1Tata Diosta tukuy shunku kushichishpa alabasha. A, Tatayni Dios, ashwan sinchi kamachikukmi kanki. Tukuy laya atipak kashpayki sukaman allimami kanki.
2Luswan sawa llachapawanshina wankunakushkanki. Sieluta warkudu llachapatashina churashkanki.
3Kan tukuy layata kamachishpa sielupi wasikipa orkonninkunatashina manllayba kochapi sinchichishkanki. Puyukunata rurashkanki purinayki karrukunashina kanankunapa. Wayrashina maytapish rinayashpa rinki.
4Sinchi wayra yachachiwanchisapa sukaman atipak kanaykita. Rawraykak ninakunapish kanllapami.
5A, Tata Dios, allpata allimata sinchichirkanki. ama churashkaykimanta kuyunanpa.
6Yakukuna suk llachapashina allpata kirparkan. Yakukuna tukuy urkukunata kirparkan.
7Kan, Tata Dios, yakukunata willaptiki kallparkansapa. Troynoshina rimakuptiki yakukuna uyarishpa nitikurkansapa.
8Urkukunata llukashpa bajadakunata urayashpa rirkansapa maypicha willashkaykipi kanankunapa.
9Willarkankisapa amana chaymanta llukshinankunapa ama kashkan allpata kirpanankunapa.
10Chaymanta yaku pachyamunankunamanta urkukunata pasashpa yakuta kallpachishkanki atun yakukunaman rinankunapa.
11Chay yakukunamanta tukuy sachakunapi kawsak animalkuna yakukunsapa. Chayta upyashpa sachapi kawsak burrukuna yakunayayninta samachinsapa.
12Pawak animalkuna yaku mañankunapi wasichakunsapa. Kaspikuna ramanpi kantansapa.
13A, Tata Dios, kanmi anak sielupi wasikimantapacha yakuta tamyachishpa sachakunata ñuyuchinki. Altumanta urmamuk yakuwan allpata saksachinki.
14Chay yakuwan pastukunata wiñachinki animalkuna mikunankunapa. Runakuna tarpunan murukunata wiñachinki wayuchakuptin mikunankunapa.
15Chay wayukunata mikunsapa fersasyuk kanankunapa. Vinuta upyansapa kushikunankunapa.
16Kan, Tata Dios, chay yakullawan kaspikunata saksachinki. Libano partipi tarpushkayki sedrukunatapish saksachinkisapa.
17Chay kaspikunapi taksha pishkillukuna wasichakunsapa. Pino kaspikunapi garsakuna kawsansapa.
18Altu urkukunata kabrakunapa rurashkanki. Rumikuna sikinpi achunikuna pakakunsapa.
19Killata rurashkanki yachanaynikunapa ima laya tiempumi nishpa. Intipish yachan imay orasmi urkukunapi chinkanka nishpa.
20Chaymanta yana llachapatashina mantanki tutayananpa. Tutayaptin sachapi animalkuna llukshinsapa.
21Pumakuna mana mikunankunata tarishpa kaparinsapa. Tata Diosta mañansapa mikunankunata kunankunapa.
22Inti kashkan llukshimuptin machayninkunapi sirik kutinsapa.
23Chashna diyayaptin ullkukuna trabajunkunaman rinsapa. Tutayanankaman trabajansapa.
24A, Tata Dios, rikchak layata rurashkanki. Kay allpaka tukuy rurashkaykiwan untami.
25Allpapi tiyan manllayba kocha. Chay kochapi mana yupaypa atun animalkuna taksha animalkuna tiyan.
26Chay manllayba kochapi barkukuna purinsapa. Yaku ukupi manllayba manchanapa animal kawsan chaypi pukllananpa.
27A, Tata Dios, tukuy chay animalkuna kanta shuyashunkisapa mikunankunata munashkankuna oras kunaykipasapa.
28Kan, Tata Dios, mikunankunata kunkisapa. Chashna kuptiki chay animalkuna apinsapa. Paykunata kuptiki munashkankunawan saksansapa.
29Chay animalkunata manana yanapaptiki manchakunsapa. Manana kawsanankunapa samayta kuptiki wañunsapa. Usushpa polvo tukunsapa.
30Munashpayki kashkan kawsachinkisapa. Chashna kawsachikushpa allichanki allpa kashkan allima rikurinanpa.
31Mash uyariwaychi. Tata Dios mana tukuyniyukta kamachikun. Tukuy rurashkanta kawashpa sukaman kushikun.
32Tata Dios munaptin allpa chukchukun. Tata Dios urkukunata llankaptin kusninsapa.
33Ñuka chaykunata kawashpa wañunayni diyakaman kantukunata kantashpa Tata Diosta kushichisha.
34Allita yuyashpayni munani Tata Diosta kushichiyta. Paymi ñukata kushichiwan.
35Kushikushpa rimani: Allpamanta tukuy ucha rurak runakuna chinkachunsapa. Mana alli rurak runakuna amana kawsachunsapanachu. Ñukaka Tata Diosta tukuy shunku kuyashpa alabani. Munani tukuy runakuna Tata Diosta alabanankunapa.
