1Nambana imambu dokome Kamongo lakandape. O Kamongo, nambana Anatu, emba kamame mupwa wakasa. Kingi ketae pao kingi neta renge ingyuo karo pingi dopale emba ketako paleta karenge.
2Emba kendali dokome komauna mendeke ingyuo pee piro karenge. Yake doko komau anda ingyuo kawake lapala karene. Ipwa ketae dorena embena anda pisi karenge kandale. Kopa dupwa mena ose ipyuo penge uliuli ingyaro karo porambaiye dokome papake ingyaro karena lao piso pengepya.
4Porambaiye doko embena pii minyuo papingi ingyuo yuu pele dupwa embena kendemande ingyuo pingipya.
5Embame yuu dake puu rombo minyuo susa piinyi dokopa walu walu laa naraŋa lao poraiyuo pyuokonda piinyi piro karamo.
6Embame ipwa kota kameya dokome komau londe dopale inginyi pyambwapala yuu kyau dupwa yambe pyaoreteepya.
7Embame ipwa poraiyuo pyalana pyuo leene dokopa waiya lao kata nyingipya. Embame pii dopa pinya lao pii ketae palyuo leene dokopa nakama aopa pengepya.
8Yuu kyau dupwana lupyuo epo lama dorenaparaŋa lao panda retakaminyi dokona pengepya.
9Embame ipwa doko banya kata liti pyuo pona dokona pena lee dokome dee yalo epo yuu dupwa yambe pyaa nangepya.
10Embame yuu pau lama lama dupwana ipwa guu lanyi pyakamao dee ipwa pona dupwa yuu kyau kuki dupwana piso lupyuo pena leepya.
11Wii saape rae lenge dupwame nao mena donge rae lenge dupwa ipwa nano pira dokopa narami lao pyakamii.
12Ipwa repeta isa dupwana yaka dupwa nakambana anda pipala pii lao lyuo karenge.
13Embame yake panda piso yuu kyau dupwana apunda peeyo isa yuu dake elya pyuo kalya pinyi nembelene.
14Embame mena bulamakao dupwa isako doko narami lao andanyi pyambwakamingi. Nenge dupwa wambu dupwana rangeme wara pyuo narami lao pyakamingi.
15Rae maiyuo kararami lao ipwa waene maiyuo gii mona paliramo karena lao olipi ipwange maiyuo lopa nao kararami lao borete maiyuo pingipya.
16Kamongo rangena isa sita yuu Lepanone dokona wara piyamo dupwame apunda malu mandenge.
17Yaka dupwame isa dupwana epo nakamana anda pingi. Luu isa yale dupwana yaka kameya mende soko lenge nakamana anda pingi.
18Mena meme rae lenge dupwa yuu kyau manda dupwana palenge. Mena kuki saa yale dupwa yuu kana lapu lapu rondo dupwana yalu pyuo palenge.
19Embame kana dokome ee kana minyinya lao wasiipya. Neta anda paramo doko soo otenge.
20Embame yuu kwuange gii reteenesa kwualyamo dokopa mena suwa rae lenge dupwa neta kata nyuo epo pengepya.
21Mena laene ene anda anda dupwa nuli nao nenge Anatumi mailyamo dupwana pao dokopa pii porakai lao papingipya.
22Neta pyakaelyamo dokopa nakamana anda palenge dupwana kapu kyuo pao palyuo singipya.
23Dokopa enakana wambu dupwa nakamana yulu pela penge. Pao pyuo karo alemanji ingingi.
24Kamongo, embame bange malu mee soo kaeyo wasiipya. Apa pyuo mona palyakondali pipala wasiipi? lao suu pyao karo. Isa yuu dake embame wasiinyi dupwameko simbwaro silyamo.
25Kota pete ruŋupaŋu pyuo andake waso reteenesa oo bangepe lee renge kuki epengepe dupwa mendeme yaka lao sukusa parami ingya nalyamo.
26Sipu duwpa ketae papyuo karenge dupwana koko kau oma reeko mende Lipaitene lengedoko ipwa kota dokona male lao sinya lao wasii.
27Nakama nenge yano pilyamo dokopa embame jingi kandale jere lao masingi.
28Embame nenge rapa rapa pyuo mailini dokopa nakama nyuo nao sikya pingi.
29Embame nakama yaki nyilini dokopa pakame kumuo karenge. Ŋee ŋaape singi nyokonyapinyi dokopa nakama kumulyaminyi. Kumapala yuu epeyami dokona dee range pao singi.
30Dopa pipinyipape embame porambaiye maipinyi dokopa lee rao karaminyi. Embame isa yuu dake letena renge enenge maingi.
31Kamongona neta renge yulu doko sulu sinya. Kamongo banya bange wasiyamo dupwana lao rae maiyuo karenale.
32Baame isa yuu dake kandapyamo dokopainju ingyuo pyuku pyuku lala lala pelyamo. Yuu kyau dupwa minyandapyamo dokopa isare kyau lao nyilyilyamo.
33Namba Kamongo dokona lao kenane pyao karalu kararo. Namba kararo yuu gii dusipana nambana Anatulakando kenane pyaro.
34Nambana rae maingi renge doko baa keta epenge dokona nambame kenane pyaro dokome baa epe sinyale.
35Wambu yulu koo pingi dupwa isa yuu dakena koo keta palyuo penale. Yulu koo pingi wambu dupwa dee pii nanale. Nambana imambu dokome Kamongodoko lakandape. Banya kingi doko minyalyuo lakando palena.
