम ब्रीशो बाक्ब। उत्पत्ती १:३१
25मेकेर ठेयब नु ब्रेम्शो समुन्द्र बाक्ब। मिनु मेकेर हिक्ने मचाप्चा ङा पा ठेयब नु आइक्च जन्तु रमल ग्यमल पा बाक्नीम।
26मेकेर रे जहाजपुकी यो गाक्नीम। मिनु गे मेकेर ग्यारचा कली लेव्याथन यो सेल्तीनी।
27मिनु मेको नेल्लेमी “जचा थोव़क गेकी” दे इन कली कोव़नीम। भजन संग्रह १४५:१५-१६
28गे मेको आन कली गेनीनु, मेकोपुकीमी खुप्नीम। इन मुठी प्राक्नीनु, मेकोपुकी ब्रोव़शो नु रिम्शो थोव़कीमी रूनीम।
29मिनु इन कुल ख्रुइक्तीनीनु, मेकोपुकी श्येत जाइनीम। मेको आन सोक्त लाइक्नीनु, मेकोपुकी बेक्नीम। मिनु लेंशा फुरक दुम्नीम। उत्पत्ती ३:१९
30मिनु इन सोक्त सोइश्शा, मेको आन कली सेल्नीनी। मिनु गे रू आन कली लेंशा सेल्नीनी।
31परमप्रभु यावे आ सक्ति गेना हना यो लीशा बाक्ल। परमप्रभु यावे आ गेय तशा, आंमा ग्येरसेक्ल।
32गे रागी कली कोव़नीनु, मेको ख्रिंख्रि पाइब। गे डांडा कली थिनीनु, कुन ग्रूब।
33गो ब्रोंइङा सम्म परमप्रभु यावे कली कुम्सो पना पन बाक्नुङ। गो मबेक्ङा सम्म आं परमप्रभु कली ठेयब सेल्शा, कुम्सो पना पन बाक्नुङ।
34मेकोमी आं मिम्शो दाक्तल। मारदे हना गो परमप्रभु यावे कली मिम्शा ग्येरसीनुङ।
35पाप पाइबपुकी रागी रे क्याम्चा पुंइसीमल। मिनु आ अरेशो मपाइबपुकी मलीमल। आं थुं परमप्रभु यावे कली ठेयब सेलो। परमप्रभु यावे कली ठेयब सेलो।
