1Na asigi dawa:su amoga Hina Godema nodoma! Hina Gode! Na Gode! Di da baligili Bagadedafa! Di da fedege agoane, hadigi amola hou noga:idafa amo abula agoanega ga:i dagoi.
2Di da Disu hadigi amoga dedebosa. Di da diasu gagusu abula fa:sia gagai defele, mu fa:i.
3Di da mu hano da:iya, Dia diasu gagui. Di da mu mobi amo Dia sa:liode agoane hamone, fo ea ougia da:iya fila heda:le, wa:le ahoa.
4Di da fo amo Dia sia: adola ahoasu dunu agoane hamosa, amola ha:ha:na ea bagele gala:be da Dia hawa: hamosu dunu agoane hamosa.
5Di da osobo bagade amo ea bai da:iya ga:nasili ligisi. E da hamedafa fogomu.
6Di da hano wayabo bagade abula agoane, osobo dedeboi. Hano da goumi dedeboi.
7Di da hano amoma gagabole sia:beba:le, ilia da hala sa:i dagoi. Di da gasigama:ne wele sia:beba:le, ilia da hobeale asi.
8Hano da goumi da:iya ahoanu, bu fagoga sa:ili, Dia ilegei sogebi amoga asi.
9Hano da bu osobo bagade dedebosa:besa:le, Di da hano mae baligili masa:ne, alalo ilegei.
10Di da hano bubuga:su fagoba:le ligisisa. Amola hano bagade agolo gilisi dogoa ahoabe hamosa.
11Sigua ohe da amo hano naha. Amola amoga sigua dougi da ilia hano hanai gumisa.
12Sio fi ilia da ifa amo hano gadenene bibisa, amola gesami hea:sa.
13Di da muagadonini agolo sogega gibu iaha. Amola osobo bagade da hahawane liligi amoga nabai ba:sa.
14Di da bulamagau ea ha:i moma:ne, gisi heda:ma:ne iaha, amola ninia moma:ne, ha:i nasu liligi heda:ma:ne hamosa.
15Di da ninia hahawane ba:ma:ne, waini hano amola olife susuligi ninima iaha. Amola ninia gasa lama:ne, agi ninima iaha.
16Lebanone sogega, dolo ifa da gibu dabe defele ba:sa. Amo da Hina Gode Hi bugi liligi.
17Amo ifa boua, sio fi ilia bibisa. Amola ‘sidoge’ sio da amo ifa boua bibisa.
18Sigua goudi da goumi sedade amogai fi diala. Ulia ohe da goumi gafulu gele haguga fi diala.
19Di da oubi amo oubi eso dawa:digima:ne hahamoi. Amola eso da ea dabe ilegei dawa:sa.
20Di da gasi hahamoi dagoi. Amogalu, sigua ohe da gadi afia:sa.
21Waha debe laione wa:me da ha:i manu amo Dia ilima i, amo hogomusa: benea ahoasea, ilia da gesenesa.
22Be eso masea, ilia da sinidigili, ilia diasuga molole diaha.
23Amasea, dunu ilia da gadili hawa: hamomusa: ahoa. Ilia gebewane hawa: hamonanea, daeyagisa.
24Hina Gode! Di liligi bagohamedafa hahamoi. Di da liligi huluane noga:le dadawa:le hahamoi. Osobo bagade da esalebe liligi, Dia hahamoi liligi, amoga nabai diala.
25Hano wayabo bagade ba:ma! E da bagadedafa amola ba:dedafa. Amo ganodini esalebe liligi, bagade amola fonobahadi, idimu hamedei fi diala.
26Amo da:iya, dusagai da ahoa. Amola amo ganodini, ohe bagade ea dio amo Lifaiada:ne, (Dia hahamoi liligi) e da hedesa.
27Ilia huluane da ilia ha:i manusa: dawa:i liligi, Dia ilima ima:ne edegefisa.
28Di da ilima iaha, amola ilia da amo naha. Di da ilima ha:i manu iaha, amola ilia nasea sadisa.
29Di da ilima baligi fa:sea, ilia da beda:gia:sa. Dia ilia mifo samogesea, ilia da bogogia:sa. Ilia da:i da osoboga hamoiba:le, ili da osoboga buhagisa.
30Be Di da ilima mifo iasea, ilia da hahamoi dagoi ba:sa. Di da osobo bagadega, esalusu gaheabolo iaha.
31Hina Gode Ea hadigi hou eso huluane dialalalumu da defea. Hina Gode da Ea hahamoi liligi amo eso huluane hahawane ba:lumu da defea.
32Hina Gode da osobo bagade ba:sea, osobo bagade da fofogosa. E da goumi digili ba:sea, mobi da bubuga:ne gala:sa.
33Na esalusu huluane amo ganodini, na da Hina Godema gesami hea:le gala:lumu. Na da esalea, na da na Godema nodone gesami hea:le gala:lumu.
34E da na gesami hea:le gala:be, amo hahawane ba:mu da defea. Bai na hahawane hou da Hi iabeba:le fawane nama iaha.
35Wadela:i hamosu dunu da gugunufinisili, osobo bagadega esalebe bu hame ba:mu da defea. Na asigi dawa:su amoga Hina Godema nodone sia:ma! Hina Godema nodoma!
